ORANJESTAD(AAN):E departamento di warda nos costa mester somenta.
Esey ta e deseo di Hulanda y tambe hopi local cu ainda no por compronde con e minister di husticia a lanta un cuerpo apat cu hendenan arma.
Ministerio Publico mes tabata tin diferencia di opinion grandi riba e departamento aki y su maneho.
E forma cu nan ta drenta cas di hende ta algo cu semper a keda cuestiona.
Awor parce cu ministerio publico a manda carta pa warda nos costa sea pa kita e armanan for di nan of mustranan cu pa core tras di hende indocumenta no mester di arma di candela.
Un ilegal no ta un criminal.
E carta di ministerio publico a yega tambe cerca minister Rudy Croes cu awor mester bai atende cu otro problema mas.
For di bon fuente DIARIO tin informacion cu e armanan cu warda nos costa ta usando awor aki ta di polis.
E armanan aki mester ser entrega bek con cu ta.
Di otro banda parce cu warda nos costa mes ta hayando nan armanan cual minister a firma pe caba y ta cuestion pa esaki yega y nan cuminsa usanan mesora.
Tambe lo tin funcionarionan di warda nos costa cu a pasa curso y ta cla pa subi caya arma asina cu nan armanan yega.
Awor ta di sinta mira con ministerio publico lo bai atende cu e asunto aki.
