Diario Online » General

Gobierno ta extende dialogo social te cu final di augustus

alex — Thu, 29 Jul 2010 08:19:46 +0000

ORANJESTAD (AAN)* Gobierno a dicidi pa expande e dialogo social te cu final di augustus mirando cu tin temanan y asuntonan cu mester worde trata profundamente.
Den esaki tin intension pa trata e asunto di pensioenfonds APFa cu cautela y cu mas profundidad. Esaki teniendo na consideracion cu practicamente e mitad di e fondo a desaparece na man di mal maneho y e pregunta tat a con lo bay recupera e suma aki. Si ta tire riba lomba di e funcionario di gobierno of kico gobierno lo haci pa salvaguardia interes di e trahadornan di gobierno.
Aki seguramente gobierno lo mester bay tuma medida pa cu e maneho y su staff y mas ainda con henter e asunto aki di e supuesto vinculo familiar cu a yega na perhudica e fondo di e magnitud aki.

E ta un situacion hopi tristo pa motibo cu ta placa di esnan cu a traha duro durante hopi aña y awor aki ayega na enfrenta e problema serio aki. Proximamente un actuaris di Curaçao ta bin y hunto cu un consultant local lo duna un presentacion encuanto possible solucionnan of alternativanan pa cu e fondo di pensioen APFA aki.

Valero awo cu propio facilidad di nitrogeno

alex — Thu, 29 Jul 2010 08:01:33 +0000

ORANJESTAD (AAN): Desde cu a anuncia e re-apertura di e refineria trabaonan a cuminsa al instante y asina por a cuminsa nota cu transportacionnan di ekiponan industrial den lunanan di juni y juli a tuma lugar pa refineria Valero.Na 2010 Valero su contract cu e compania cu ta suministra gas pa e unidadnan den e refineria lo termina. Pa por sigui satisface e demanda di e gas nitrogeno pa e diferente unidadnan y cumpli cu e exigencianan di calidad, confiabilidad y normanan di seguridad, Valero Aruba a scoge pa construi su propio facilidad di produccion y distribucion di gas nitrogeno.
E facilidad aki lo tin un capacidad di vaporisacion di 1.92 MMSCFD, cual sigur lo ta un beneficio grandi pa e refineria di Valero. E proyecto di e facilidad di nitrogeno ta encera un inversion di 1.8 miyon dollar pa Valero Aruba Refinery.

E planta ta consisti di dos tanki di almacenahe di nitrogeno di 90 pia cada un, un compressor y tambe un evaporador. E planta aki tambe lo tin su area di control unda lo ubica e componentenan electrico, instrumentacion y di comunicacion cual lo sirbi como e area di operacion.

Ora esaki ta completa lo ta posibel pa monitorea e unidad remotamente. Ademas, e refineria lo bay tin dos truck di tanki di nitrogeno pa suministra e gas na e unidad y areanan cu no ta conecta riba e red di nitrogeno di e refineria.

Contratistanan local, Albo Aruba y Customs Contractors ta envolvi den e fase civil di e proyecto mientras De Cuba Electrical Contractors tin e instalacion electrico bou su encargo.
Actualmente e parti mecanico y di tuberia di e proyecto ta den fase di diseño y lo worde completa segun programa.

E grandura di e ekiponan a pone cu a presenta retonan durante e transportacion y tambe instalacion pero cu guia di oficialnan y cu e team professional cu tin e proyecto aki bou nan encargo a logra esaki.

Ehecucion di e planta a cuminsa na mei 2010 y ta canando segun programa. E planta lo tin un capacidad pa produci 30.000 pia cubico di gas nitrogeno pa ora y 1.200 galon di nitrogeno likido pa dia.

E proyecto ta worde ehecuta conhuntamente cu OXICAR kende ta e compania cu a suministra e ekiponan y cu lo tin e futuro operacion di e facilidad nitrogeno. Pa metanan administrativo y operacional di e facilidad, OXICAR a establece un compania local subsidiario cual ta GASTECH.

