Diario Online » Judicial

Huez a mustra cu ta Fresnos mes a nenga di firma e acuerdo cu pais Aruba

alex — Fri, 03 Feb 2012 04:43:00 +0000

ORANJESTAD(AAN): Recientemente huez a duna su sentencia den un caso entre e compania Fresnos di Spaña y pais Aruba.
Ta trata di un caso na unda cu Fresnos algun aña pasa lo tabata bay haya e erfpacht di e tereno di ex Bishiri Hotel, pa nan bin cu un hotel 5 strea.
E veredicto di huez a bay na fabor di pais Aruba.
Fresnos tabata exigi pa nan haya e derecho di e erfpacht pa nan construi un hotel riba e tereno, of pa nan haya pago di daño di perhuicio, door cu Gobierno no a duna nan e permiso, riba cual nan ta sinti cu nan tin derecho.
Huez a haci un evaluacion di henter e asunto entre Fresnos, Sol Melia cu lo tabata bay ta e desaroyador di e hotel y pais Aruba.

Ta asina cu na 2007 Fresnos a ricibi for di Gobierno di Aruba e acuerdo pa loke ta e efrpacht.
Sinembargo Fresnos no a firma e acuerdo.

E compania a manda un carta pa Gobierno dia 15 di Juli den cual e ta bisa cu e kier sigui cu e proyecto, pero cu mester haci un estudio prome riba e area rond di e hotel, incluyendo e area di cargo y waf etc.

Fresnos a keda di manda representantenan pa papia cu Gobierno y henter e proceso ey entre e dos partidonan a tarda.

Na September 2009 Gobierno di Aruba a cambia y e Minister di Turismo a manda un carta pa Fresnos indicando cu Fresnos no a firma e acuerdo cu Gobierno di e tempo ey a manda pa nan na Juni 2007 y cu nan no a cumpli cu rekisitonan pa loke ta comienzo di e proyecto.

Door di tur esaki, Gobierno nobo a para tur negociacion cu Fresnos y Sol Melia.
Huez den su sentencia a indica cu como cu e acuerdo no a worde firma, e no por dicta na fabor di Fresnos, pues el a nenga nan peticion di haya e erfpacht for di pais Aruba.

Pa loke ta e pregunta si pais Aruba tin cu paga daño y perhuicio na e compania Spaño, huez a indica cu Fresnos a scxoge pa no firma e acuerdo cu Gobierno a manda pa nan, wardando pa haya mas claridad riba e tereno y e desaroyonan rond di dje.

Segun huez, den e peticion di Fresnos pa haya e tereno di erfpacht pa construi e hotel di 5 strea, nan no a bin cu e condicion cu mester tuma lugar un estudio di e area prome.

Fresnos a papia di haya mas informacion tocante e desaroyonan rond di mudamento di waf, pues segun huez esaki ta condicionnan nobo cu Fresnos ta exigi, despues cu ya caba Gobierno a manda nan e acuerdo pa firma, cu nan a nenga di firma.

Mirando tur esaki, huez a dicta na fabor di pais Aruba y a rechaza ambos peticion di Fresnos.
Banda di esaki e compania Spaño como partido cu a perde e caso, mester paga e gastonan di corte di 1800 Florin.

Si bo no busca abogado, caso lo worde trata sin uno presente

alex — Mon, 16 Jan 2012 05:02:22 +0000

Huez a bisa acusado claramente kico lo bay pasa…
ORANJESTAD(AAN): Guillermo G.P a presenta na corte di husticia Diabierna, despues cu el a worde acusa di ladronicia di un flat screen for di cas di hende na Jaburibari riba 31 di Augustus.
Fiscal a indica cu e procesverbal di e caso no tabata cla ainda y pesey el a pidi pa pospone tratamento di e caso te cu dia 17 di Februari.
Mirando cu e acusado no tabata tin un abogado, huez a puntre si el a regla pa e haya uno.
El a bisa cu el a kere cu huez mes a regla esaki pe.
Huez a indica cu den KIA tin un lista di abogado y cu e por yama uno pa wak si e por defende.
G.P a bisa huez cu e no tin carchi di telefon pa e yama na KIA.
Huez a duna nomber di e persona cu kende e tin cu papia, pa asina e haya chens pa uza e telefon.
Na final e huez a bisa cu si e no regla un abogado, e caso lo worde trata sin abogado.

