ORANJESTAD (AAN); Mayoria di nos ciudadano nan no sa nos ley nan vigente y e consecuencia den e caso aki comete maltrata persona den grupo, ta un delito serio y ta colga 6 aña di castigo riba cabez di esun meti. Diabierna pa alrededor di 10’or, patruya di oranjestad ta pasando altura di Maria College MAVO y nan a worde para pa un señora. E señora a declara cu su yiu homber di 15 aña a worde maltrata pa un grupo di mucha homber. Polis a intermedia entre e partidonan y tambe den presencia di cabesante di e school concerni. Parce e a surgi problema entre e mucha homber di inicialnan C.A.B. y otro colega di e klas cu ta e mucha homber J.E.H.C. di 18 aña di edad cu caba biaha nan tin interambio di palabra cu otro.
ORANJESTAD(AAN): Dilanti un bar na e skina di Hendrikstraat cu Koningstraat Polis a haya droga na un homber di inicial M.W. Polis a para e sospechoso den su Buick cu number A-1452.
Autoridad a listra e auto completo y confisca esaki tambe. E homber M.W. tabata tin varios saco chikito di droga den su posecion. A transporta e homber pa warda di Playa.
E detencion aki tabata parti di accion di unidad mobiel cu durante fin di siman a tira varios control riba caya y tambe bar y clubnan nocturno.
ORANJESTAD(AAN): Cuater homber te ainda desconoci a ataca y maltrata guardia di seguridad y despues nan lo a bente den laman for di un pier den area di Hyatt Regency.
E caso a wordo reporta, diasabra pa pasa di 4’or di marduga na central di polis.
E cuater hombernan cu a comete e acto ta yen tattoo na curpa, dos di nan tin T-shirt preto y e otro dos nan cu T-shirt blanco. Segun e guardia tres di nan ta papia spaño y uno parce cu ta ingles so e por papia. E sospechosonan via di laman nan a drenta subi tera y a maltrata di guardia Tambe nan lo a horta un boto di rubber cu ta pertenece na Red Sail.
E boto cu cual e cuater suhetonan uza pa yega tera ta color shinishi y chikito. Tambe segun e informe e boto cu nan a uza pa move for di e sitio ta mas grandi y ta di color geel y nan a nabega direccion zuid.
ORANJESTAD (AAN): Recientemente Minister Otmar Oduber a declara cu e resultadonan pa loke ta traha cantidad di pasaheronan den aña 2011 a mira un crecimento di 5.7% cu ta casi dobel di e meta cu a worde poni pa e aña ey cual tabata di 3%.
Minister Oduber a indica cu e resultadonan ta notable y cu e cambionan, embeyecemento y inversionnan den airside cu aeropuerto ta pasando aden lo contribui na crececementonan cu den futuro lo percura pa sigui sobrepasa e metanan cu worde poni.
Aeropuerto no solamente a haci un bon trabao pa loke ta trata e cantidad di bishitantenan sino tambe a haci entrega di un annual report sumamente positivo. E resultadonan aki ta encurasha aeropuerto pa asina sigui cu expansionnan di general aviation.
Accion di rescate riba laman
ORANJESTAD(AAN): Diasabra den oranan di atardi tabata tin un caso di rescate riba lama. Un embarcacion La Chela cu a sali for di waf na Barcadera banda di 3or di atardi a haya su mes den problema serio ora cu e tabata pazuid di refineria. E embarcacion a yena cu awa y tabata casi pa sink. For di patras un ola a dal e boto y yena esaki full cu awa. Abordo tabata tin cuater tripulante cu tabata transportando un total di 200 caha entre whiskey cu cigaria e momentonan ey. Practicamente tur e mercania a bay perdi.
E capitan Rudolfo a bati alarma mesora pa e caso aki y un embarcacion La Margarita cu tambe tabata na Barcadera a sali bay yuda. Despues tambe Kustwacht su embarcacion a yega mesora.
Dama su boca tapa cu duct-tape
ORANJESTAD.(AAN); Atraco a wordo reporta na autoridad, y pesey Diasabra mainta patruya di Oranjestad a presenta na un residencia na Cumana. E señora victima di inicialnan E.P.C. a declara di ta sinta den sala ora un persona ta bati na porta.