Esaki ta solamente un di e diferente proyectonan grandi cu ta actualmente andando den e refineria. Valero na su turno ta keda motiva y stimula tur su trahadornan y contratistanan pa duna nan aporte di semper pa haci e re-apertura di e refineria uno safe, sin ningun incidente y percura pa proyectonan cana segun nan programa pa asina haci e re-apertura di e refineria dia 1 di September 2010 un realidad.

Doño di trabao mestercubri trahador di exterior cu seguro priva y no AZV

alex — Thu, 29 Jul 2010 07:52:43 +0000

TOPA
ORANJESTAD (AAN)* Segun Rene Bernabela di sindicato TOPA, imigracion ta causante di gastonan innecesario pa AZV. Mester pone pa condicion di trabao cu e trahador cu ta bin di exterior, e doño di trabao mester paga un seguro priva pe. No por ta asina segun sr. Bernabela cu e trahador for di exterior ta bin pa un tempo pa traha na Aruba y inmediatamente por haci uso di seguro general AZV. Esaki no ta cuadra mirando cu no sa si e persona aki por tin enfermedad latent. Mescos cu e animeermeisjesnan cu nan ta bin cu nan thorax y otro rekisito medico y prome cu bay traha ta worde rigurosamente examina atrobe, asina ey mester por haci cu tur otro trahador cu ta bin for di exterior.
Of sea e doño di trabao ta pone un deposito como back service den caso di emergencia. No por ta asina cu e personanan aki por haci uso di AZV sin mas, mester adapta nos leynan di AZV pa pone esakinan bon cla.

Awor ta parce cu diripiente AZV ta dispuesto pa duna tur cifra possible pero prome cu e dialogo social esaki tabata dificil y hasta a haci pregunta si tin jaarrekeningen cual a bisa di no tabata disponibel.

Cifra ta hopi importante mas aun cu e meta di AZV ta pa controla e gastonan cu a bin ta duplifica y triplifica y ya e comunidad no ta dispuesto mas pa paga sin haya e servicio cu e tin derecho riba dje den cuido medico. Hospital tambe mester worde revisa na unda cu mester bay stipula e tarifanan pa e diferente handelingnan den cuido.

Cuatro sindicato a distancia nan mes di S.d.U.

alex — Thu, 29 Jul 2010 07:43:28 +0000

Pregunta awor ta si S.d.U. tin derecho di existencia?
ORANJESTAD (AAN):— Cuatro sindicato a distancia nan mes di S.d.U y a lag e pregunta awor cu si S.d.U. tin derecho di existencia ainda.Relaciona cu e dialogo social cu ta tumando lugar, desacuerdo riba diferente punto y issue a bira conoci.Entre otro pa loke ta APFA di cual funcionarionan di gobierno ta sperando riba pensioen, tin cu bin tende awor cu cos a cambia y cu probablemente despues di aporta practicamente henter nan carera awor nan lo bay ricibi menos.
Tambe loke sindicatonan TOPA, SPA, SIWA y esun di casinowezen ta cuestiona ta e hecho cu Simar via representacion di Ivo Valdez como vocero di SdU, ta forma parti di e comision di supervision y no a informa e sindicatonan cu ta representante nan di funcionarionan di gobierno cu ta den APFA.
Es mas. Tin acusacion cu ora cu sindicato TOPA a pidi e rapport cu Banco Central a traha contra di APFA na unda a sali na cla den con mal estado e fondo ta, sr. Valdez a bisa cu ta algun regla skirbi tin den e rapport di Banco Central, hacienda comosifuera cu e no tin nada di contenido di importancia.

Sindicato TOPA a logra haya e rapport aki y eynan a bin na claridad kico a sosode cu e fondo aki/
A resulta cu 240 miyon, cu ta casi mitar di e fondo, a wordo mal inverti den exterior.

Sindicatonan ta puntra con por ta possible cu SdU no a informa su miembronan, cu ta e otro sindicatonan of scucha e achterbaan, pero ta vocifera opinionnan propio cu no ta na beneficio di e funcionarionan di gobierno y cu e sindicatonan no por para su tras..

