Charla di autor Frank Martinus
ORANJESTAD (AAN): Universidad di Aruba ta ofrece un charla riba Diaranson 26 di mei 2010 cuminsando pa 7:30 di anochi. Titulo di e charla aki ta:”Niet de stier, maar de geliefde matador” / No e toro, sino e torero stima.
Den e charla aki e orador ta lansa e idea di un linguistica di situacion, un modelo nobo pa linguistica general.
E ta splica, cu den liguistica general di futuro mester tin mes of mas tanto atencion pa situacion cu pa e frase principal. E charla ta consisti di tres parti:
Parti I ta trata e prehuicionan, hopi biaha di un publico no of mal informa, relaciona cu por ehempel ausencia di articulo, declinacion of conhugacion.
Parti II ta splica di con por considera diferente atributo di idioma Europeo como di mas. Ehempel di esaki ta e distincion amplio di genero di palabra pa hende, bestia, mata y cos.
Den parti III e ta splica, cu e medio mas importante di idioma ta e situacion. P’esey e ta boga pa un structura di “topic-comment” en bes di e structura SVO (suheto-verbo-obheto). E orador ta Prof. dr. Frank E. Martinus.
Prof. Martinus a studia Nederlandse Taal- en Letterkunde na Leiden y Amsterdam. El a promove na 1996 na Amsterdam. Su disertacion “The kiss of a slave” ta trata historia di Papiamento.
E ta cofundador di Kolegio Erasmo, e school Humanista na Papiamento. Di 1981 te 1996 e tabata director di Instituto Lingwístiko Antiano (ILA). El a publica hopi riba tereno di linguistica, Idioma Crioyo y Papiamento. E ta famoso pa su novela “Dubbelspel” cu a mira luz pa prome biaha na 1973 y cu a conoce hopi reedicion.
Na maart 2009 el a keda nombra como Profesor pa linguistica, specialmente relaciona cu Papiamento, na Universidad di Antianan Hulandes (UNA).
E charla aki ta dirigi na publico en general y entrada ta gratis. E ta tuma lugar den Aula di Universidad di Aruba, situa na J.E. Irausquinplein 4, net dilanti Postkantoor na Playa. E charla lo ta na Hulandes y Papiamento.
