Den cuadro di Renobacion di Bario
ORANJESTAD (AAN): Recientemente Gobierno di Aruba a tene un encuentro sumamente fructifero cu habitantenan di Dakota y Tarabana. Durante e encuentro aki e Team di Ministerio pa Asuntonan General a informa e habitantenan tocante e projecto “Bo Bario” y alabes a stimula e habitantenan pa participa activamente den renobacion di nan bario.
E habitantenan, igualmente cu a keda demostra den otro barionan bishita, ta sumamente preocupa cu e situacion social den nan bario, y ta sinti cu nan bario a wordo profundamente neglisha ultimo anjanan.
Apesar di gritonan di auxilio cu a resona, nunca tabata tin oido pa esaki.
Cu e plannan cu tin actualmente riba mesa, Gobierno di Aruba kier inicia mas pronto cu ta posible cu iluminacion den e barionan, cual lo percura pa disminui e criminalidad y percura pa mas seguridad den barionan.
Banda di esaki ta sumamente importante pa percura pa e habitantenan tin facilidadnan di recreo pa tanto hobennan como otro gruponan meta.
Un aspecto hopi importante ta e hecho cu Gobierno no kier bini cu projectonan sin un base amplio di sosten di habitantenan.
Pa es motibo aki e habitantenan ta wordo envolvi den e actividadnan di cada bario.
E aspecto social den nos barionan ta uno cu ta hunga un rol hopi importante y mirando cu riba e tereno aki tabata tin hopi negligencia ultimo anjanan, esaki ta un aspecto cu mester di atencion urgente y mas dirigi riba e necesidad di cada persona.
Esaki ta rekeri naturalmente un vision profesional progresivo, pero tambe e envolvimento di e ciudadano mes, pa trece solucion den forma conhunto.
Den esaki e habitantenan a bini cu diferente sugerencianan y iniciativa pa cu e problemanan cu ta rekeri atencion.
Ta sumamente positivo pa remarca cu e habitantenan ta sumamente consiente cu Gobierno mester di e aporte di cada habitante pa logra cosnan grandi pa e bario.
Pa es motibo aki hopi atencion ta wordo duna durante e encuentronan pa motiva habitantenan pa sinti nan mes responsabel pa cu nan bario, pa consequentemente hunto jega na actividadnan cu ta na bienestar di e bario.
Ta bon pa menciona, cu durante e encuentronan aki, e habitantenan tin tur espacio pa expresa nan mes libremente.
E habitantenan ta demostra tambe cu nunca antes nan a hanja e oportunidad pa duna nan aporte manera actualmente ta e caso.
Te cu awor e Team encarga cu e encuentronan aki a bishita mas cu mitar di e 21 barionan di atencion cu a wordo escohi den e prome fase di Renobacion di Bario.
Den e dianan nos dilanti e team lo sigui cu e encuentronan den Bario, pa acumula informacion serca e habitantenan pa consequentemente e departamentonan cu tin brinda servicio por hasi esaki den forma adecua y dirigi na e habitantenan.
