Manera semper e concierto aki ta tuma luga den “The French Steak House” di Manchebo Beach Resort & Spa, di 11.00 or mainta te 13.00 or.

Diadomingo awor e concierto ta habri cu Tipico Alegre Cadushi Largo cu ta bou di direccion di Andres (Mo Dechi) Werleman. E grupo aki ta toca musica tipico Arubiano y ta consisti di musico di tur edad cu tin e talento di entusiasma publico. Tipico Alegre Cadushi Largo a gana cuater premio den e ‘Festival di Dande’ di 2010: el a sali number tres di Dande, el a sali na prome luga cu tumba di fin di aña (propio composicion), na prome luga cu wals (propio composicion) y na di tres luga cu cancion tipico. Den e ‘Festival Un Canto pa Himno y Bandera 2011’ e grupo a bay final cu tres participante.

Siguientemente e cantante popular hoben Jonathan Croes ta presenta algun cantica. Jonathan ta e ganado hubenil di e ‘Festival Un Canto pa Himno y Bandera 2011’. Ta interesante pa sa, cu Jonathan a participa exitosamente na diferente festival. Dos cantica di Jonathan lo ta compaña pa Tipico Alegre Cadushi Largo.

Pa clausura e concierto aki a haya cooperacion di Trio Los Arubeños cu no mester di introduccion. E trio aki cu ta consisti di Rey Lampe, Mario Croes y Catey Werleman ta existi sigur un cuarenta aña. E harmonia di bos di e tres cabayeronan aki ta masha admira.

E comision organizado ta invita pueblo henter pa bin pasa un mainta alegre y sano cu bon musica.

Entrada ta gratis, pero manera semper ta pidi un contribucion pa nos hobennan talentoso.

Sea asina bon di yega trempan, pa haya un bon luga di sinta y pa no perde nada di e concierto aki.

   E exposicion ta e resultado di un estudio over di arquitectura di salanan plenario di Parlamento realisa door di e achitectenbureau XML hunto cu studiantenan di arquitectura di TU Delft.

   Banda di e estudio haci, e studiantenan cada un a re-disenja un sala plenario nobo, proponiendo nan ideanan conclui for di nan estudio. E disenjo aki a worde realisa den forma di un maquette unda e studiantenan por demonsta detajadamente nan visionan pa e edificio nobo di e parlamento Hulandes.

   Un di e 7 studiantenan cu a contribui na e estudio aki ta e Arubiano ing. Roxsen Schwengle.

   Roxsen a destaca cu su disenjo yama: ‘Koepel van Democratie’ unda e ta tuma e debate como e punto principal den su diseño.

   Despues di e entrevista cu noticiero ‘Eén Vandaag’ di canal di Hulanda ‘Nederland Eén’, el a worde acerca pa diferente medionan di comunicacion pa un entrevista mas extenso di e proyecto aki, cu tabata hopi interesante pa nan.

   E exposicion lo tey te cu fin di april na e edificio di Parlamento Hulandes na Den Haag, despues lo sigui mas expositionan na diferente partinan di Hulanda. Ing. Roxsen Schwengle ta actualmente den su ultimo aña di studio ‘Masters of Architecture, Urbanism and Building Sciences’ na TU Delft.

Awe POPO ta bolbe riba e parada di mucha di Dialuna ultimo. Na comienzo prome cu parada por a nota claramente cu e ambiente di parada no tabata tey manera custumber. Pero asina cu e parada a cuminza pasa, a lubida riba esaki y lubida tambe cu ta un fecha nobo. Bo a sintibo atrobe “den Diadomingo di parada”. Ta na final bo ta bin realiza cu e parada a caba y ta otro dia nos ta den y no e dia normal di parada.

LUGA

POPO a kere sigur cu e parti entre Talk of the Town pa casi cruzada Lloyd G. Smith Boul. y Adriaan Lacle Boul. lo por tin escases di luga pa hende para, mirando cu e trailernan no por a staciona eynan e aña aki. Pero e situacion a resulta di ta otro. No tabata tin e cantidad di hende cu a spera y esnan cu tabata tin nan lugar di sinta y para tras di baricada sin trailer, a pasa nan mainta y atardi trankil. E cantidad grandi di hende cu sa mira ora tabata tin paradanan te cu aña pasa cu e trailernan staciona eynan ta mucho mas. Nan lo a plama tur rond di e ruta e aña aki.