E acusado a bisa huez cu for di algun tempo caba el a ofrece pa paga pa e television cu el a admiti di a horta, pero cu el a worde nenga esaki.

El a pidi tambe si e por haci trabao pa comunidad, pa asina e por a Sali caba pa yuda cria su nieto, mirando cu pareha di su yiu muher a bay Hulanda lage atras cu e yiu.
G.P a indica cu e peticion ey tambe a worde rechaza.

Huez a bisa e acusado cu e no por lage bay prome cu tratamento di e caso.
E huez a splica cu el a admiti di a comete e crimen y mirando tambe cu den pasado na varios occasion el a cay cera caba pa mesun tipo di crimen, tin chens cu si e Sali quizas e lo por comete mesun tipo di crimen atrobe.

Pesey huez a bise cu e tin cu keda den detencion preventivo, te ora cu e caso bin dilanti dia 17 di Februari.

Casonan pro forma Diabierna na corte

alex — Thu, 12 Jan 2012 05:08:21 +0000

ORANJESTAD (AAN): Diabierna tur e casonan ta corte di husticia ta pro forma
E prome caso ta un caso den cual O.O.C.H ta worde acusa di a menaza un y/of cuatro persona cu un crimen contra nan bida riba 23 di October 2011, door di saca un revolver na un forma intencionalmente menazante y/of a mustra nan esaki y/of a tene e revolver un of mas biaha contra cabez di un di nan y/of a grita nan cu e lo tira nan mata.
Tambe e ta worde acusa di tabatin un arma di candela y bala den su posesion riba 23 di October 2011.
E siguiente caso ta un caso den cual K.L.H. ta worde acusa di a dal un persona varios biaha cu un bara di hero riba su cabez riba 7 di October 2011, cu e intencion di tuma su bida.
Despues E.J.L.-A.-N. mester presenta dilanti di huez tambe, debi na e hecho cu e ta worde acusa di posesion di un arma di candela y un scopet y bala den e periodo di 18 di Augustus 2011 y 20 di Augustus 2011.

Penultimo caso Pro forma ta un caso den cual G.G.P. ta worde acusa di ladronicia den un cas di flat screen di un persona riba 31 di Augustus 2011.

Ultimo caso Pro forma Diabierna ta un caso den cual P.G. B. ta worde acusa di, conhuntamente cu un otro of otronan, importacion y/of posesion di marihuana riba 26 di October 2011

Hueznan ta haci nan best pa duna sentencia mas lihe den casonan cu tin prioridad

alex — Wed, 11 Jan 2012 05:05:25 +0000

Deken di Abogado mr. Rudy Oomen:
ORANJESTAD (AAN) – DIARIO a entrevista mr. Rudy Oomen, Deken di Abogado, tocante e retraso cu tin den sentencianan den Corte. Meester Oomen a comenta cu berdad tin retraso vooral den sentencianan di casonan civil, pero esaki no ta algo nobo sino di tur tempo y cu no ta di Aruba so, pero e ta sosode na Hulanda y Curacao tambe. Pero si ta asina cu e ultimo añanan retraso ruba sentencianan di casonan civil a aumenta y motibo por ta varios pero mr. Oomen no ta facil p’e defini exactamente kico nan ta, pero hecho ta cu Corte tambe ta wak e problema aki.
El a señala cu e Hueznan ta haciendo nan best pa “catch up” pa e retrasonan bira substancialmente mas chikito.
Ordo di Abogado tin encuentronan frecuente cu e Hueznan y entre otro, e topico aki tambe ta bin dilanti y nan ta convenci cu e Hueznan ta trahando duro pa minimiza e problema.
Señor mr. Oomen a agrega cu Ordo di Abogado tin un palabracion cu e Hueznan, unda cu un abogado cu ta mira cu e retraso den e caso cu e ta tratando por perhudica specificamente su cliente, of e caso cu e ta maneha, e por manda un carta pa Corte pa e mustra e Huez riba e problema specifico cu e tin cu e retraso, pa e ora ey su Caso haya atencion special y pa e sentencia worde duna cu prioridad e ora ey.