Entre otro tin indicacion cu e maestronan di school ta wordo conseha pa SIMAR pa nan bay cu vervroegd pensioen y despues wordo tuma bek na trabao via contract. Kico di berdad tin di esaki, nos di redaccion di DIARIO no sa, pero den un entrevista mas laat awe nos lo tende for di e presidente di SIMAR kico tin di berdad di e acusacionnan aki.

Hecho ta cu e fondo di pensioen di APFA ta den estado critico y si no tuma accion esaki lo cay den otro. Pa loke ta e fondo aki riba su mes, con e gobierno anterior no tabata sa kico tabata pasando cu placa di sudor di trahadornan cu pa añanan largo fielmente a contribui na un fondo pa disfruta di un pensioen bon mereci y awor ta bin tende cu e fondo aki ta den problema.

E friccion den SdU a conduci cu e sindicatonan TOPA, Spa, SIWA y Casino Wezen a distancia nan mes for di SdU y ta untra awor si SdU tin derecho di existencia?

Tur Comisario y mando policial ta bay bao mesun dak!

alex — Thu, 29 Jul 2010 05:36:59 +0000

Entrante 1 di Augustus:
ORANJESTAD (AAN) — Den entrevista cu Alto Comisario Dolfi Richardson, el a duna di conoce na nos redaccion, cu un di e prome pasonan cu lo wordo duna, ta pone tur e Comisarionan y Alto Mando bao di mesun dak. Manera ta conoci, actualmente nan ta parti den Distrito, y vooral e dianan aki cu nan ta reuniendo hopi y na comienzo di e contacto entre nan mester mas cerca di otro. Alto Comisario a señala cu e personal di Cuerpo Policial ta mirando caba cu cada siman nan ta hopi den reunion cu otro, pa asina nan delinea nan maneho y yega riba e mesun frecuencia, cu ta algo esencial.

Richardson ta haya cu esaki ta un condicion indispensable pa nan tur ta bao di mesun dak y cerca di otro. Atrobe riba e tema di su maneho pa mehora e prestacion di Cuerpo Policial, señor Richardson a bisa cu tin un estructura den preparacion, pa re-introduci un di tres Comisario.

Asina lo tin Comisario pa Cuerpo di Recherche, Comisario pa Asuntonan General, y lo bin back cu Comisario pa Asuntonan Special (bijzondere diensten) cu ta e funcion bieu cu señor Krozendijk tabata ocupa, prome cu e baymento di sra. Hassel na Sint Martin.

“ Mi ta kere cu asina nos por ta mas eficiente pa nos por atende cu e tareanan cu ta wordo rekeri di nos. Pero esey tin cu wordo aproba ainda. E ta un proposicion cu lo sali di mi banda y mester haya aprobacion di Conseho di Minister”, Alto Comisario Richardson a señala.

Riba e pregunta si ta asina cu señora Trudy Hassel lo bira su man drechi, señor Richardson a expresa cu e y sra. Hassel tin un pacto.

“ Nos ta bisa cu nos lo sostene otro pasobra esaki tin di haber cu Aruba, e no tin di haber cu Dolfi Richardson ni señora Hassel, pasobra ya caba nos a palabra cu henter e Alto Mando cu nos lo sali como un team.

Solamente cu cada team mester tin un capitan pa dirigie pa zorg pa e procesonan bay manera nos a palabra. Pero e support di sra. Hassel tey y ya caba nos a priminti otro esey, y nos ta bay pe!” Alto Comisario sr. Richardson a señala.

El a agrega cu esaki ta un bentaha den sentido cu nan tur ta bin di mesun opleiding y di mesun area.

“ Esey kiermen cu nos formacion ta casi mesun cos. Cu otro palabra nos ta papia e mesun idioma, y mi no ta papiando di Papiamento, sino di e raiz di nos filosofia cu ta casi mesun cos. Esey ta haci e maneho y e acercamento cu otro mas facil”, Richardson a subraya.

