Archivo di e Categoria ‘General’
Director Medico di HOH dr. Falconi:
ORANJESTAD (AAN) – Matutino DIARIO a entrevista director medico di Hospital dr. Jaime Falconi, tocante su di cien dia eherciendo e posicion aki, cu e ta yama mas bien “Pacienten Zorg”. El a cuminza pa splica cu aworaki Hospital tin dos director, su persona como director di “Pacienten Zorg” y señor Theo van Kool, cu ta e director financiero. El a señala cu for di un tempo caba esaki ta asina, pero sigur for di momento cu el a cuminza nan a reparti nan tareanan debi cu basta trabao tabata tin pa ehecuta.
Dr. Falconi a indica cu señor de Kool tabata no solamente pendiente pa keda cla cu e relato anual di aña 2010 y 2011, pero Hospital ta introduciendo hunto cu AZV, un sistema nobo di bekosteging di Salubridad.
ORANJESTAD(AAN):– Diferente caya na Noord cu ta carga nombernan exotico di piedranan precioso manera Rubi, Esmeralda y Opal a wordo asfalta cu acera y klinkers.
E cayanan a bira un gusto pa core riba nan, despues cu nan tabata di santo cu buraconan grandi na unda awa tabata keda para ora di yobida. Esaki tabata un molester grandi, malo pa e autonan y e awa para tabata forma un criadero di muskita.
Gabinete Mike Eman ta trahando duro pa cayanan rond di Aruba wordo drecha y unda mester asfalta construyendo tambe acera cu klinkers.
ORANJESTAD (AAN): Ladronicia di koper ta lantando cabez. E daño y gastonan cu nan ta laga atras ta algo increible unda nan ta horta e koper. Dialuna marduga Canal 90 tambe a bira victima. Den Companashi den Edisonstraat tabata tin ladronicia cu a tuma lugar. Aki a kita tubonan di koper y bay cu un airco tambe. A los e airco for di oranan mas trempan y despues a pasa coy esaki bay cune. Investigacion a conduci na e lugar unda e hiba e material. A bin haya e cosnan na un cas conoci pa polis den Edisonstraat. A haci detencion. E cas aki na varios ocasion ta tende di dje pasobra ta haya hendenan ta bin bende cos horta. Koper ta un di e cosnan mas bendi na e cas. Te hasta sa kima koper na e cas y polis sa haya informacion.
Berdad ora recherche y polis a yega a haya e cosnan horta. Ta spera cu por tene e hendenan aki sera.
ORANJESTAD(AAN): Diabierna anochi Kamer van Koophandel a tene su cena anual y debate cu tabatin como tema “Futuro di Aruba sin refineria”. Prome Minister Eman tabata invitado na e cena aki y despues di a scucha e argumentonan di algun orador pa kico Aruba no mester ta enfoca riba mantene e refineria habri, el a tuma palabra y a bolter e tono negativo cu tabata reina den uno positivo. Na un manera tremendamente bon argumenta y bayendo back den tempo Eman a hala atencion di Kamer den e forma excelente cu e ta domina. Kamer van Koophandel no por kere cu awe e ta bin cu un debate pa bisa cu Aruba no mester di un refineria, pero mas bien un clean up, mientras cu semper ta e propio Kamer a opone limpiesa di e lugar ora cu Lago a cera su portanan.
Ki berguenza!
ORANJESTAD (AAN) – Ta tristo cu mester haci un critica, siendo cu e Santo Sacrificio di Misa na Misa Birgen di Fatima, di 10’ or di mainta tabata asina bunita, y e Sacerdote a expresa palabranan cu a yega na alma. E critica a bin for di algun persona cu tabata para patras, den e porta principal, pasobra e templo tabata completamente yen y mester a pone stulnan extra pa mas feligres por a sinta.
Informacion cu DIARIO a haya ta cu tres señora a pleita pa un stul, y nan a desconcentra algun di e personanan cu tabata sinta patras, cu na dado momento a perde e hilo di locual e Sacerdote tabata bisa. Tabata tin un par di hende muher tambe (lamentablemente) cu a dedica nan mes na papia cu otro y hari strobando otronan tambe, locual a wordo mira como un falta total di respet.
Ritz Carlton a yega punto di mas halto!