Dos bez pa aña e Ordo di Abogado completo, y no e Deken so, ta reuni cu Hueznan y eyden nan ta trata diferente topico, ademas di e asunto di retraso den sentencia.
El a reitera cu e Hueznan ta haci nan maximo esfuerzo pa sentencianan cu a keda drumi mucho tempo worde conclui.

El a pone enfasis cu tin cierto casonan (y tur abogado sa esey tambe) cu si segun e abogadonan merece di mas prioridad nan por hala atencion di Corte via un carta y e Huez lo haci su best pa duna sentencia den e caso specifico ey.

Casonan penal den corte awe

alex — Thu, 15 Dec 2011 05:00:48 +0000

ORANJESTAD(AAN): Awe na corte ta bay tuma lugar diferente caso penal.
E prome caso ta un caso den cual J.G.M. ta wordo acusa di a intencionalmente maltrata un persona riba 21 di April 2011, dor di dal e varios biaha cu mokete den cara, dor di cual e persona a resulta herida y/of a sufri dolor.
Tambe e ta wordo acusa di buracheria den publico riba 21 y/of 22 di April 2011.
Despues ta bay tuma lugar un caso den cual J.M.C.L.R. ta wordo acusa di malversacion y falsificacion di documento na 2009
Penultimo caso awe ta un caso den cual B.G.O. ta wordo acusa di como chofer di un auto riba 27 di Februari 2008, a comporta su mes di tal manera den trafico cu tabata su culpa cu a tuma lugar un accidente riba caminda grandi di San Nicolas pa Playa na haltura di Garashi Cordia, dor cu el a core asina sin cuidao y/of sin paga tino y/of sin tene cuenta y cu velocidad halto y a slip y/of a perde control riba stuur y/of a core riba banda robez di caminda y a bay dal den un taxi cu tabata bin di direccion contrario, dor di cual un persona a wordo mata

Ultimo caso ta un caso den cual J.d.L.C. ta wordo acusa di a comete actonan sexual indebido cu un menor den e periodo di November 2008 te Februari 2009.

Edgar R.C declara liber di abuso sexual riba mucha

alex — Sat, 10 Dec 2011 04:47:04 +0000

*segun huez, pa ley declaracion di e victima so no ta suficiente
ORANJESTAD(AAN): Diabierna na corte di husticia, huez a duna su veredicto den un caso den cual Edgar R.C a wordo acusa di a comete actonan indebido cu un mucha di alrededor di 5 aña.
Esaki lo a tuma lugar rond di aña 2004 na Hulanda. Ta asina cu e mucha muher a bin dilanti pa bisa su mama na 2009, cu diripiente el a corda cu Edgar kende tabata amigo di e famia na Hulanda, a mishi cune na su partinan priva na un manera indebido.
Edgar C. a wordo deteni y algun luna atras su caso a wordo trata.
Riba dia 9 di September huez a duna un decision parcial, unda cu el a pidi pa tende algun testigo mas den e caso. Huez Diabierna a bisa cu e no ta haya cu tin suficiente prueba pa condena Edgar pa comete actonan indebido cu e mucha.