SHOW

Un turista a comenta na POPO cu ora cu nan a bay parada 12 or merdia, nan a kere cu lo ta un dolor pa haya luga y mira e parada. Peor ainda cu nan tin cu warda te mas o menos 3 or pa e parada yega unda cu nan tabata. A resulta cu nan a haya luga facilmente y no a fada sperando parada. Riba caya so tabata tin un show caba cu e manera cu publico tabata keiro sperando e parada. Djis e movecion di publico tabata un acontecimento caba pa e bishitantenan.

SAME

OLD S….

S.O.S.

E aña aki atrobe POPO a tende comentarionan riba “Same Old Specialities”, S.O.S. den parada. POPO tambe a nota esaki, pero ki ora habri boca bisa algo, e grupo (su lidernan y trahadornan) ta laga sa cu ta cos nobo, cu parce locual nan a mira cantidad di biaha caba. Den diferente grupo por a nota e modificacionnan, e reciclahe di piezanan di paradanan di pasado, pero den forma nobo pa e tema cu nan ta presenta.

TEMA

Tambe POPO a haya comentario riba e temanan. A bira cu aunke kico papia di temanan, ningun hende no ta preocupa cu esaki mas. Tin temanan nobo, pero cu figuranan cu a yega di mira den paradanan di antes caba. Tin temanan cu aunke ki variacion bin cune, semper ta mira locual a yega di pasa caba den parada cu temanan similar. Si mira algo di India, aunke e tema ta algo nobo pero referiendo na India, ta mira casi e mes figuranan y trahe. Mescos cu Chines, Mexico, Indiannan, Egipcionan, flora y Fauna etc. Esaki ta haci cu hendenan ta pensa riba loke a yega di mira caba lubidando e tema cu nan ta mirando nan dilanti na e momento ey.

CHIKITIN

POPO por saca aki un ehemplo riba Chikitin Bin Bin. Cuanto parada nos no a mira cu avionnan. Por bisa cu Chikitin Bin Bin a bolbe presenta “avion” cu a mira tanto biaha.. Pero ta lubida un cos. E estilo cu Chikitin Bin Bin a bin cune tabata unico cu nan fantasia riba Aviacion den Movecion. E combinacion di helicopter y avion di e carosa, nunca a mira ainda. Pues… e avion a yega di mira, pero e combinacion aki tabata algo nobo y mustrando e aparatonan bulando. Proficiat!

INDIVIDUAL

Un persona a haci POPO un pregunta riba participacion den parada y a bisa cu si no ta permiti individualnan mas. POPO a cuminza pensa despues riba esaki, pasobra individualnan no sa mira mas. Esta un persona cu un trahe special y cu no ta forma parti di ningun grupo. Bo no sa mira nan mas. Hopi biaha nan mester ta dilanti di un grupo of patras di un grupo, of unda tin un brassband of un steelband. Mayoria lo no gusta esaki, y mayoria di grupo lo no acepta mey mey di nan un individual disfraza tampoco, pasobra e no ta bisti segun tema di e grupo. Pues, un individual sin grupo, sin banda musical  ta manera un “vrije vogel” den carnaval…… Jammer !!

PARADA

AWE

Den e parada di luz di awe, te asina leu cu POPO tin informacion ricibi diabierna siman pasa, ta 9 grupo tabata tin cu a inscribi. Nan ta Pleasers and Teasers/Flash in the Dark, NBO, Majestic, Champagne, TOB, Le Vogue, OPC, XC Lance, y Dushi Carnival Group. E secuencia di gruponan y si esakinan ta tur e gruponan , POPO no a ricibi di e organizadornan pa por a informa lectornan.

