Diabierna, na Garufa Cocktail Lounge
ORANJESTAD (AAN): Marisela & Aquarius Band lo ta tocando na Garufa Cocktail Lounge Diabierna, 7 di Mei, di 10:00 p.m. pa 2:00 a.m.
Esaki lo ta Marisela su ultimo concierto na Aruba prome cu e cuminsa cu su gira mundial na Europa, y tur su fanaticonan ta invita pa ta presente y re-biba e tanto momentonan dibertido cu nos a pasa cu Marisela den transcurso di e añanan.
Amigonan, fanaticonan y amantenan di bon musica ta invita pa topa riba e pista di baile di Garufa Cocktail Lounge pa asina bay back den tempo y recorda dushi momentonan cu Marisela presentando hopi cantica conoci y hitnan Latino y Mericano hopi stima.
David Garcia, Garufa su Gerente, ta raporta, cu tur hende muhe lo ricibi un cocktail di bon bini y bo por confirma bo presencia na e ultimo concierto pa 2010 di Marisela & Aquarius Band, riba FaceBook.
Marisela ta na Aruba pa casi 8 aña caba, tocando cu su banda den varios club, y e ta un cantante regular faborito na Garufa Cocktail Lounge. Recientemente el a lansa su Single/Video Clip oficial cu un cantica titula: ‘SHE CONFIDENTIAL,’ for di su disco compacto di e mesun nomber, cual e tin plania pa saca mas despues e aña aki.
