Gobierno lo traha duro pa saca e maximo probecho di energia di biento

Minister di Utilities, ing. Mike de Meza:
ORANJESTAD (AAN) – Matutino DIARIO a entrevista minister ing. Mike de Meza, ken tambe tin e cartera di Utilidad, ken tambe a participa ayera den e recorido na Vader Piet, unda e mulinanan di biento di WEB Aruba NV ta instala.Minister de Meza a mustra su mes hopi contento cu e proyecto y el a expresa cu esaki ta e caminda cu Aruba mester a tuma, aunke enberdad a tuma tres aña largo pa e gobierno anterior realiza esaki, y cu ta un desaroyo cu ta tumando lugar mundialmente.
Na mundo mas y mas energia ta worde produci door di sistemanan berde, di cual biento ta un, y e mandatario ta haya increible cu Aruba a warda asina largo pa implementa esaki y yega caminda nos ta awe.
Minister de Meza a comenta cu ayera el a conversa cu un representante di Bonaire, isla den cual tambe tin mulina di biento, y nan a haci un test y a resulta cu door di e energia, consistencia, temperatura y presion di biento, e mulinanan ta duna 93% di nan capacidad, locual a kibra tur record rond di mundo. Aruba y Curacao tin e mesun forza di biento cu na Bonaire.
Tambe algun aña pasa cu un calculacion mundial a worde haci di midimento di energia di biento, Curacao a sali den e top cinco paisnan na mundo, y nan tin e mesun biento cu Aruba tin. Pesey e mandatario no por compronde pakico na Aruba a lucha tanto pa bin na energia alternativo y sigur esun di biento anto e gobernantenan prome no por a mira esaki.

Pero al final nan a bin para banda di AVP y den e presupuesto di 2008-2009 nan pone placa pa e proyecto, y awe gobierno nobo ta hopi contento cu e tres companianan estatal: Utilities, WEB y ELMAR a bay den e mesun direccion cu AVP a bin ta propaganda pa basta tempo caba.

Segun e minister, pueblo di Aruba lo mira e efecto di energia berde y gobierno lo traha masha duro mes pa yega na alomenos 40% di uso di energia di biento, y tambe lo haci uso di otro alternativanan, por ehemplo, energia solar y otronan cu ta existi.