Archivo di e Categoria ‘Editorial’
Nos a pasa hopi dia lesando y scuchando e debate entre e resto di e liderazgo di MEP y e duo Marisol-Mervin, den cual palabranan fuerte a cay di ambos banda y ningun solucion por a ser logra pa un transicion cu por a scapa e unidad di MEP. E dos damanan a declara nan mes independiente y e resto di MEP a sigui conforma un partido cu 6 asiento y un lider di partido nobo den e persona di Candelario “Booshi” Wever. Apesar di e condena cu e tin colga riba su cabez, regalo di Rudy Lampe via Corte, e ta papiando como e lider natural di MEP. Y e no ta haciendo e malo tampoco! E tono a cambia di uno violento, amenazador, pa uno mas inteligente y apaciguador. Di palabranan condenatorio a pasa pa deseonan di exito, na cual Evelyn tambe a uni su mes. Mi ta spera cu ta te ey tambe nos lo sigui mira e desaroyonan negativo cu a surgi despues cu e dos damanan parlamentario a inicia un tanda nobo den e ramo complica di politica, mistica di partido, lealtad incondicional y e derecho di tin un opinion propio y di exprese libremente.
Prome cu tur cos, mi deseo pa un aña 2011 yen di salud pa henter nos poblacion, y alavez, yen di felicidad y prosperidad.
Na cuminzamento di aña hopi ta tira un bista riba esun cu a pasa pa mira ki sentido nan por saca di dje. Pa loke ta trata e interpretacion personal di cada ken, esey ta keda circumscribi na e individuo, y no por ser distribui entre henter e poblacion.
Ya criminalidad na Aruba a yega un nivel intolerable. Tiroteonan ta ocuriendo cu un frecuencia increible, y e daño cu nan ta causa, no solamente na e victimanan, sino tambe na nos isla, ta indescriptible. Bo no ta sintibo sigur mas riba un isla cu tabata un modelo di trankilidad y tolerancia apenas algun aña pasa. Entre asaltonan, atakenan y ladronicia, e paz di nos ciudadanonan a ser afecta di tal forma cu nan ta biba bao e sombra di temor. Sali anochi riba caya ya no ta un riesgo so, e ta tambe un imprudencia. Bay un centro nocturno pa pasa un rato agradable a para bira un aventura den un jungla pobla pa agresornan sin consenshi. Kico cu ta por sosode sin spera, y si suerte ta di bo banda bo por sali ileso di cualke incidente. Si no, anto bo a caba di conoce bo mala suerte.
Loke a pasa den sala di Parlamento den fin di siman ta altamente elogiable, no pasobra e mocion a pasa cu un mayoria absoluto di voto, sino pasobra pa prome biaha dos persona di oposicion a pone Aruba den prome lugar y partido den e di dos lugar, manera mester ta! Marisol y Mervin por a vota contra e proposicion pa keda consono cu e decision general di nan partido, pero exhibiendo caracter y disciplina personal, y e razon pakico nan ta den politica, o sea pa percura pa Pueblo keda bon sirbi, nan a bay contra e coriente negativo di MEP. Ni maske cuanto zundra a bay den nan direccion, nan a vota pa iguala e Ministronan y Parlamentarionan cu e resto di e Pueblo trahador cu mester yega 60 aña pa cobra pensioen. Awor, danki na e voto ey di apoyo di parti di Marisol y Mervin, Aruba a dal un stap padilanti den e modernizacion di politica.
Segun mi, tur e discusionnan cu tabata tin y cu te ainda ta andando tocante UPG y LGO, ta un perdemento di tempo. Si e intencion di adopta cualke un di nan dos ta pa habri caminda pa nos drenta Europa, o pa nos keda cu nos nacionalidad Hulandes, e no tin sentido pasobra nos ta Europeo caba. Ningun hende por kita e realidad ey for di nos. Ademas, nos tin tur e derechonan cu cualke otro Europeo tin, sin mas ni menos. No ta asina cu nos tin solamente un Status Aparte regla cu Hulanda pa ta bas den nos mesun cas, y cu fuera di esey nos ta werfano di tur e otro beneficionan cu nos nacionalidad ta otorga esnan na Europa, pasobra nos nacionalidad tambe ta ofrece nos e mesun derechonan ey, aki y aya! Laman ta separa nos fisicamente, pero no den nos condicion di ciudadano!