Segun huez, e declaracion di solamente e mucha no por wordo considera suficiente evidencia.
Pa ley mester tin mas indicacion, declaracion of evidencia pa por yega na un condena.
El a splica cu locual e mama a declara pues cu comportacion di su yiu a cambia bastante, no necesariamente mester tin di haber cu abuso sexual. Huez pues a declara Edgar C. liber di tur acusacion y a ordena pa e wordo libera Diabierna mes.

Caso di droga pospone te cu Februari

alex — Wed, 30 Nov 2011 05:04:36 +0000

ORANJESTAD (AAN): Recientemente e Colombiano Alfonso R.L biba na Venezuela a presenta dilanti di huez, debi na e hecho cu el a worde acusa di exportacion di cocaina di 4 pa 6 di September 2011.
Mirando cu no tabata tin espacio pa trata e caso, fiscal a propone dia 10 di Februari pa haci esaki y huez a bay di acuerdo.
Huez a pospone e caso te cu e fecha ey y el a pidi fiscal pa e dossier worde drecha debidamente.

Haci peticion di “draagkrachtmeting” pa baha e suma ta un derecho existente

alex — Mon, 28 Nov 2011 05:01:27 +0000

Den caso di dificultad pa paga IBG:
Lider di PDR mr. Bikker ta splica
ORANJESTAD (AAN) – Tin varios persona cu ta acercando Fundacion Pro Husticia en busca di conseho huridico debi cu nan tin problema cu e debe y cobranza di financiamento di estudio cu nan a adkiri cu IBG, tempo nan a studia na Hulanda. Parlamentario mr. Andin Bikker a splica cu door di aspecto di Euro, y kizas cu nan no a haya e trabao cu nan no a haya na Aruba, nan tin varios problema pa paga e debe aki. E Parlamentario a señala cu ora di revisa e cobranzanan aki, por ripara cu tin discrepancia ta tumando lugar, cu den su concepto ta inaceptable.
Tin e caso di un persona cu pa un suma di cinco mil florin cu e debe ainda IGB ta cobre casi 18 porciento na “buitengerechtelijke incasokosten” riba esaki.

Parlamentario mr. Bikker kier alerta mas hende riba esaki, y el a menciona cu e simple mandamento di un carta no ta duna e persona cu ta haci e cobranza e derecho pa pidi “buitengerechtelijke incasokosten” sin mas.

Bikker a bisa cu varios biaha den Corte, hurisprudencia relevante, ta duna di conoce cu djis manda un carta no ta suficiente pa reclama esaki. Pero hopi hende na Aruba ta gewoon haya un carta y nan ta tira casi 18 porciento na interes riba e suma y sin cu nan sa of nan ta by Corte, of ta acepta di paga esaki.

E parlamentario a señala cu hopi hende no sa di dje, of no ta haci uso di e “draagkrachtmeting”.
Esaki ta un derecho cu e persona tin di haci un peticion y mustra IBG cu e no por paga e montante cu nan ta cobre.

E instancia Hulandes aki aworaki por hiba e persona Corte y buta beslag riba su salario, pa e paga 1/3 parti di su salario. Pero mr. Bikker a splica cu si e ta haci uso di e “draagkrachtmeting” y mustra cu tal suma so e por afford di paga, reiterando cu esaki ta un derecho, IBG mester tene cuenta cu e persona no tin suficiente entrada pa bay paga nan di e manera cu nan ta cobre.

Mas leu, segun sr. Bikker a bisa cu Hulanda ta existi un “Beslag vrij boet” unda si e persona ta ganando salario minimo of mas abao, nan no tin mag di kita ni un cent di su salario. Na Aruba esaki no ta conoci.

Fraccion di PDR ta bezig ta trahando un proyecto di ley pa introduci un sistema asina, pasobra vooral na Aruba den un recesion economico, ta indispensable pa un persona por hiba suficiente placa cas pa nan por sobrevivi, y mas ainda den un economia unda nos pueblo a conoce dos biaha aumento di prijs di awa y coriente, y hopi otro producto cu a subi e costo di bida, cu via di e recesion mundial ta keda aumenta constantemente.