LARGO

E cambio di fecha di parada di lucha a haci e fin di siman bira un fin di siman largo. Ata POPO cu Stellage di Majestic den touw, y despues ata Mr. Forlaif  90 tambe den otro pidiendo POPO pa busca Popina. POPO a bisa Forlaif pa tira bista riba su  Cranberry y mira cuanto “missedcall” el a ricibi di POPO . Keto bay: “Mi ta ocupa awor, laga bo mensahe” y … piiiiiieeeeepppp. E contestacion nunca ta bin, ni ora cu Popasita yama. Pesey POPO no mester di un Popina, e tin Popasita caba. E Stellage sa masha bon cu diasabra anochi POPO no tabata tin su bril bisti.

Esey POPO ta bisti na cas pa mira television. POPO a haya problema diasabra anochi cu su “lensnan”, pero cu diahuebs anochi si POPO lo tin su “contact lensnan” bisti y fin di siman venidero, e”verrekijker” na color.

KI PARADA

DIALUNA

Ki parada bunita nos a mira dialuna apesar cu hopi participante no a presenta.

E cantidad di participantenan mester tabata 1095 y locual a haya riba caya tabata 730 segun conteo cu POPO a haci. Gruponan tabata tin decenas di participante menos cu locual nan a inscribi cune.

Nos tabata tin un parada anima por completo di parti di e muchanan participante. Nan a duna Aruba un muestra con ta celebra bo carnaval den grupo.

Tur cos a cuminza cu e prome grupo caba cu tabata Don Flip cu su Trendy Indians.

DON FLIP

Don Flip berdaderamente tabata tin un grupo masha disciplina. Bunita tabata pa mira con e muchanan aki a goza y na mes momento cu un comportacion ehemplar riba caya respetando nan lidernan y instruccionnan. BMW a zona otro e parada aki y esaki a yuda hopi tambe cu e animacion energetico di e muchanan di Don Flip.

BABY

CHAMPAGNE

Baby Champagne tabata grandi den carnaval un biaha mas y a bay cu diferente premio y ademas e premio di Grupo di Aña. E cantidad di roadpiecenan sumamente bunita di e grupo aki, hunto cu esaki e varios roadpiecenan comercial a contribui grandemente na e luho di e parada aki. E seccionnan y e diseño di e trahenan tabata admirable. Youth Xtreme tabata tin e muchanan ta “habri bo hala, bula na laira, bira rond etc.” y bunita tabata pa mira e muchanan balia riba instruccionnan di e cantante y su cancion.

JOLLY

KIDS

POPO a gusta e presentacion di Jolly Kids di e aña aki, y segun pensamento di POPO nan tabata menos di locual nan sa presenta cune normalmente den paradanan como grupo completo cu su piezanan. Sinembargo nan tabata formidable cu e masa y piezanan riba caya. POPO a gusta e trabao riba e trahe di cada mexicana. E obra di man den decoracion, y e mariachi di mucha hombernan tambe tabata masha bon presenta. Nan tabata tin 3 mini roadpiece y cada un a briya den e parada. IMPAK tambe a zona hopi bon e atardi aki animando Jolly Kids.  E hobencito Jayden Abath sigur tabata bao di influencia di juice of boli, pasobra e tabata move celebrando gala di carnaval cu un show di Broadway. Locual e banda a presenta pa e muchanan ta un invitacion caba pa Diahuebs anochi y fin di siman cu Majestic pasobra nan tabata ponebo move.

T.O.B.

KIDS

Di T.O.B. for di e banner, sigui pa Mario Kart, te nan mas o menos 7 pieza mas y carosa di Alviana Arends, y esun di Barnyard, e roadpiece di Nuhasita Mansur te na Carnival Games, no por menciona nada otro cu “un compliment grandi”. E blauw y biña di trahenan di seccion Mario Galaxy POPO a gusta. Tsunami tabata tin e muchanan di T.O.B. Kids den un movecion cu bo ta kere cu sigur ta un grupo di baile masal ta riba caya. Ki dinamismo y energia e muchanan aki a mustra creando un ambiente real di carnaval riba caya cu ta un ehemplo pa e grandinan.

C.B. NOORD

Centro di Bario Noord a presenta cu Reinasita di noord cu su carosa, Chikitin Bin Bin cu su avionnan, Rosea cultural, Little Stars di Emy y steelband di Family and Friends.

