Trudy Hassel, presidente Fundacion Let’s Talk
ORANJESTAD (AAN): Den entrevista cu Señora Trudy Hassel, presidente di Fundacion “Let’s Talk”, ademas comisario di polis, el a indica cu den Cuerpo Policial constantemente nan ta worde confronta cu hopi tipo di caso. Locual cu a resalta e ultimo tempo, cu e ta back den Cuerpo Policial, ta e cantidad di personanan cu ta tuma contacto cune tocante di abuso sexual, door cu pa basta tempo e tabata tin contacto cu Dr. Jeffrey Di Carlo.
Ora cu el a cuminza busca mas informacion, el a realiza cu Aruba ta den un problema. Si ta papia di añanan anterior manera 2002, 2003, 2004 cu tabata tin di 8 pa 10 caso pa aña y aworaki ta papia di 55 caso pa aña kiermen tin un aumento drastico di e problema, a manifesta.
Segun Sra, Hassel, Fundacion Let’s Talk tabata un tempo basta keto pasobra nan a ripara cu tabata tin basta fundacion cu tabata haci e mesun tipo di trabao cu nan tabata purba di haci.
A lamenta cu hopi cos no a worde haci manera cu nan tabata spera lo a worde haci. A señala cu e problematica di gang, por ehemplo, na cuminzamento ningun hende kier a kere cu na Aruba tin gang.
Poco poco ta ripara cu e hendenan a cuminza compronde cu na Aruba tin gang. No ta por nada tin 40 hoben cera den KIA awendia, a expresa.
Trudy Hassel ta kere cu ta basta y keda na banda sin haci nada pa wak kico despues ta sosode.
Pesey nan a dicidi di tuma e rienda atrobe pa pusha cierto proyectonan. Nan a cuminza cu abuso sexual di mucha y hoben. Asina nan ta purbando di wak si nan por haya un of mas persona cu lo kier haci un investigacion cientifico pa detecta un relacion directo entre abuso sexual, fisico, emocional di mucha/hoben na cas y nan baymento den gang, a informa.
Tin muchanan cu a indica esey cu nan tabata victima di abusonan y negligencia na nan cas y esey tabata un di e motibonan pakico nan a dicidi di join un gang, a bisa.
Nan kier a busca amigonan pa haya consuelo, etc, a agrega, pero mientrastanto esaki lo keda un tema cu lo mester papia riba dje y sake for di e esfera tabu cu e tin actualmente na nos isla caminda hopi biaha e hendenan no tin durf di papia, a manifesta.
Sra. Hassel ta bin luchando pa hopi anja sin apenas yudanza di ningun gobierno. Na unda a keda e Departamento di Asunto Social y esun di ensenjaNZA? Prevencion ta un palabra cu nan no ta conOce. Minister Winklaar tin un tarea pendiente pa pone orden den e Departamento di Asunto. Despues di Sra. Lopez Tromp Social nada a cambia pa miho.