Habitantenan di Caya Betico Croes cu caso sumario contra Club 21

alex — Thu, 17 Nov 2011 05:04:32 +0000

ORANJESTAD (AAN): Diaranzon na corte a tuma lugar un caso sumario entama pa habitantenan di Caya Betico Croes, contra Club 21 cu ta situa den Hotel California Aruba.
Esaki debi na e hecho cu e habitantenan di e bario a indica cu nan tin molester di sonido di musica cu ta Sali for di e club.
Abogado Theresa Croes representando e habitantenan a bisa huez cu varios biaha e musica ta keda te 5’or di mainta of mas y diferente di e habitantenan y specialmente esun cu a busca e abogado ta haya problema di drumi anochi. Mr. Croes a splica cu door di e desorde e personanan no ta drumi bon y esey ta trece problemanan di salud pa e personanan.
E abogado a splica tambe cu varios biaha e habitantenan ta yama polis y polis ta bin pa atende cu e problemanan di sonido.
Abogado Croes a bisa tambe cu banda di toca musica mucho duro, e bishitantenan di Club 21 ta orina den of pafo di cura di cas di e hendenan cu ta biba den e bario.
Tambe nan ta staciona dilanti di cas di hende sin pidi permiso y nan ta laga sushedad atras manera boter di cervez y te hasta condom.

E abogado a indica tambe cu na varios occasion tin pelea dilanti di e edificio unda e club ta situa y cu ta hendenan cu ta bishita e club.

Segun abogado Croes, e permiso di e lugar mester worde cuestiona, pasobra e propietario di e club di fam R. no tin e permiso.

E abogado a splica cu R. ta huur e club for di e compania cu tin e permiso.
Segun Croes, esaki ta pone cu R. no tin mag di opera e club, pasobra e permiso no ta di dje.
Habitantenan di e bario a busca un compania experto pa haci test pa determina con duro e sonido ta cu ta Sali for di e club y segun abogado Croes nan a midi 44 decibel for di camber di e persona cu a entama e caso, den cierto parti di e cas nan a midi 58 decibel y den patio a midi 63 decibel.

Segun e abogado, na 2004 huez a para operacion di La Ronda cu a pasa limite di sonido.
El a bisa si cu a uza stipulacionnan di Hulanda, pasobra na Aruba no tin un ley cu ta regarda cuanto decibel di sonido ta permiti.

E abogado a trece dilanti tambe cu den medionan di comunicacion a worde publica cu prostitucion y bendemento di droga ta tuma lugar den e club y tambe e diferente peleanan cu a tuma lugar pafo di e establecimento a worde treci dilanti.

El a bisa cu aparentemente polis no sa tampoco cu R. no tin e permiso pa maneha e lugar.
Abogado Croes pues a pidi huez pa e para e permiso di e lugar of duna orden specifico pa loke ta baha e cantidad di boroto y otro problemanan cu e club ta ocasiona.

Abogado Demis Illes representando e Club a trece dilanti cu e habitantenan cu a cuminza e caso no por bisa cu su cliente ta esun cu ta causa e sushedad dilanti di e cas di e hendenan, of cu e ta staciona eynan.

E no por worde teni responsabel pa loke clientenan di e club ta worde acusa di dje.
Illes a bisa cu no ta R. a bringa dilanti e lugar, of tira condom eyfo.
El a splica cu R. no ta doño di trabao di e hendenan, pues e no tin influencia riba nan comportacion.

E abogado a disputa tambe cu e sonido cu ta Sali for di e club ta mas halto cu locual ta aceptable.
Segun Illes, e ta contento cu nan a uza e ehempel di e caso di La Ronda, pasobra den e caso ey a uza 50 decibel como e limite di sonido cu por worde genera.

