Diario Online » Policial

Venezolanonan a haya 9 luna di castigo, pa traficacion di persona ilegal

alex — Sat, 04 Feb 2012 05:00:09 +0000

ORANJESTAD (AAN): Diabierna e Venezolanonan Alvaro L.A.C y Jhonny P.S a presenta dilanti di mesa berde di huez na corte di prome instancia. Nan a worde acusa di transporta 4 persona ilegal pa Aruba, riba dia 9 di November 2011. A.C tabata capitan di e boto, mientras cu J.S kende ta padrino di yiu di A.C, a yude. Huez a repasa rapport di polis y kustwacht di en caso aki. Ta asina cu riba e anochi en cuestion, e radar di Kustwacht a detecta un boto sospechoso riba laman. E boto di Kustwacht a bay investiga y cerca di Nanki Club na Sero Colorado, nan a topa cu e boto coriendo cu velocidad halto. Mirando cu e boto no kier a para, miembronan di tripulacion di e boto di Kustwacht a los tiro di advertencia. Despues di esaki si e boto a para. Nan a topa cu A.C y J.S, hunto cu 4 otro persona. A.C y J.S a declara cu door di nan situacion financiero precario, nan a dicidi di hiba ilegalnan pa Aruba. J.S a indica cu su compader A.C a pidie pa e bay cune y el a dicidi di haci esaki.

A.C a bisa polis cu un persona na Venezuela a pidie pa bay cue ilegalnan pa Aruba, pa cual e lo worde paga 4000 Bolivar Fuerte, cu ta alrededor di 600 dollar.

Un di e personanan riba e boto a declara cu nan kier a cobre 400 dollar pa e viahe y cu despues cu el a roga nan, nan a cobre solamente 250 dollar. A.C a bisa cu ora e hendenan a subi e boto el a puntra nan si nan por landa y el a duna cada uno un vest salbabida. Fiscal a trece dilanti cu e ta haya e acusacion comproba.

El a splica e acusadonan di e consecuencianan serio cu traficacion di hende ilegal por tin pa nos isla. Entre otro el a trece dilanti cu personanan ilegal por tin consecuencianan hopi negativo pa nos comunidad y pa economia di nos pais. Tambe esaki por tin consecuencianan pa loke ta husticia, pasobra autoridadnan no sa ki tipo di criminal por ehempel por ta drentando nos pais.

El a exigi un castigo incondicional di 9 luna, kitando e tempo sinta caba den detencion preventivo. Abogado Vito Carlo representando e acusadonan a pidi huez pa tene cuenta cu for di un principio su clientenan a coopera cu autoridadnan. El a bisa tambe cu no ta nan a organiza e viahe, sino nan a hacie riba peticion di un persona, a cambio di pago.

Nan tabata den necesidad financiero. Prome cu huez a duna su sentencia ambos acusado a bisa huez cu nan ta arepenti di locual nan a participa na dje. Nan a entrega un carta na huez tambe den cual nan a skirbi nan disculpa y e motibo pa cual nan a dicidi di transporta e personanan pa Aruba.

Carlo a bisa huez tambe cu e castigo di prison ta extra pisa pa su clientenan, mirando e hecho cu nan no tin famia na aruba cu por yuda nan por ehempel cu placa pa locual ta worde yama ‘cantina’, pa asina nan cumpra extra cosnan di come, jabon etc. Huez na final a bisa cu den casonan di transportacion di personanan ilegal, hof sa duna castigonan relativamente halto.

El a splica cu ultimo biaha a duna un castigo do 30 luna, pero e diferencia ta cu den e caso ey e huez a sinti cu e bida di e personanan riba e boto tabata core peliger, door cu varios di nan no tabata tin vest salbabida bisti, e boto no tabata den bon condicion etc. E biaha aki huez no ta haya cu tabata tin un peliger pa bida di e 4 personanan.

El a bisa cu e ta haya e exigencia di fiscal corecto, pues el a duna cada un di e Venezolanonan un castigo incondicional di 9 luna, kitando e tempo cu nan a sinta caba den detencion preventivo.

Muher di 34 aña mal halto a dal cu su auto

alex — Fri, 03 Feb 2012 04:54:39 +0000

ORANJESTAD (AAN); Den dia cla parti mainta, Central di polis a dirigi patruya di polis den vecindario di Well Well na Sero Biento, pa un chofer burachi.
Segun mirones a wak con un auto ta zig zag riba caminda y e chofer a logra para altura di un cas situa na Morgenster.. E vehiculo modelo Toyota Yaris color di oro a baha for di caminda segun informe pa un of otro motibo y consecuentemente wiel banda drechi a worde destrui.
Polis a atende e chofer y el a declara di ta hopi cansa. Control hiba pa polis a resulta cu e chofer femenino lo ta bao influencia di un que otro substancia.

