ORANJESTAD (AAN): Diahuebs anochi den un Renaissance Convention Center completamente yen, a tuma lugar entrega di e Premio Simpelmente Deporte na e ganador maximo Deportista di Aña 2009 na srta. Sarah-Quita Offringa kende a ricibi su premio for di man di Minister di Deporte Richard Visser. Durante e anochi MC nan cu a dirigi e actividad tabata Adeline Rojer y Patrick Warleman kende nan a yama bon bini na tur esnan presente y pa despues duna palabra na sr. Jesse Beukenboom presidente di e comision cu a gradici turesnan den e comision cu a traha lunas largo kibrando cabes pa eligi esnan cu a destaca durante aña 2009 den nan ramo di deporte.
Tambe a hiba palabra Min. Di Deporte Richard Visser, cu a gradici e comision cu a haci tremendo trabao pa saca e nominadonan.
E resultado ta como losiguiente, Cat. Femenino te cu 13 aña: Shanaya Howell, Cat. Masculino te cu 13 aña: Jordy Groters, Cat. Hubenil femenino 14 te cu 18 aña: Sarah-quita Offringa, Paul Croes, Cat. Masculino 14 te cu 18 aña: Alexander Robert, Premio Destaca den pasado, a bay pa:
Elias Kock, Herbert Doc Williams, Francisco Chico Harms, Sobresali durante aña: Jose Chaco Cornelios, Gino Hodge, Rupert Ammerlaan, Jennifer Piter, Derward Ruiz.
Tambe e anochi a Honra Jerry Gomes, kende pa varios aña a dirigi e Comision Simpelmente Deporte, Sport Vereniging RCA, Medallista di oro durante weganan di reino, Anouck Eman, Carlos Wester, Raymundo Dijkhoff, Tony Rombley, Richinel Rossel, Gregory Manuel, Tizania La Tore, Derrick Groters, Joei Ponson, Yamal Le Grand, Marelies Robles de Medina, Jordy Groters, John Jairo Maduro, Nigel Ras, Thais Rodrigeus. Gobierno di su parti a duna un special honra na e equipo di Senior League, y Junior League.
Y na final como Deportista di aña 2009: Sarah-Quita Offringa cu a ricibi un premio di 10.000 Florin, encambio di manera antes ta entrega e rinchi pa un suma di placa caminda cu e deportista por enverti su mes cune den e deporte.
Diario Deporte ta felicita cada un di e atletanan cu a destaca den nan ramo muy en particular e deportista di aña Srta. Sarah-Quita Offringa cu un biaha mas a bay cu e titulo maximo pa loke ta trata aña 2009.
Un cos si Diario Deporte kier a remarca cu hopi di e organizacionnan no a manda nan candidatonan pa ser nomina, awe hopi por sinta pensa pa e aña aki cuminza di tuma datos di nan atletanan na kende nan kier ser nomina. Un biaha mas pabien na Sarah-Quita cu e premio maximo di 2009.