Si bo pasa 50 decibel e ora ey, legalmente esaki ta un problema.
Den e caso actual e sra cu a entama e caso a bin cu rapport di locual a worde midi na su cas y den su camber e expertonan a midi 44 decibel.

Illes a bisa huez cu esey pues ta bao di e 50, pues esey no mester ta un problema.
E abogado a bisa cu den e tipo di casonan aki hende no mester bin cu kehonan djis pasobra nan ta tende sonido.

E keho ta valido solamente di e sonido di berdad ta un molester grandi pa e habitantenan, segun Illes. Pa loke ta e 58 y 63 decibel cu a worde midi na e cas, e abogado a bisa cu e 58 decibel a worde midi den un parti di e cas, pero cu porta habri.

E 63 decibel a worde midi den un patio pafo di e cas.
Illes a splica cu si un persona tin molester di musica etc., e ta cera su porta, pesey e abogado a haya straño cu nan a midi cu porta habri.

El a bisa tambe cu quizas te hasta e 44 decibel den camber di e señora a worde midi cu porta habri.
E abogado a indica tambe cu den e caso aki ta un dia so e expertonan a bin midi, siendo cu den e caso di La Ronda nan a haci esaki riba diferente dia.

Pa loke ta e permiso, Illes a bisa cu un caso sumario no ta duna e espacio ta bringa pa purba kita un permiso.

E abogado a bisa cu esun cu ta maneha e club ta na altura cu e no mag di causa molester di sonido, pues pesey semper e ta percura entre otro pa cierto portanan di e lugar keda cera.
Illes a cuestiona tambe e informenan cu a Sali den medionan di comunicacion, como cosnan cu a worde exagera. Na final huez a bisa cu e ta bay tuma su decision riba dia 30 di November.

Castigo condicional di 4 luna, pa falsificacion y hortamento di placa na Registro Civil

alex — Sat, 12 Nov 2011 05:01:39 +0000

ORANJESTAD (AAN): Diahuebs Marina I.W mester a presenta dilanti di huez na corte di husticia, debi na e hecho cu el a worde acusa di como ambtenaar na Registro Civil comete malversacion den su funcion y falsificacion.
Esaki den e periodo di Januari te cu October 2007.
E muher no a presenta ni tampoco un abogado.
Huez a bisa cu anteriormente e caso a bin dilanti na corte y mirando cu e muher no tabata tey, a pospone tratamento di e caso pa e por tey.
Awor un biaha mas e muher cu a bay biba na Curaçao no a presenta, pero e caso a worde trata asina mes.
E caso a bin dilanti ora cu e hefe di Registro Civil di e tempo ey a sospecha cu sra M.W tabata comete fraude.
E tabata yena formularionan pa loke ta cedula na un manera incorecto, pa despues coregi esakinan y horta e placa cu tabata worde paga pa esaki.
En total segun Ministerio Publico, e muher lo a horta alrededor di 44.200 Florin, pa loke ta 1105 aplicacion pa cedula.

E muher a admiti na dado momento cu el a horta e placa berdad.
El a bisa sinembargo cu e no a horta asina hopi manera O.M a indica.

Fiscal a bisa cu si e muher lo a presenta na corte e lo a exigi un castigo parcialmente condicional.
Sinembargo como cu e muher no tabata presente na corte, el a exigi un castigo incondicional di 4 luna y un multa di 3000 Florin.

Huez a bisa cu e muher a sinta un total di 1 dia den detencion preventivo.
El a bisa cu e crimen aki ta hopi serio, pasobra net den ambtenaar bo lo mester confia y ta net e ambtenaar a horta.

Huez a bisa si cu e no ta haya cu e muher mester bay KIA.
El a duna un castigo condicional di 4 luna, kitando e 1 dia cu el a sinta den detencion preventivo.
Ademas di esaki e muher mester paga un multa di 3000 Florin y tur esaki den un tempo di prueba di 3 aña.