Na Noord e banda musical Songgo a wordo comenta como esun cu mihor sonido y dialuna POPO a goza e banda hoben aki cu tabata Grandi. Hot Ones y Eruption tambe a anima lo mihor posibel pa e gruponan aki y e steelband a zona bon.

NOS

FUTURO

Di Grupo Nos Futuro, POPO tin cu bisa cu e grupo aki tabata tin artistanan di baile y di canto, y tambe algun acrobat di movecion riba caya. Tabata tin hobencito y hobencitanan cu a parce di ta famia di e cobranan cu nan movecionnan riba e ritmonan toca. E tres bodypiecenan hunto beauty of India, Spirit of India y Queen of  Wisdom tabata masha bunita. Di e massa POPO por bisa cu unda POPO tabata, e muchanan di Nos Futuro a cuminza canta y los e scharniernan di rudia y enkel, y un di nan a tuma microfon over di Lady V y a asombra POPO con el a canta su roadmarch y riba tono y ritmo. Despues ata nan ta forma “congaline” bao di canto y baile, pero masha anima. Eynan POPO a bisa den su mes cu e hurado lo tin un trabao pa determina cual di e gruponan ta mas anima y tin mihor ambiente.

DEJA

KIDS

Di Deja Kids POPO a gusta con nan a presenta e seccion di Mardi Gras despues di e carosa. POPO a gusta tambe e Walking Mascarade y te ainda ta buscando unda e cabez berdadero tabata. E massa tabata chikito pero XCLanz a demostra cu nan ta un grupo musical cu por competi cu e grandinan pa e nivel y sonido cu nan a presenta pa e muchanan aki. Tene bista riba e banda aki.

LITTLE

GROOVERS

Little Groovers no a impresiona POPO dialuna manera nan a haci na San Nicolas. Kizas pa motibo di tabata cu menos participante dialuna y cu musica potente di e banda di caya Le Groove. POPO a gusta si e roadpiece di Anabella Maduro den e grupo aki. E tabata precioso.

SURINAME

POPO a keda sorprendi cu e brassband di Suriname cu tabata den parada. Nan uniform a pone POPO pensa riba e anochinan di competencia di Brassband cu Aruba a yega di conoce pa hopi aña, bunita presenta. Un pabien di POPO pa nan show riba caya. Nan a presenta manera digno embahadornan musical di nan pais.

Y awor pa otro topico.

LE VOGUE

Grupo di carnaval Le Vogue ainda ta hopi activo na Iceberg, POPO a constata ayera mainta. POPO a tende cu nan ta sold out pero a resulta cu no ta asina. Le Vogue tin material, vest caps, beads, ainda pa participantenan cu kier participa cu nan ainda den Parada di Luz na San Nicolas. E cuenta di sold out tabata rumornan cu a surgi pero realidad ta cu tin suficiente material pa esnan cu kier join ainda y balia riba tononan di Prive cu lo pone ambiente riba caminda hunto cu PRIVE.  Elia Isenia, Rubertico Balentien, Harry Zimmerman, Chendell Beaumont di Rincon Boys, 3 rey y 1 reina di tumba lo percura pa tembla cayanan di San Nicolas segun a wordo splica na POPO yen di entusiasmo. Interesadonan ainda por pasa na iceberg di 6 or atardi pa 9or anochi of yama 568-2707.

HEBBE

 Awe si POPO a haya oportunidad pa skirbi poco mas riba Hebbe Hebbe di e aña aki. E exito grandi e aña aki sigur tabata na grandi pa e bandanan musical cu a toca a pesar cu e transmision na television tabata di “nos ta duna boso loke nos kier y voor de rest mond dicht!” “Boso no tin nada di bisa !!”

DESAPUNTO

Te ainda ayera POPO tabata haya e reclamonan di e falta di por a mira e dos ultimo bandanan na television, locual ta e custumber di tur aña di e transmision. Toch ta wordo usa tur sorto di excusa pa tapa e falta di respet pa televidentenan.

