ORANJESTAD (AAN): E pianista Gustavo Corrales Romero lo duna un concierto na Cas di Cultura riba Diahuebs 15 di October proximo. E concierto aki ta worde presenta door di Circulo Arubano Pro Arte en cooperacion cu Directie Cultuur Aruba. E concierto ta cuminsa pa 8’or di anochi. Gustavo Corrales no ta un desconocido pa e publico Arubano. E pianista talentoso aki, naci na Cuba, a biba na Aruba di 1998 pa 2001 y durante e tempo ey el a duna varios concierto na Aruba y Curaçao. Tambe el a duna les na diferente alumno di piano.
Despues di esey el a establece su mes na Hulanda, na unda el a sigui desaroya su mes. Na 2002 el a participa na e di 16 edicion di “De Dag van de Romantische Muziek” na Rotterdam y tambe na un proyecto cultural Cubano “Conto’y la Cáscara”.
Den e siguiente añanan a sigui hopi festivalnan na Hulanda y otro paisnan Europeo na unda el a participa, manera na Viena , na 2003, unda el a duna un recital den e Steinway-Haus na ocasion di e “Festival Lange Nacht der Musik”.
Na Februari 2003 el a bira semi-fialista den e Concurso Internacional Gaudeamus pa Interpretenan. El a traha grabacionnan pa 2 CD.
Na 2007 su debut como escritor a worde ricibi cu entusiasmo pa publicacion y Ediciones EntreRios a publica su buki “Los herederos”, despues a presente na e Miami Book Fair Internacional. Awor e ta trahando pa haci su mes mas conoci como musico y tambe e ta trahando riba su di dos buki.
Den e concierto cu Gustavo lo duna na Cas di Cultura, el lo presenta un programa completamente Latino-Americano cu diferente elementonan interesante. E programa ta contene compositornan manera Villalobos (Brasil), Ginastera (Argentina) y diferente compositornan Cubano cu ta mas y menos conoci manera Lecuona, Cervantes, Fariñas, González-Valdes, Orozco etc.
Varios di e obranan den e programa aki a worde recorded na Aruba riba e promer CD di Corrales “Palimpsesto” door di Studio Kelkboom na 2001.
Finalmente e programa tin tambe dos premiere di un compositora Arubano, su casa, K.D. Russel de Corrales. Ta di spera cu e amantenan di musica no perde e ocasion aki di presencia un concierto unico.