Ta cu cierto decepcion mi a tuma nota di e noticia cu Imigracion y Aduana Americano presente riba nos isla ya no ta bay asisti e vuelonan di mainta mas, pa razonnan economico y falta di presupuesto adecuado pa cubri overtime. Mi no sa si e noticia ta veridico, y cu e motibonan ta esnan indica, pero diferente persona a informami di e decision lamentable ey. Imigracion y Aduana Americano na vliegveld ta forma parti caba di nos structura di viahe, y e tarea cu e ta cumpli den e facilitacion di e bishitantenan pa Merca, ta di un balor incalculable. Mi ta corda tempo cu e no tabata existi, y nos mester a bay para na rij na Miami durante mas di un hora, pa logra admision na e gran pais Americano. Con cosnan por a yega asina leu mi no sa, pero nos mester haci un esfuerzo pa cambia e decision ey y asegura nos mes di e presencia y e servicio cu e ta brinda no solamente esnan di Aruba, sino tambe tur e turisanan Americano cu ta bin pasa tempo cerca nos.
Politica na Aruba no ta separable den su esencia di esun di otro paisnan. Aunke nos ta limita den number di hende compara cu otro nacionnan, nos tin di tur manera e deber y obligacion di participa den e conduccion di nos isla na momento cu Gobierno presenta nos cu e posibilidad ey. De lo contrario, otronan ta tuma decisionnan pa Pueblo cu kizas no ta na su fabor, pero cu cual e mester biba pasobra e no a coopera ora e momento a yega pa participa hunto cu Gobierno den e gestion exigente di maneha e asuntonan publico di Aruba.
Den e ecuacion aki, autoridad moral ta, definitivamente, un factor determinante pa un lider politico o un Gobierno, pasobra ta solamente si e tine y Pueblo ta convenci cu ta asina, e por inspira y stimula comunidad pa kere den un vision y hunto cu Gobierno enfrenta e retonan pa realiza e vision ey. Den pasado, o sea cu e gobierno anterior, tres factor a afecta hopi e credibilidad di politica mes, y hunto cune, e politiconan na Aruba.
Mi no tin ningun idea ta ken por a inventa tur e preguntanan di Censo, y tampoco di unda nan por a bin. Nan ta local of un traduccion di algun sabio Hulandes? E cuatro formularionan cu e interogador mester yena ta modela riba loke ta existi na Hulanda, o nan ta un invento di algun iluso local? Con cu e asunto aki por ta hinca den otro, e no ta consisti di preguntanan tipico di kendenan mester haci un censo (conteo di poblacion y vivienda!), sino di un inmiscucion den e bida priva di Arubianonan y stranheronan residencia na Aruba.
Biaha pasa caba mi a nenga di suministra informacionnan tocante salud, no pa capricho, sino pasobra mi no ta compronde kico mi salud tin di haber cu mi presencia den e poblacion Arubiano. Mi por compronde e preguntanan riba unda mi a nace, cuanto aña di edad mi tin, si mi ta casa o soltero, unda mi ta traha, enfin cosnan cu ta relaciona cu mi como miembro di e comunidad Arubiano. Pero e resto di preguntanan ta completamente for di sla pasobra nan ta pertenece na otro specialidad y mester ser trata como tal.
For di e momento cu e matutino aki a mira luz di dia, el a acapara e posicion number 1 entre tur e medionan skirbi, local y di exterior, y a mantene durante 30 aña! Y no solamente esey, sino cu di acuerdo cu nos estadisticanan, cada aña DIARIO tabata aumenta su circulacion riba e aña anterior te yega na e cifra record di 23.000 ehemplar pa dia! Y e no ta inclui e corant na Ingles, ARUBA DAILY, pasobra nos no ta manipula cu cifranan pa aparenta cu nos ta mas grandi di loke nos ta! Nos circulacion ta fiho y creciendo keto bay!
Ta dificil evita cay den un ambiente di asombro ora bo ta ser confronta cu cosnan expresa como hechonan historico, pero cu no ta nada otro cu fragmentonan di politica partidista. Booshi a caba di duna un demostracion di e concepto aki, pasobra entre e diferente factornan historico cu e ta menciona corectamente, e ta introduci algun cos irelevante na e tema cu e ta expone.