HOMENAGE

POPO a haya tambe cu durante Hebbe Hebbe, e homenage na Don Rufo Odor por tabata cu mas bida, na lugar di un rato presenta un boter di champaña y “dat is dat!”. POPO a haya e homenage aki hopi frieu den e ambiente festivo cayente cu tabata tin henter anochi y cu publico gosando un mundo. Hendenan kier a scucha kende ta Rufo Odor y su biografia aunke den sumario, pasobra di dje ta hopi largo, y nada a bin dilanti.

RECORDATORIO

E recordatorio na Poentje d.f.m. tambe POPO a haya for di lugar na momento di homenage. E recordatorio mester a tuma lugar na principio di e anochi, pa despues di e momentonan di tristeza aki, tene un pauze cortico y sigui su tras du e resto di anochi di celebracion di e Hebbe Hebbe.

FOTONAN

E fotonan cu POPO tin awe ta fotonan di e anochi di ambiente dilanti Postkantoor di e celebracion anual di Hebbe Hebbe.

PARADA

DI NOORD

POPO a ricibi alineacion di gruponan di parada di Noord. Cu ta sali pa 1 or merdia exacto. Lo tin e aña aki mas o menos 500 mucha den e parada cu 6 carosa, 4 roadpiece, 5 banda musical y un disco. Lo tin total di 7 grupo cu ta participa.

Parada ta habri su Grupo di Reina infantil di noord 2011 cu e tema “Mi fruta preferi” cu musica di Hot Ones. Hot Ones lo ta  e banda cu ta acompaña mes ora tambe The little Stars cu e tema “Nag & Nagaina protecting the ruby & saphire”.

Basis school de Schakel ta presenta cu nan Jubileum 15 jaar Basisschool De Shakel, cu musica di BMW.  Di 4 grupo ta Scol di hunga Chikitin Bin Bin cu tema: Vuelo 057, Aviacion den movecion cu Songgo Band.

Grupo 5 ta Scol preparatorio Washington cu ta bin cu e tema di “E trupial su canto ta mi curason su encanto cu musica di XC Lanz. Di 6 grupo ta Rosea Cultural Grupo Fofoti cu Rikesa di cunucu cu musica di Sound System of disco y finalmente grupo di Francis lo bin cu su 8 integrantenan “Den Trafico” prome cu nos haya last lap Band cu ta Prive.

POPO a laga e secuencia pa DIARIO por publike awe riba un di su paginanan. NOTA: Un rato pasa despues cu a caba di type tur cos POPO a haya informacion cu Don Flip hunto cu Reina di Carnaval di mucha tambe ta join parada di noord y ademas Reinasita Alviana cu su grupo di TOB Kids.

LE VOGUE

POPO a pasa den ambiente formidable cu organizadornan di Grupo Le Vogue. Djis pasa anochi despues di 6 or na Iceberg y mira ki ambiente tin eyden y ainda tin material pa tur esnan cu kier join e grupo aki ainda pa Parada di luz na San Nicolas otro siman..

E SAPATO

Loke POPO a keda encanta cune ta pa scucha Harry Zimmerman cantando “E Sapato” cu ta e tuma ganador e aña aki di e cantante Hendrik de Windt. POPO a scucha e secreto cu no ta secreto mas despues cu e cay den POPO su man. E biaha aki Harry Zim tambe lo ta riba truck cu Prive y e cantantenan invita di Corsou Rubertico Balentien, Paul Welvaart y Elia Isenia.

LOS LAGA

LOS BAI

POPO a ripara cu varios miembro di Los laga Bai tambe lo ta den Vogue bao di e capa di Los Laga Los Bai. Nan lo presenta cu nan trahe di Los Laga Bai prepara pa e anochi aki y ta sperando mas di Los laga Bai pa Los laga los Bai den e grupo Le Vogue. Esakinan no ta paga completo. Nan ta paga 85 florin ya cu nan ta bini cu nan propio costuum como grupo invita den e grupo. Pa otronan cu kier join ainda, tin tur cos necesario na Iceberg for di 6 or pa 9 or anochi,. Pa drenta den Le Vogue cu tur cos inclui di costuum, bebida y snacks ta solamente 125 y por inscribi ainda y ta mantene inscripcion habri te cu diaranzon anochi ya cu tin hende cu a laga sa cu nan tin cu cobra afin di luna ainda.