Homber a refugia den sala di parlamento debi cu dos homber a menace cu arma di candela

alex — Thu, 29 Jul 2010 05:34:45 +0000

ORANJESTAD (AAN): Un informe cu a hala nos atencion ta relaciona cu un yamada cu a drenta via Central di polis. E persona cu a yama central ta bisa cu un homber a core drenta den sala parlamento. Segun e informe e homber a expresa cu tin dos homber a menase cu arma di candela. No tabata tin mas informe adicional relaciona cu yamada. Si enberdad e persona drenta den e edificio y si ta via porta dilanti of na banda y tambe si e unidad a presenta y a atende e homber en cuestion.
A busca mas informe relaciona cu e yamada, pero esfuerzo pa por a haya mas informacion concreto tabata imposibel.

E yamada a worde registra riba diamars merdia. Lo sigui busca mas dato relaciona cu e informe policial.

Tin hende cu kier crea e impresion cu Brandweer ta completamente na werki

alex — Thu, 29 Jul 2010 05:33:46 +0000

Segun Minister Dowers,
ORANJESTAD(AAN): Diaranzon DIARIO a entrevista Minister Arthur Dowers, tocante e situacion cu ta reina na Brandweer. Segun e mandatario el a ricibi dos carta, di cual uno ta un carta cu e sindicato SINBA a manda pa comandante di Brandweer y e otro ta un carta cu nan a manda pa e Minister mes. “Mi intencion ta en todo caso pa combersa cu SINBA dentro di algun dia, pero como Minister responsabel pa seguridad pa loke ta trata Brandweer, lo mi hayami toch den e oranan cu ta sigui, ta papia cu e personal di Brandweer”.
Esaki segun Dowers, kende a sigui bisa cu e ta realiza cu e informacion no ta yega corectamente na e personal. “Mi ta haya hopi lamentable cu cada biaha di nobo ta crea y ta duna informacionnan incorecto”. El a duna un ehempel di esaki.

Segun Minister Dowers, el a tende cu Brandweer a keda 6 aña sin haya uniform nobo.
“Awor mi ta puntra mi mes, ki sorto di uniform bo tin, pasobra hopi bon nan mester ta pa nan wanta 6 aña”.

“Dicon despues di 2 of 4 aña bo no ta bisa nada”, Dowers a sigui bisa. Awor ta warda 6 aña, pa despues cuminza cu un accion di morocoy, pasobra bo no a haya uniform. Mescos ta conta pa otro material.

E Minister a bisa cu na e momentonan aki ta order diferente material y tin diferente proceso interno andando den Brandweer. Na dado momento nan ta hasi nan peticionnan y esaki ta wordo paga door di Gobierno.

E Mandatario a sigui bisa cu ta imposibel cu den un organizacion manera Brandweer, nan no sa cu nan mester cumpra uniform pa e trahadornan y cu 6 aña a pasa sin cu nan a haya uniform.
Dentro di poco ta bay bin un investigacion den Brandweer, caminda cu lo laga un accountant hasi un analisis di tur e procesonan aki y ta bin tambe un experto pa hasi un analisis di e calidad di e material.

Esaki ta necesario, pasobra tin hopi informacion cu ta sali for di Brandweer cu no tur ora ta cuadra cu berdad. Segun e Minister, tin hende ta purba crea e impresion cu Brandweer lo ta completamente na werki, siendo cu otronan cu ta traha den Brandweer ta bisabo cu esey no ta e caso.