Inocentemente el a bay a habri porta y a topa cu un homber y un muher, nan a puntra pa e number di telefoon di e señora cu ta hasi trabao pa denunciante. E señora victima a cera porta y a cana bay direccion camber pa busca su celular, pero el a regresa y a habri porta, y diripiente un di tercer persona a pusha e porta contra dje. Nan a cana bay pafor y un di e hombernan tin un arma di candela den su man y nan ta papia spaño. Nan a pushe, pone duct-tape na su boca y na su mannan. Nan a puntre pa habri kluis y el a hiba nan pa su camber y nan a bay cu hopi holoshi, placa y perfume.
ORANJESTAD (AAN); Polisnan motoriza diabierna transcurso di mainta a hiba control riba trafico. Altura di ex “House of Cheng” varios chofer a worde para debi nan a trott sin tene cuenta cu velocidad maximo. E chofer di e Nissan Sentra preto di inicialnan G.R.
Naci na Colombia di 21 aña, speed gun a capte ta core 123 km/h. Mientras e chofer di e Mitsubishi Lancer color blanco di inicialnan F.C. naci na hulanda di 20 aña, speed gun a capte ta core 115 km/h.
E homber chofer di inicialnan H.F. di 33 aña, den su KIA Cerato color shinishi a worde para, debi speed gun a atrape ta core cu 110 km/h. Speed gun a capta e homber di inicialnan R.J. naci na hulanda di 63 aña den su Mercedez Benz 220cdi color beige ta core 135 km/h.
Chofer di e Luxus is400 color shinishi di inicialnan S.D. naci na Jamaica di 36 aña, speed gun a capte ta coriendo 110 km/h.
E chofer di inicialnan J.H.P. naci na Venezuela di 23 aña, a core cu velocidad di 100 km/h cu su Chevrolet Spark color shinishi.
Cu un velocidad di 115 km/h, e chofer di inicialnan R.N. naci na Grenada di 27 aña, a worde gara pa medio di speed gun.
Speed gun a capta tambe e Nissan Tilda color blanco ta core cu 118 km/h, e chofer di inicialnan E.M. 24 aña no a scapa tampoco durante di e control y el a ricibi verbaal.
E señora di inicialnan J.A. di 61 aña, den su KIA Shuma beige, e speed gun a capte ta core cu e velocidad di 101 km/h.
Net 126 km/h e speed gun a marca y polis a para e chofer di inicialnan J.v/d L. di 44 aña coriendo den su Mitsubishi blauw cu velocidad di 126 km/h.
Un Hyundai Getz color berde su chofer di inicialnan E.K. di 34 aña a worde para debi cu speed gun a gare ta core 113 km/h.
E control riba trafico lo continua y a keda comproba cu riba e caminda principal chofernan no ta tene cuenta cu velocidad maximo.
ORANJESTAD (AAN) – Señor Ronny van Trigt, presidente di ATIA, a menciona den entrevista cu DIARIO, cu tin diferente opinion tocante na unda Aruba mester bay, y tin e plan 2025, den cual a dicidi cu mester busca otro alternativanan economico, y no solamente turismo. Pero den e caso di Bushiri Hotel, e ta algo cu ningun hende na Aruba kier wak’e den e condicion cu e ta actualmente y transforma e area aki ta sumamente importante. Y den e proyecto di Aruba Hard Rock Café Hotel, cu ta un resort cu basta camber, un di e condicionnan ta pa crea un beach entre Bushiri y Divi y pa nan contribui tambe cu Linear Park.
Kiermen, e ta bon estableci kico nan mester haci y den esaki tin un centro di encuentro cu mester wordo crea, pa asina convencionnan pa nos educacion wordo teni den dje, y tur esaki ta wordo mira como puntonan positivo den e desaroyo di un area cu ya caba tabata un hotel y awor e ta un ruina.
Frederick Nuboer di Algemene Rekenkamer:
Pa prome biaha den historia gobierno di Aruba lo duna cuenta riba su maneho!
ORANJESTAD (AAN): Frederick Nuboer, miembro di Algemene Rekenkamer a duna di conoce durante un receptie cu a hiba e nomber “Duna Cuenta”, cu su persona y su colega Sr. Werleman a tuma e encargo dos aña pasa di Corte pa cuminza duna cuenta.
A dicidi cu anualmente nan lo haci un invitacion pa un actividad anualmente na mandatarionan, hefe di departamentonan, representantenan di organizacionnan no gubernamental, comerciantenan, prensa y tur otro hende cu ta interesa den e trabao di Algemene Rekenkamer ta haci. Cu esaki Algemene Rekenkamer ta pone comunidad na altura riba su actividadnan.
