Minister Richard Visser:
ORANJESTAD (AAN): Ayera durante un conferencia di prensa, Minister Richard Visser a comenta un tiki tambe riba e rol di AZV. El a bisa cu e rol di AZV den e campaña di vacunacion ta minimo. Na cuminzamento di su involucracion den AZV tabata un tiki prematuro, pero e ta kere cu AZV ta bay yuda te unda nan por. A señala cu AZV tin su problematica interno, pero locual ta bay haci ta cu proximamente gobierno lo sinta cu e docternan di cas y papia cu nan riba e situacion cu ta reinando pasobra mester di nan ayudo.
Segun e minister, na Curacao a laga tur dokter di cas participa den e accion di vacuna. Na Aruba a usa otro procedura y a prefera di laga e vacuna un caminda y hiba un maneho central cu mihor control riba e medicamento su temperatura.
Si por ehemplo, ta laga e medicamento den cada oficina di docter, den diferente frigidaire no ta bay tin control mas di e calidad di e almacenamento.
Pesey Hulanda a indica cu nan ta prefera pa haci e aplicacion di un forma mas centraliza ya cu e remedi ta hopi sensitivo, a bisa.
E dokternan ta cooperando, a manifesta, pero mester un atencion mas cerca di gobierno pa set tur cos y haya input di e docternan pa e por cana mas facil.
Tur hende mester coopera. Tin mas informacion ta core eyfor, a agrega cu ta causa cu hendenan ta bay den panico y nan ta bisa cu nan no kier haya e vacuna, siendo cu e ta bon pa nan salud.