Belasting a pone beslag riba salario di hopi trahador!!

alex — Thu, 29 Jul 2010 05:28:59 +0000

Hopi a bay reclama masha rabia mes:
ORANJESTAD (AAN) — Informacion cu a yega nos mesa di redaccion ta indica cu, diamars cu a pasa, un cantidad grandi di pagadornan di impuesto a bay Belastingsdienst, pa reclama cu nan a pone beslag riba nan salario. Segun versionnan, nan no a wordo notifica di nada cu anticipacion y ta djis e doño di trabao a haya e papel cu opdracht pa kita 1/3 parti di salario, y esaki a sosode cu hopi trahador tanto di sector publico como priva.
Tin hende cu a haya cobranzanan mas halto cu 100 mil florin, cu no tin propiedad, cu no tin cas propio, cu tin hopi pero na debe pa paga! Nan mester a bay reclama na Oficina di Impuesto, pero tanten cu no haya sa e pakico, ni a base di kico tal cobranza e dunador di trabao tin cu kita e di tres parti di salario.

Y nan pregunta ta: nos lo haya e placa aki bek tambe di biaha? Hopi hende no ta compronde con e calculacion ta wordo haci na Belastingsdienst, y ta parce cu tabata tin hopi rabiamento den e lugar, y hopi ta esnan cu tabata vocifera cu si ta asina Ontvanger ta kita placa di trahado, anto mehor nan keda cas sin traha, y bay busca onderstand!

Sindicatonan ta pidi pa Fundacion Cas y Asociacion di Seguro forma parti di dialogo social

alex — Thu, 29 Jul 2010 05:26:52 +0000

ORANJESTAD (AAN)* Mientras cu mayan ta e deadline pa e dialogo social, e sindcatonan lo kier mira presencia di Fundacion CAS y Asociacion di seguro forma parti integral di e decisionnan cu mester worde tuma. Nan lo trece mas participacion y un spectrum diferente di e temanan cu ta worde discuti. E ainda gobierno no a duna di conoce si a cuminsa tramitenan pa cu e investigacion di un actuaries for di Hulanda. Ta asina cu e sindicatonan kier mira un decision clave cu lo bay revisa pago na specialista, docternan di cas, botica y otro servicionan cu a pone cu desde introduccion di AZV envez cu e gastonan a redobla y hasta triplifica.
Si mira por ehempel e sistema cu e docternan ta worde paga incluyendo tur nan gasto di practica mas pa cabez ta pone hende kere cu sinterklaas a keda biba na Aruba. Pagonan pa cada patient pa dia den hospital, na Aruba so e docter ta haya pago sin cumpli cu su obligacion y responsabilidad di haci visitacion regular serca e patient.

Den e sistema di cuido medico ta cada specialista pa su cuenta, aki aya ta haya algun cu ta traha cu otro pero den mayoria caso cada ken ta salvaguarda su propio interes riba interes y derecho di patient.

Pesey ta importante pa Fundacion Cas cu ta salvaguardia e derecho di patient den dialogonan social. Kico ta e motibo cu gobierno a kere cu den forma di tripartite por soluciona cos mientras no tin otro gremionan envolvi cu ta un plataforma mas hancho y mas transparente.

Vocero di SdU a laga sa cu no ta papia cu prensa encuanto e reunionnan di dialogo social esey ta algo cu no ta democratic pasobra un man yen di hende kier bay tuma decision pa un pueblo sin consulta cu e pueblo of duna cuenta na e pueblo. Esaki no por worde acepta sin mas.

Mester revisa AZV di comienzo te awor aki y tur areglo lucrative cu a sera riba custia y sufrimento di pueblo, revoca y cu un sistema pagable y husto. Gobierno den esaki tin un rol importante pa expande e plataforma den un dialogo social na unda cu enberdad tin participacion maximo di diferente grupo den nos comunidad.

Pa loke tae fondo di pensioen di APFA cu a resorta bao di responsabilidad di ex-minister di Finanzas aki parlamento lo mester tene un enquette pa sa kico a pasa y ken sa kico y con por a permiti tanto capital cu ta 240 miyon Florin sin mas worde inverti sin mas riba bolsa internacional mientras cu awor tin tata y mama di famia cu ta pensa di bay disfruta d un pensioen cu nan a aporta y traha duro pe kizas no tin placa pa na worde paga.