Segun Nuboer, na prome instante nan no por a kere ora nan a tende cu pais Aruba no tin su cuentanan anual acorda pa e ultimo 50 añanan.
ORANJESTAD(AAN):Emely Croes economista na Banco Central a hiba palabra unda el a splica riba e conclusion di e prome sondeo cu nan a haci. A trece e resultado inicial di e prome kwartaal 2012. Na diferente parti di Aruba tabata tin hende pa haci encuesta. E idea tabata pa logra acerca 400 persona. Nan a logra esaki. Banco Central a gradici e pueblo cu a duna e cooperacion. 58.2% tabata hende muhe y 41.8% tabata hende homber. Un comentario cu a haya di e encuestadonan ta cu e hende muhenan tabata mas dispuesto pa participa na e encuesta, compara cu e hende hombernan. E regionnan Noord, Oranjestad y San Nicolas tabata esunnan mas representa y Oranjestad tabata mas grandi cu 25.5%. Den diferente area tabata tin mas grupo representa cu otro.
ORANJESTAD(AAN):Diabierna anochi polis y bomberonan a wordo manda poco pura na Texaco Tanki Leendert. Un biaha mas tabata tin problema unda servicio di emergencia mester a presenta. E tanki a bai over y cuminsa core riba e tereno di e lugar. Esaki ta un peliger pa e autonan y hendenan cu ta yega pa coy gasolin. Bomberonan a duna ordo mesora pa sera e lugar y a evita cu hendenan ta yega cerca. Parce cu e tanki a bai over. Ta mustra cu e tin un leak y aki probablemente ta ser calcula cu awacero lo a yena den e tanki cu tur consecuencia.
ORANJESTAD(AAN):Lider di MEP Evelyn Wever-Croes tabata presente tambe na e reunion cu tabata tin den parlamento pa atende e preocupacion di un grupo di habitante cu no kier e parke di molina na Noord of area di Urirama. Despues di e reunion a acerca e parlamentario aki tambe y el a duna su splicacion relaciona cu e proyecto. Segun mr. Wever-Croes, a pasa presupuesto caba na luna di Maart y den e presupuesto gobierno a inclui e proyecto di Urirama como parti di e desaroyo economico cu ta spera pa e aña aki y ta conta riba e placa cu tin eyden. A cuestiona minister de Meza, kende a menciona cu e construccion di Urirama lo cuminsa pronto. Tabata tin contacto cu e habitantenan kendenan a suministra hopi informacion. E impacto di e proyecto di parke di Molina na Urirama, den nan cura, ta grandi. E cas di mas cerca na Alto Vista, ta menos di un kilometer cerca di e molinanan planea. Fraccion di MEP ta contra di e ubicacion di Urirama. Si gobierno tin mas molina di biento, e fraccion ta sostene esey pasobra ta un manera di energia alternativo. Por bay amplia Vader Piet.
ORANJESTAD (AAN ): Un total di diez detencion ta loke a tuma lugar den un accion riba tera y riba lama den oranan di marduga.
A logra pone man riba grupo di hende di diferente nacionalidad. Arubianonan y stranheronan tabata envolvi den e caso di droga. E departamentonan cu a participa den e accion grandi aki tabata RST, Team di Aresto, UGC e unidad encarga cu Crimen Organiza y tambe Kustwacht. Riba lama a intercepta un boto di Aruba cu algun hende cu a bin trece e droga.
A cuminsa un persecusion. Esnan den e boto a cuminsa benta e bultonan for di e boto. A logra haya asina mes mas cu 30 kilo pero ainda a keda busca pa mas cu por a worde benta den lama.
ORANJESTAD (AAN); Mayoria di nos ciudadano nan no sa nos ley nan vigente y e consecuencia den e caso aki comete maltrata persona den grupo, ta un delito serio y ta colga 6 aña di castigo riba cabez di esun meti. Diabierna pa alrededor di 10’or, patruya di oranjestad ta pasando altura di Maria College MAVO y nan a worde para pa un señora. E señora a declara cu su yiu homber di 15 aña a worde maltrata pa un grupo di mucha homber. Polis a intermedia entre e partidonan y tambe den presencia di cabesante di e school concerni. Parce e a surgi problema entre e mucha homber di inicialnan C.A.B. y otro colega di e klas cu ta e mucha homber J.E.H.C. di 18 aña di edad cu caba biaha nan tin interambio di palabra cu otro.
