Home Deporte Tremendo papel haci pa aruba na mundial di bodyboarding na chile

Tremendo papel haci pa aruba na mundial di bodyboarding na chile

5
0
SHARE
- Advertisement -

ORANJESTAD (AAN): Na cuminsamento di e luna aki a tuma luga na Arica, Chile e gran campeonato mundial di bodyboarding. Esaki tabata un di e campeonatonan mundial mas grandi di e World Tour di IBA(International Bodyboarding Association) pa 2009.

Aruba tabatin 2 representante presente. E dos miho bodyboardernan di Aruba, Gregory Wouters di solamente 17 aña di edad y Jeremy Loefstok a tumba rumbo pa Chile pa asina confronta nan mes cu e miho bodyboardernan di mundo den e miho olanan na mundo.

E Tour aki ta den e categoria di mas halto cu ta e categoria na nivel profesional di tur parti di mundo, mihor bisa, e miho di e mihonan so tabata presente.

Jeremy y Gregory a logra pasa un cantidad di round, pero e representante mas jong, esta Gregory Wouters a haci un tremendo papel pa Aruba. Jeremy a logra yega te round 4, pero suerte no a toc’e pa haya e olanan necesario pa por a sigui pa e siguiente round. Diadomingo dia 2 di augustus Gregory a score un 9 pa un ola cu tabata casi un score perfecto y den e round anterior el a score un 8 cu tabata scorenan inmensamente halto, ya cu e score mas halto tabata un 10.

Ainda por mira Gregory su nomber den e resultadonan di e evento, unda nan ta pone e scorenan mas halto di e evento.

Pero esaki no tabata tur, e mes un diadomingo ey Gregory mester a core su ultimo round di dia y aki ta unda el a score un 9 y un 7. Den cada round nan ta conta e dos miho olanan y Gregory a logra score un 16 y a cera e dia cu e score mas halto di henter e evento y a posiciona su mes number 1 riba e highest scoring heats di henter e evento !

E dia ey di competencia Gregory a gana Campeon di Peru, Jorge Hurtado, e campeonnan di Brazil, Roberto Bruno y Bruno Rocha, campeon di Islas Canarias, Oliver Herrera y hopi mas competidor mas di rond mundo y a pone Aruba su nomber na number 1 di e mundial di bodyboarding na Chile.

Esaki ta un logro inmenso pa Aruba. Por mira Aruba y Gregory su nomber riba diferente website di bodyboarding internacional diadomingo anochi y dialuna ! Tur a skirbi di e tremendo performance cu Gregory di Aruba a haci y a nombr’e e miho bodyboarder di dia. Tambe por a mira Gregory riba diferente video riba youtube unda cu nan a entrevist’e como e miho bodyboarder di dia. (Por mira e videonan aki riba rusharuba.com of facebook.com/rusharuba)

Loke a hala hopi mas atencion tabata ora cu nan a pasa e resumen di e campeonato mundial aki na CNN Chile unda cu nan a skirbi y menciona Gregory Wouters di Aruba como un di e miho bodyboardernan cu a destaca durante e evento!

“Los dos bodyboarders que mas destacaron en el campeonato mundial Arica Chile eran el Brazilero Bruno Rocha y el Arubano Gregory Wouters”. Por mira e video aki riba rusharuba.com.Aki Aruba a worde renombra riba e news provider di mas grandi di mundo, esta CNN como un di e mihonan na mundo!

Un promocion inmensamente grandi e Rubiano aki a haci pa Aruba! Aunke cu pa mala suerte y kisas hasta pa motibo cu e hueznan a score e un poco abou den su ultimo round a pone cu e Rubiano aki no a yega final, pero si el a marca su nomber y di Aruba den e topnan.

Den un entrevista cortico cu nos a tene cu e dos representantenan aki nan a conta nos cu nan a haci un tremendo trabao propagandando Aruba y cu no tin un hende cu a acudi na e evento cu no sa awor unda Aruba ta! Tambe cu hopi di e bodyboardernan profesional ta bisa cu nan lo kier bini Aruba un dia sea pa competi of djis pa bodyboard.

Tambe nos a compronde via e entrevista cu Jeremy y Gregory cu nan a traha hopi duro y a spaar tempo largo pa por a yega Chile pa por a representa Aruba y cu nan lo ta desea hopi pa por sigui e Tour Mundial di cual e siguiente parada ta bay ta na Portugal e “Sintra Pro” y despues ta bay tin un na Spana e “Ferrol Pro” cu ta dos localidad cerca di otro y nan lo aprecia hopi si e biaha aki nan lo por haya cooperacion financiero(sponsorship) di sea companianan local, Gobierno of cualkier instancia cu ta yuda deporte pa asina nan lo por sigui haci e bon trabao representando Aruba den e World Tour di Bodyboarding, pa asina wanta Aruba su nomber halto y tambe pa asina por logra bira e prome Arubianonan pa bira profesional den e deporte di bodyboarding y asina haya mas chens pa un dia trece e titulo mundial cas.

E instancianan of personanan interesa pa yuda e dos atletanan aki pa asina por sigui e World Tour por tuma contacto cu nos na 594 2366 of via e-mail: rusharuba@gmail.com , cualkier ayudo financiero lo ta hopi aprecia.

Por mira tur e potretnan di e mundial di bodyboarding na Chile y tambe videonan incluyendo esun cu Aruba ta worde renombra riba CNN riba rusharuba.com of facebook.com/rusharuba.

- Advertisement -

DUNA COMENTARIO

Please enter your comment!
Please enter your name here