INTER-

CAMBIO

Esaki ta e prome intercambio Aruba Corsow den carnaval di Aruba y ta ser spera cu Le Vogue lo sali fuerte cu e cantidad di hende cu nan ta sperando. Nan a yega caba casi e total spera y si pasa mes, lo haci e grupo mas grandi pasobra material etc tin pa hopi mas cu lo kier join e grupo aki. Ta mamagai so tin tur anochi entre e cantantenan y pober Chendell Beaumont ta haya su mes cu competencia durante parada di luz. Tur a laga sa cu nan ta competi entre nan kende lo anima e publico mas y kende lo tin mihor acogido. E paso aki ta e prome paso di intercambio y ya ta papia di plannan y tur kico por haci pa otro aña pa otro paradanan di carnaval tambe na Aruba y na Corsow. POPO a mira un entusiasmo enorme cerca e Gang di Le Vogue y Shon Jo ta hari sooooo !!

PIEZANAN

POPO ta publica awe atrobe di pi4ezanan cu tin pa bende y cu ta bon pa carosa. Tin headpiece tambe y flornan, y gitara grandi cu por pone riba carosa.. E piezanan ta cerca Sra. Tina Lanooy y por haye na celularnan 734-7881 of 742-6567.

  Tur e participantenan tabata masha bunita mes y a keda manera un barbie.

E resultado tabata como lo siguiente como reina di Lillyputters 2011 a keda Ziana Bruges, 1^st runner-up Destiny Perez, 2^nd runner up Genesis Hazel, 3^rd runner up Hailey Arendsz, 4 th runnerup Micaela Angela, miss popchi Lillyputters Charyanne v.d. Biezen, miss Smile Lillyputters Jadah Tijon, Barbie Lillyputters Jealeah Croes, bailarina Lillyputters Valery Flores y miss Prinsess Lillyputters Diana Kock.

Potret cortesia di Emperatriz Perdomo – tel: 5936881.

Diaranzon anochi mi a pusta y mi a gana. Mi a pusta cu algun amigo di mi yiu cu nan por mira Tele Aruba numa den e transmision dilanti Postkantoor, di Hebbe Hebbe y cu nan lo no mira Le Groove y kizas ni Rincon Boyzz. Ora nan a puntrami pa kico, mi a contesta cu ta pasobra Tele Aruba ta corta e programa tur aña ora cu e banda of bandanan final tin cu toca ainda. Nan a keda persisti cu mi ta kiboca. Despues di a bishita Hebbe Hebbe mi a bin topa nan sinta pafo, y nan tabata tur desapunta cu tin.

Mi a compronde ayera cu ta masha hopi hende a keda desapunta y ta cos di custumber. Nan ta lubida cu na Aruba “bo ta conta ora tin un interes di gana cu bo”. Canalnan di television parce no tin interes di nan televidentenan y e canal cu lo kier dedica na esaki mes lo no drenta tampoco si tin otro ta transmiti e evento… Tur esey ta haya y tur sorto di excusa tin pa tapa, manera no tin overtime, sponsornan no ta cubri gastonan, cierto programa tin prioridad of ta paga etc.

MI STOEL

Ayera POPO a haya un avalancha di keho tambe riba asunto di pone stoel diabierna anochi canto di ruta di carnaval. Ay…, nos ta na Aruba !  E kehonan ta bini despues. “Nan a kita mi stoelnan”… “ doño di cas a usa acera pa su familia prome cu ora di pone stoel”., “doño di cas a busca problema cu nos”,  “Nan a pusha nos stoelnan patras y tuma nos lugar dilanti”. “Doñonan di trailer a ocupa lugar dilanti trailer pa nan”, y asina mi por sigui. Ban spera pa weekend pasa pa tende kende a haci kico y con a bay cu e gruponan cu nan costuumnan. Tur hende a keda contento cu nan Costuum of  tin hopi malcontento di esnan cu no a haya costuum completo of no a haya costuum mes?