Pa cuminza, MEP no a busca ningun sorto di Status Aparte; su cabay di bataya tabata e Independencia total di Aruba. E lucha no tabata pa los di Antillas, sino di Hulanda y Antillas pareu. Betico no a manda emisarionan Sur America y Cuba pa busca apoyo pa un eventual salida di Antillas, sino pa un ruptura total cu Hulanda.
Si Ministerio Publico ta kere cu e agresion cobarde (y salvahe!) contra nos reportero ta bay conta cu e pordon di tempo, e ta masha ekiboca! Den hopi caso, nos a haya e impresion cu O.M. ta steun riba e efecto di tempo pa aminora e severidad di un infraccion cu e no kier investiga te den su ultimo detayenan, tratando di laba man manera Pilatus, djis pasobra, manera nos ta mire, ta trata di un of otro medio cu no ta di su agrado. Wel, laga Ministerio Publico preta faha pasobra nos ta bay “all out” den e caso aki pa obliga e autoridadnan local cumpli cu nan mision, cu ta esun di protege e ciudadano contra actonan di agresion, y condena esnan cu ta comete nan. No tin otro manera di mire, pasobra un institucion mes valioso cu Ministerio Publico no por bira victima di e capricho di algún Fiscal di pasa-tempo prome cu nan bay back nan pais di origen.
Ta parce cu dia Nel a sacodi e caha di e cadavernan politico cu e tin warda di su partido, por lo menos uno a bula den laira y a cuminza sacodi su wesonan manera den un intento di resureccion politico. Nel mes a bay den Parlamento pa brinda nos un espectaculo hopi deprimente, usando no solamente expresionnan hopi aleha di berdad, pero alavez palabranan inadecuado den e boca di un ex-Prome Ministro cu a ocupa e puesto ey den diferente ocasion.
Despues cu Nel a nota cu e efecto cu e tabata buscando a keda ausente, y cu e mentiranan cu e kier a bende como berdad no a haya cumprado, el a bandona Parlamento y a desaparece, lagando e skelet ehecutando su danza solitario. Mi ta referi aki na Rudy Croes, kende a bay den un arengue di ofensa contra Paul Croes, comosifuera e ta den condicion di desherede di famia pasobra e no ta MEP.
Den MEP tin actualmente dos coriente di comportacion y pensamento, uno encabeza pa Evelyn y e hobennan cu kier progreso den nan careranan político, y e otro dirigi pa Nel cu e unico intencion di stroba, daña y perhudica, no AVP, pasobra e no tin e capacidad pa haci esey, sino Aruba, cu tin mester di trankilidad pa navega den e laman bruto di problemanan cu Nel a laga atras. Di un banda otronan ta purba drecha e imagen di e partido, y contrario na nan, Nel ta insisti di sigui daña loke por a keda pa drecha. E prome tin bista riba futuro, e di dos riba pasado. Tempran of lat lo bin un confrontacion entre e dos corientenan ey, y na final di dje lo determina e posibilidadnan di e partido pa reconkista poder.
Personalmente mi ta kere cu Gobierno tin e talento necesario pa hiba nos pais padilanti, aunke ultimamente mi por a constata cu tin un coriente di desconfianza den dje cu ta plamando na Aruba manera e reisnan di un Mandragora. E gran excepcion ta Arthur Dowers, contra kende mi no a scucha nada, y den kende mi confianza ta absoluto! E resto, pa mi, o no ta compronde kico “poder” ta encera, o no sa manehe cu e independencia cu e puesto di Ministro ta otorga.
No por ta asina cu pa tuma cualke decision mester mira cara den spiel manera un macaco pa sacudi e spanto di cualke critica cu por surgi na raiz di nan.
Propietario di un lenguahe sin temperancia, y un odio implacable cu ta yena delaster un di su sentimentonan, ki ora cu Nel Oduber sali di su exilio voluntario pa papia na radio o television, e no ta haci nada otro cu causa MEP daño. E ta comproba cada biaha cu e no kier reconoce cu awendia Pueblo di Aruba no ta kere mas den e clase di politica cu el a asumi durante e ultimo decadanan, o sea esun di atakenan personal, critica contra personanan y no nan ideanan, y otro pensamentonan mes nefasto.