ORANJESTAD (AAN): Recientemente Minister di Turismo, Transporte y Labor, Otmar Oduber papia riba e crecemento cu Aruba ta pasando aden en coneccion cu cambernan di hotel. E mandatario a splica cu su Gobierno a hereda un situacion unda cu Aruba tabatin algo mas cu 4 mil camber cu mester a bin debi na e diferente permisonan cu a worde otorga door di e mandatarionan anterior. Den 2 aña y mey pueblo por mira cu e 4 mil cambernan aki no a worde construi danki na e empeño di Minister di Infrastructura como tambe Minister di Turismo cu a logra cancela varios di e acuerdonan cu e Gobierno anterior a laga atras, mientras cu a acorda cu otronan lo bin den un lapso di tempo mas largo. Di e forma aki a evita cu nos comunidad a haya su mes confronta den un termino hopi cortico cu 4 mil camber adicional, algo cu sigur no ta na beneficio di desaroyo di nos isla.
ORANJESTAD (AAN): Mas cu dos aña a pasa y ainda ministerio publico no a logra di pone esnan cu a comete corupcion na gran escala responsabel pa loke nan a haci. Un team di experto Hulandes a bin Aruba pa studia e estado di nos gobernacion y ariba tur e casonan cu AVP a bati den campaña nan a constata iregularidad serio. Casonan cu pa tur hende cu dos dede di sinti tabata casonan di corupcion directo cometi door di gobernantenan. Terenonan miyonario cu a worde duna na sponsornan di e ministronan. Contratonan di huur di hopi placa a worde duna na famianan sin lo minimo di respet pa nos ley y reglanan. Placa a worde horta directamente door di duna famia y amigo contratonan pa hopi mas Florin cu tabatin servicio envolvi. E caso di mas cu 10 miyon Florin cu a worde horta door di un amigo intimo di un di e ex ministronan. Den e caso aki e ladron directo a fayece na un manera sospechoso y e ministro cu tabata amigo di paranda pero tambe hefe di e ladron no a worde persigui.
Minister Mike de Meza
ORANJESTAD (AAN)* Diabierna ultimo a tuma lugar e dinner annual di Camara di comercio Aruba sin refineria. Esnan cu ta oradornan cu tabata den persona di sr. Harold Malmberg, señora Audrey Lacle y sr. Milton Berlinsky a trece nan pensamentonan rond di loke ta pasando. Entre otro a trece padilanti cu 27 aña pasa ora cu lago a sera su portanan mester a pensa mas leu cu existencia di e refineria na Aruba. Señora Audrey Lacle a mustra cu aunke cu e seramento di e refineria tin efecto riba nos GDP, e problema real di Aruba ta basa riba salud di e pueblo, na unda cu casonan di cancer a aumenta drasticamente y cifranan di asthma, e polucion a haci cu ta na Aruba so a permiti e refineria opera causando daño na nos medio ambiente.
Otro punto cu a resalta ta cu e gobierno no a duna informacionnan relaciona cu e negociacionnan cu PetroChina y di Valero. Esaki tin como consecuencia cu a afecta e confianza di e consumidor pa sigui cumpra y asina laga e economia sigui draai.
ORANJESTAD(AAN): Unidad mobil acompaña pa unidad canino a sali for di warda di Playa algo prome cu mey anochi diabierna y diasabra y planta respet riba caya. Un concepto nobo cu Cuerpo Policial a introduci pa e weekend aki yena di actividadnan.
E anochi a bay relativamente trankilo y a produci un total di 7 detencion. Turista y local a keda deteni pa sea mal comportacion y stuur bou influencia. Diasabra anochi e accion lo sigui pa garantiza seguridad di nos pueblo.
Turistanan tabata impresiona pa e presencia masivo di Polis den Hot Zone. Mas di 30 polis uniforma den nan polo shirt blauw skur a planta respet na salida di clubnan nocturno.
Ta spera cu e concepto aki di Unidad Mobil riba caya lo keda prevalece durante otro fin di simannan druk.
ORANJESTAD (AAN); Mayoria di nos ciudadano nan no sa nos ley nan vigente y e consecuencia den e caso aki comete maltrata persona den grupo, ta un delito serio y ta colga 6 aña di castigo riba cabez di esun meti. Diabierna pa alrededor di 10’or, patruya di oranjestad ta pasando altura di Maria College MAVO y nan a worde para pa un señora. E señora a declara cu su yiu homber di 15 aña a worde maltrata pa un grupo di mucha homber. Polis a intermedia entre e partidonan y tambe den presencia di cabesante di e school concerni. Parce e a surgi problema entre e mucha homber di inicialnan C.A.B. y otro colega di e klas cu ta e mucha homber J.E.H.C. di 18 aña di edad cu caba biaha nan tin interambio di palabra cu otro.