NOORD

POPO no a ricibi e programa di secuencia di parada di noord ainda. Si POPO ricibi esaki awe, POPO lo bin cu esaki mañan pa tur hende sa ki gruponan tin na Noord y e cantidad di muchanan etc.

FAILURES

POPO a haya tambe reclamo ( cu ta hopi laat), di con Failures no a logra premio den concurso di Roadmarch. Lo unico cu POPO por a bisa ta cu e reclamonan ey a bin laat, hopi laat. Remarcable ta cu ultimo dianan tin cancionnan di Failures y tambe di Le Groove cu ta sonando fuerte, y awor numa ta ripara con bon e cancionnan aki ta pa paradanan. Ta cosnan cu ta pasa tur aña. Ta despues di e concurso di roadmarch ta bin gusta cancionnan cu ta ser considera como perdedornan pasobra nan no a cay den premio of pasobra nan no a clasifica. Ta hopi di e cancionnan aki mes ta esnan cu ta domina den paradanan y na emisoranan despues y no e ganadornan.

STEELPAN

Tambe POPO a haya dos yamada ayera cu e pregunta cu si POPO a scucha e CD nobo di Nico Connor. E contesta tabata cu no, pero cu POPO lo tin e awe sigur. Nan di cu mester scucha e musica di steelpan cu e “Waka Waka”, ”Music”,  “Aruba ta plat”, “The wiper” y otr5onan . Parce cu ta 15 exito grandi di carnaval Nico ta toca. POPO no a ricibi esaki ainda pero si sa cu si e CD aki ta asina bon y cu ta papia di dje caba, e cel di Nico cu POPO tin ta: 732-7400 y esey ta si e nota cayente e dianan aki.

BO OIDO

Tambe POPO kier corda tur hende riba nan oido. Nos ta bay drenta un fin di siman di hopi boroto musical. Esey ta e Lighting Parade, e parada di Noord y e parada dimucha na Playa. Tres parada caminda musica lo domina espacio y durante cual nos mester cuida nos oido. Di e musiconan POPO no ta bisa nada, pasobra mayoria di nan ta sufri di perdida di oido caba debi na e volumen di musica cu nan ta “inhala” durante henter aña, pero e publico mes tambe mester percura pa nan no bira surdo riba e volumen halto di 1001 decibel cu nos bandanan ta pone riba caya. E hendenan di Quota Club ta pasa riba caya cu nan Earplug y por cumpra esaki y pa muchanan den parada por busca e earplugnan tambe pa evita nan di haya e boroto completo di musica den nan oido. Pa mucha chiquito cu ta cu familia canto di ruta tambe ta bon pa nan tin nan earplug. “Cuida nan oido!

ATIA

POPO no por keda sin duna un pabien na ATIA pa nan anochi informativo ayera riba e impacto economico di carnaval. Loke si POPO a ripara ta cu hopi mester wordo haci ainda cu estudio sigur pa haya sa e impacto economico real di carnaval di Aruba y cu ta tur grupo, gobierno  y  comercio mester duna un contribucion completo  pa logra cifranan real. Tambe cu hopi mester wordo haci pa por duna carnaval di Aruba e promocion necesario pa turismo y pa esaki e instancianan di turismo tin cu duna nan parti tambe y na grandi. Riba esaki lo papia hopi e dianan aki sigur..

Nan a bini Aruba especialmente pa tene e concierto aki cual a worde organiza pa Circulo Arubano Pro Arte cu cooperacion di algun patrocinador.

Un publico grandi a presencia e bunita concierto aki.

  Un decoracion bunita haci pa Tia Debbie, y un tremendo show organiza pa jufrouw Emeli Trimon cu su ayudante jufrouw Liz Becker y cu cooperacion di tur e jufrouwnan hunto cu tur mayornan y demas invitadonan a eligi Kiana de Cuba como reina di carnaval di Debby Doo.

Un pabien na tur nos reinanan pa e bunita atardi aki.

Potret cortesia di Emperatriz Perdomo – tel: 5936881.