Polis a tira bista den un pakki di cigaria y a bin descubri substancia parecido na marihuana.
Relaciona cu e sucedido polis a detene e muher di inicialnan J.R. di 34 aña di edad. E patruya a transporta e muher pa warda di polis Santa Cruz y presente dilanti fiscal auxiliar.

Choller hortando bateria a worde gara

alex — Tue, 31 Jan 2012 04:37:33 +0000

ORANJESTAD (AAN): Un choller segun informe cu a yega na oido di polis diadomingo merdia a trata di horta bateria di un hijskraan.
Polis a bay altura di Linear park situa riba L.G. Smith Boulevard. E supuesto choller lo ta bon bisti den camisa color blauw y na yegada polis no a tope. Polis a controla e grua y a keda constata cu e ta intacto.
Despues di algun minuut polis a topa altura di e residencia di gobernador e conocido di tanto polis y husticia.

Ta trata di e homber conoci como Carlos R. y e ta cuadra cu e description suministra. Polis a mustra e tal “Carlos” e consecuencia y a core for di e lugar.

Haitianonan a bringa y menaza polis cu bloki

alex — Mon, 30 Jan 2012 05:06:04 +0000

ORANJESTAD.(AAN); Diasabra pa alrededor di 1’or marduga, central di polis a dirigi patruya Oranjestad altura di Museum den West straat relaciona cu bringamento, parce cu dos haitiano lo tabata bringando cu otro.
Na yegada polis no a topa ningun alma y nan a sigui core y a wordo para pa un choller y el a bisa cu un rato prome un homber a wordo maltrata pa dos otro homber.
Y e homber maltrata lo tin kap na frenta segun su version na polis.
Durante cu polis ta wordo informa nan por a wak na unda nan ta staciona cu tin bringamento andando patras di Sport Caribe ta trata di un grupo haitiano.
Polis a bay den direccion y yegada nan a topa tres homber ta discuti cu otro.
Un di nan ta bisti den tshirt berde y den su man drechi e tin un bloki y e tin esaki teni pa defende su mes.

Un polis a cana bay den direccion di e homber cu bloki y e otro agente a acerca e dos otro hombernan. Polisnan a trata pa clama e homber bisti cu tshirt berde, pero e no ta reaccion e tabata agresivo y ta actua histerico.

Despues di a ordena e homber pa benta e bloki na suela e no kier scucha y na dado momento el a tuma position pa bringa.
Tambe el a hasi movecion pa tira e bloki den direccion di polisnan.

No a keda polis nada otro pa saca su arma reglamentario y a bisa pa no trata pa tira e bloki el a stop y polis a haya oportunidad pa kita e bloki for di dje y a detene mesora.

E homber su amigo tambe a wordo deteni
Ambos homber segun e version di polis tabata bao influencia di alcohol.
Tanto e homber di inicialnan R.S. y C.D.O. a wordo transporta pa warda Oranjestad. Despues di interogacion y nan a calma ambos por a bay cas.

Verfdonan di 20 aña deteni

alex — Fri, 27 Jan 2012 04:56:45 +0000

ORANJESTAD (AAN); Centro di Alarma a notifica central di polis cu un grupo di mucha a pinta cu verf riba edificio di Oceania resort resident na Palm Beach. E informe a drenta dialuna 3’or y 30 di marduga. Central di polis a despacha mesora su patruya na e lugar. Na yegada informe compila a indica cu e grupo a verf cu pintura blauw riba e edificio y nan a move den dos auto direccion pa beach. Polisnan a inicia cu nan investigacion y den un di e vehiculonan nan a bin haya verf color blauw den e auto. Tambe un di e sospechosonan polis anota di tin color di e verf blauw na su man. Relaciona cu e destruccion comete y e evidencianan haya polis a detene e mucha homber di inicialnan K.A.L. di 20 aña. Mesora el a worde transporta rumbo pa warda di polis pa duna cuenta.

E problema na Aruba no ta scarcedad di parkeerplaats sino cu hende no kier cana!

alex — Thu, 26 Jan 2012 05:06:52 +0000

Segun Inspector Kramers:
ORANJESTAD (AAN) — Inspector Kramers a señala den conferencia di prensa tocante seguridad den trafico, cu asina cu e proyecto di verkeers drempel keda cla, lo cuminza implementa e sistema di wiel klem un bez cu minister bay di acuerdo cu esey. E ta mira necesario pa hacie mas pronto posible, mirando cu polis ta man yen cu towmento di auto den Oranjestad y cu no tin ningun clase mas di respet pa ningun di e borchinan di prohibicion pa staciona auto den caminda publico. Ya ningun hende ta worry cu e sorto di borchinan aki, Kramers a remarca, y polis mester cuminza un manera pa actua.
Sr. Kramers a agrega cu nan a sinta conta e cantidad di parkeerplaats banda di e Terminal di Arubus na Playa, cu tabata algo mas cu 300, pero hopi persona no kier staciona nan auto eynan bisando cu eynan tin kiebro y ladronicia den auto door di choler.

