ORANJESTAD (AAN): Edwin L. Tromp a nace den e bario di Santa Cruz na Canashito. Na 1970 Sr. Tromp a termina su enseñansa secundario na Colegio San Antonio. Prome cu Edwin a drenta sector bancario el a traha tambe na diferente compania y tambe Gobierno.
Na januari 2, 1975 el a cuminsa traha cu Citibank. Edwin a cuminsa traha como clerk den e departamento di Cuenta coriente y a recore diferente departamento e.o. Transferencia, Credito y a traha tambe den departamento di “offshore bank”.
Edwin a amplia su conocemento bancario internacional tambe, trahando como Gerente Adjunto na Citibank Curacao y alavez di a worde asigna como oficial di cuenta pa Citibank, cubriendo Antillas, Guyana y Surinam.
Despues di 11 aña trahando, na 1986, el a worde nombra como director di Citibank y pa su suerte el a haya e encargo di bende e operacion di Citibank y a bende cu ex Interbank N.V.
Na 1987 Edwin a cuminsa traha como Assistant Managing Director di First National Bank of Aruba N.V. . Seguidamente na 1990 el a worde promovi como Managing Director. Na 1997 Edwin a worde nombra como Presidente di First National Bank of Aruba N.V. cual function el a eherce te cu 31 di december 2005.
Na 2006 Edwin a cuminsa traha na Aruba Bank N.V. como CEO & Managing Director.
Durante e periodo di cuatro aña na Aruba Bank Edwin a sa di aporta na e mehoracion di e parti operacional di e banco y tambe e posicionamento di e banco local den nos mercado di cual el a eherce e funcion aki te dia 31 di maart, 2010. Edwin lo sigui traha na Aruba Bank pero riba otro nivel.
Durante su carera el a haya e opotunidad di sigui hopi curso y training, door cu semper el a mustra su boluntad pa haci esaki. Segun Edwin: “Pero alavez bo tin cu inverti hopi tempo di bo mes den e trabao cu bo ta eherce”. Edwin Tromp ta un “self made man” y cu su esfuerzo y dedicacion el a yega hopi leu.
Fuera di sigui curso nan localmente tambe Edwin a sigui cursonan bancario internacional manera; na Caracas, Miami, New York, Puerto Rico y Rio di Janeiro.
Edwin ta comprende e trabaonan di mas simpel, ya cu el a cuminsa for di abao den sector bancario y danki na su esfuerso, boluntad y motivacion el a yega asina leu den e mundo bancario.
No por keda sin menciona un aspecto importante cu durante su carera Edwin a keda eligi como “Hefe di aña” na 1992, esaki tabata durante cu e tabata eherciendo e funcion di Managing Director na First National Bank of Aruba.
Edwin a fungi como miembro di diferente organizacionan e.o., ABA y ATIA, CELA, MOT, SVB etc., y tambe organizacionan Deportivo. Locual cu Edwin ta gusta hopi ta su guitara, cual e ta toca ya pa hopi tempo caba y asina promoviendo e instrumento aki den diferente coro di misa y tambe tocando den Hospital durante Sacrificio di Misa pa enfermonan pa mas cu 23 aña caba.
Edwin su mensahe pa hubentud: “Hoben nan mester haci nan best, mester kier inverti tempo asina nan drenta den e proceso laboral. Tambe nan mester corda haci di nan trabao algo fructifero, mustrando nan stimacion pa cu esaki. Si encaso cu nan no ta gusta e trabao nan lo no traha cu smak y consecuentemente nunca na por yega na bay dilanti y yega leu”.