Con ta yega na e bestaandsminimum y con mas leu e pueblo tin cu aporta na bari sin bom of hiba awa pa laman. Ta worde cuestiona si enberdad tin solucion of ta djies usa sindicato pa schuif mas peso riba lomba di pueblo of enberdad kier revision di tur e fondonan social pa asina tin transparencia den maneho di e fondonan aki.

E sindicatonan ta desea participacion di asociacion di seguro den e dialogo y asina aki por yega na acuerdonan fiho basa riba structuranan cu ta worde usa caba of conhuntamente yega na otro horizontenan.

Ya caba tin disunion den seno di SdU na unda cu 4 sindicato a dicidi di bandona e fila di e grupo di sindicato aki. Esaki pa motibo cu nan ta haya cu e vocero di SdU no a pasa informacion tocante kico ta pasando den APFA, pero a keda keto y no kier a comparti e rapport di Banco Central na unda cu a publica e situacion precario di e fondo aki.

Ta di spera cu loke ta worde conclui den e dialogo aki ta perhudica e pueblo aun mas sin cu a usa un base amplio pa carga e cambionan cu tin cu tuma lugar. Pueblo mester ta conciente cu no sin mas ta core tira consecuencia riba lomba di e trahador of pueblo mientras cu realmente no tin e boluntad di cambia loke ta malo y pa bisa cu awor ta e momento pa e cambio na bienestar di e pueblo tuma lugar.

Siomara Everon ta join 100.9 Hits100FM

alex — Thu, 29 Jul 2010 05:13:10 +0000

ORANJESTAD (AAN): HITS100FM cu actualmente ta birando un di nos radio emisoranan mas scucha pa su excelente musica di greatest hits y hitnan nobo continuo y su noticieronan, awor ta amplia su personal cu un talento mas esta Siomara Everon. Siomara a sa di crea su imagen atravez di añanan por medio di su perseverancia y pasion pa periodismo y comunicacion en general. El a cuminsa na Canal 90 na aña ‘96 y despues a traha tambe como sales executive y redactor na e matutino Bon Dia Aruba . Na ‘ 96 Siomara a traha den e sales department di ATV15 durante weganan Olimpico. Na 1998 Siomara a cuminsa presenta y produci su mesun programa periodistico investigativo “Actualidad” cu a dura 2 aña na Tele Aruba.
Varios oferta a presenta den ‘98 caminda cu Siomara a worde acerca pa bay traha como presentado di noticia na ” Magic FM”, aki Siomara a traha te cu aña 2000. Despues el a haya oferta pa forma parti di redaccion di matutino Diario y revista Hola Aruba, aki Siomara a a traha exitosamente te cu 2009 casi 10 aña.

Na aña 2000 Siomara a bay forma parti di e team di noticia di Tele Aruba como news anchor y ta tambe ta presenta shownan live manera ” Magia di Pasco ” hunto cu Ivo Yanez y tambe ” Sparkling Tour” y Eleccionnan di Reina di Carnaval. Tambe Siomara ta host di Sorteo Nacional di Lotto pa Deporte.

Awe Siomara Everon ta productor y host di e show di mainta “Nos Mainta” na Telearuba. Atravez di añanan Siomara a logra su titulonan den ramo di periodismo na Aruba na Universidad di Aruba “Curso Nacional di Periodismo” acredita pa gobierno di Aruba, curso di Papiamento, curso “Comunicacion den Salubridad public” y ta voluntario te awe den Fundacion Telefoon pa Hubentud y den proyectonan pa recauda fondo pa Kankerfonds.

Awor Siomara ta acepta un reto nobo pa bira “News Producer y Anchor “di e emisora nobo 100.9 HITS100FM. Siomara lo ta encarga cu e noticiero di merdia “AWE MERDIA” y un programa nobo “100% Lifestyle” cu lo pasa durante e Hit Parade di “Casey Kasem 80’s classics American Top 40” diasabra y diadomingo. E team di noticia di Hits 100 ta yama Siomara Everon bonbini y ta dese’e hopi exito.