ORANJESTAD (AAN): Manera ta conoci, tur aña AHATA Comishon di Medio Ambiente ta organiza un tremendo Competencia di Obra y Arte Recicla!
E aña aki e di 9 Competencia di Obra y Arte Recicla lo tuma lugar dia 17 pa 21 di mei 2010, na Biblioteca Nacional Oranjestad y dia 24 pa 28 di mei 2010, na Biblioteca na San Nicolas.
Apertura lo tuma lugar dialuna 17 di mei pa 4:00 pm na Biblioteca Nacional Oranjestad y entregamento di premio diabierna 28 di mei 2010 pa 3:00 pm na Biblioteca San Nicolas.
E meta ta pa conscientisa tur hende riba e 3-R, Reduci, Reusa, Recicla. Tur esaki na un manera creativo pa mustra hende cu en berdad por haci hopi cos leuk pero teniendo cuenta cu nos medio ambiente. Esaki cu e reuzo di foam, bleki, plastic, papel, glas, aluminium of carton y uzando adicional verf y lijm.
Aña pasa 19 school, 5 Hotel/grupo y 15 individual (amateur y professional) a participa. Ta bay tin 6 diferente categorianan; School basico 1-3 klas. School basico 4-6 klas. School secundario. Individual amateur. Individual professional. Grupo/hotels/negoshi
Tur lo haya e oportunidad di participa uzando nan creatividad, creando un obra decorativo y alavez util.
Tres hurado lo basa nan escogencia riba; (*) Ki producto a worde usa. (*) Creatividad. (*) Detaye y acabado. (*) Porcentahe di material recicla usa. (*) Tecnica cu a worde usa. (*) Kico por haci cu e obheto. (*) Si e participante a usa e materialnan reusa. (*) -Si e participante a usa uno of mas di materialnan reusa.
Tur participantenan lo haya un certificado y e ganadornan lo haya premionan di diferente sponsors.
Lo tin premionan atractivo pa e ganadornan y hasta tambe e bishitantenan cu ta bin tin chens pa gana algo. Nos ta invita comunidad en general y en especial schoolnan pa inscribi door di yama Vanessa Rasmussen na AHATA tel: 582-2607. Tambe por yama akinan pa mas informacion.
Nos kier yama danki na Biblioteca Nacional cu tur aña ta yuda nos cu e sala, na AHATA su Comishon di Medio Ambiente y tur e sponsornan. Un danki tambe na tur e miembronan di Prensa cu semper ta duna nan sosten door di cubri e competencia y pa nan interes den nos Medio Ambiente.
Ta bale la pena pa participa y tambe pa bin wak e competencia aki. Henter comunidad ta bon bini durante horario di e biblioteca for di dia 17 di mei te cu 28 di mei 2009. Corda cu e ultimo dia pa inscribi ta dialuna 3 di mei. Sea creativo y consciente pa nos medio ambiente!