Kramers a subraya cu awor cu nan a basha abao e muraya di e edificio di antes DOW, e stacionamento aki a keda hopi visible. E ta wordo mira di tur banda si pasa riba Smith Boulevard of di Madiki, pues e oportunidad pa e choler of otro persona cu kier sconde pa comete e delito no tey mas.

Inspector Kramers a haci enfasis cu e parkeerplaatsnan tey, nan ta para bashi, y ta djis cuestion di staciona e auto banda di Arubus y cana bay den centro di Oranjestad.

Pero polis ta ripara cu diferente persona cu ta para nan auto den Nieuwstraat of Klipstraat y den centro mes di Oranjestad, ta simplemente pa flohera nan no ta staciona den e parkeo menciona. Hopi di nan no kier cana, pero nan ta bisa cu unda nan ta para nan auto ta e caminda mas cerca pa nan wak e. El a remarca cu e problema no ta falta di parkeerplaats sino cu e hendenan no kier cana!

Choller a horta BlackBerry via di bentana

alex — Fri, 20 Jan 2012 05:06:11 +0000

ORANJESTAD (AAN); Den Byronstraat na un cas, ta
sospecha cu choller a horta un BlackBerry Smartphone.
Diaranzon atardi patruya di Oranjestad, a
worde dirigi na e cas y polis a atende e señora
di inicialnan M.A.V. naci na Colombia di 48 aña.
Segun MAV su version di ta traha na e cas y e
tabata paden den cas y el a wak un choller via
di bentana ta core bay.
Despues di mei ora el a bin constata cu su BlackBerry a somenta y e tin fuerte sospecho cu ta e choller a baha bay cu e smartphone.

Investigando identidad di homber manehando un Mustang shinishi

alex — Thu, 12 Jan 2012 05:05:53 +0000

ORANJESTAD (AAN): Un homber biba na Spaans Lagoen, diamars pasa di 10’or mainta a presenta na warda di polis. Ta trata di e homber di inicialnan V.M.C.
E ciudadano aki a declara, cu e dia anterior pa 6’or di atardi un auto modelo Mustang a para dilanti su porta di cas.
Denunciante a declara di a bay pafor pa atende e homber den e Mustang color shinishi. Segun V.M.C. cu ta trata di un desconoci di mas o menos 40 aña di edad y ta bisa su faam of nomber P.
E homber P. a bisa di tin wowo riba residencia di denunciante y e boto cu e tin den su cura ta di un tal “Andy”.
Denunciante a tuma nota cu e persona P. tabata basta bao di influencia ora el a move for di e lugar.

Polis a recomenda denunciante pa semper tuma nota y memoriza plachi number di e auto pa yega na identidad di e persona(nan).

Polis a bin gara dos homber ta hortando den cas

alex — Wed, 11 Jan 2012 05:04:19 +0000

ORANJESTAD (AAN): Patruya di polis encarga cu distrito San Nicolas, riba Dialuna mainta a worde dirigi pa Central di Polis na un residencia na Pos Chikito.
Aki un homber desconoci tabata plunder un cas.
Na yegada, polisnan ta topa cu e homber di inicialnan E.v/d.B. y el a declara cu e ta hunto cu e homber di fam C. ta desmantela un tubo di chumbo.

Polis a detene E.v/d B. pa ladronicia mientras tanto funcionario di departamento technico tambe a presenta.

E detenido tabata tin den su poder martieu, dos tubo di koper, tambe e B. su auto Ford Ranger color blauw cual windshield patras na banda drechi ta kibra y esaki tambe polis a confisca.

Problema cu un homber cu a bay subi dump piki den sushi

alex — Tue, 10 Jan 2012 05:00:18 +0000

ORANJESTAD (AAN): E trabao di security guard, no ta facil! Esaki por a conclui na momento tin di deal cu hende burachi.
Na dump situa na Parkietenbos, un guardia obliga a pidi presencia di polis pa un persona bao di influencia cu a presenta na dump y porcierto e homber tabata haci masha fastioso.
Hasta na dado momento e homber a cuminsa bringa cu guardia segun informe suministra na polis.
Na yegada di e patruya di polis distrito Oranjestad, a resulta no a tuma lugar pelea, pero si un homber bao di influencia riba tereno di dump ta piki desperdicio.
E homber no ta duna oido ora guardia a bise e tin di bandona dump. Polis a atende e homber di inicialnan R.P. di 48 aña di edad debidamente riba su comportacion. Finalmente R.P. hunto cu otro homber fuera un hende muher a worde ordena pa bandona tereno di dump mesora.