ORANJESTAD(AAN): Dilanti un bar na e skina di Hendrikstraat cu Koningstraat Polis a haya droga na un homber di inicial M.W. Polis a para e sospechoso den su Buick cu number A-1452.
Autoridad a listra e auto completo y confisca esaki tambe. E homber M.W. tabata tin varios saco chikito di droga den su posecion. A transporta e homber pa warda di Playa.
E detencion aki tabata parti di accion di unidad mobiel cu durante fin di siman a tira varios control riba caya y tambe bar y clubnan nocturno.
ORANJESTAD(AAN): Cuater homber te ainda desconoci a ataca y maltrata guardia di seguridad y despues nan lo a bente den laman for di un pier den area di Hyatt Regency.
E caso a wordo reporta, diasabra pa pasa di 4’or di marduga na central di polis.
E cuater hombernan cu a comete e acto ta yen tattoo na curpa, dos di nan tin T-shirt preto y e otro dos nan cu T-shirt blanco. Segun e guardia tres di nan ta papia spaño y uno parce cu ta ingles so e por papia. E sospechosonan via di laman nan a drenta subi tera y a maltrata di guardia Tambe nan lo a horta un boto di rubber cu ta pertenece na Red Sail.
E boto cu cual e cuater suhetonan uza pa yega tera ta color shinishi y chikito. Tambe segun e informe e boto cu nan a uza pa move for di e sitio ta mas grandi y ta di color geel y nan a nabega direccion zuid.
ORANJESTAD (AAN): Recientemente Minister Otmar Oduber a declara cu e resultadonan pa loke ta traha cantidad di pasaheronan den aña 2011 a mira un crecimento di 5.7% cu ta casi dobel di e meta cu a worde poni pa e aña ey cual tabata di 3%.
Minister Oduber a indica cu e resultadonan ta notable y cu e cambionan, embeyecemento y inversionnan den airside cu aeropuerto ta pasando aden lo contribui na crececementonan cu den futuro lo percura pa sigui sobrepasa e metanan cu worde poni.
Aeropuerto no solamente a haci un bon trabao pa loke ta trata e cantidad di bishitantenan sino tambe a haci entrega di un annual report sumamente positivo. E resultadonan aki ta encurasha aeropuerto pa asina sigui cu expansionnan di general aviation.
Accion di rescate riba laman
ORANJESTAD(AAN): Diasabra den oranan di atardi tabata tin un caso di rescate riba lama. Un embarcacion La Chela cu a sali for di waf na Barcadera banda di 3or di atardi a haya su mes den problema serio ora cu e tabata pazuid di refineria. E embarcacion a yena cu awa y tabata casi pa sink. For di patras un ola a dal e boto y yena esaki full cu awa. Abordo tabata tin cuater tripulante cu tabata transportando un total di 200 caha entre whiskey cu cigaria e momentonan ey. Practicamente tur e mercania a bay perdi.
E capitan Rudolfo a bati alarma mesora pa e caso aki y un embarcacion La Margarita cu tambe tabata na Barcadera a sali bay yuda. Despues tambe Kustwacht su embarcacion a yega mesora.
Dama su boca tapa cu duct-tape
ORANJESTAD.(AAN); Atraco a wordo reporta na autoridad, y pesey Diasabra mainta patruya di Oranjestad a presenta na un residencia na Cumana. E señora victima di inicialnan E.P.C. a declara di ta sinta den sala ora un persona ta bati na porta.
Inocentemente el a bay a habri porta y a topa cu un homber y un muher, nan a puntra pa e number di telefoon di e señora cu ta hasi trabao pa denunciante. E señora victima a cera porta y a cana bay direccion camber pa busca su celular, pero el a regresa y a habri porta, y diripiente un di tercer persona a pusha e porta contra dje. Nan a cana bay pafor y un di e hombernan tin un arma di candela den su man y nan ta papia spaño. Nan a pushe, pone duct-tape na su boca y na su mannan. Nan a puntre pa habri kluis y el a hiba nan pa su camber y nan a bay cu hopi holoshi, placa y perfume.
