Un otro astro di futbol Hulandes a yega Aruba…
y awe lo bay rindi homenahe na nan!
ORANJESTAD :– Dialuna durante ora nan di dia, pa mas o menos 1or di merdia pa ta exacto, e parha blauw elegante a aterisa riba nos dushi isla di Aruba y manera semper cu hopi turista europeo abordo cu a bin pa relaha y disfruta di e paraiso bunita aki. Meymey di tur esnan cu a yega Aruba ayera riba e vuelo di KLM, tambe tabata tey presente un otro astro di e selección di e equipo di futbol Hulandes, esta Andre Ooijer cu a bin hunto cu su famia pa disfruta di nos paraiso.
E hungador famoso aki di 36 aña di edad cu a caba di colga su sapatonan pa weganan internacional, tambe a responde positivamente riba e invitacion di Gabinete Mike Eman, pa bin Aruba relaha y disfruta completamente di e paz y trankilidad cu nos pais sa di ofrece na tur su bishitantenan.
Cu e yegada aki di Andre Ooijer, e ta bira e di cuater strea di futbol di e selección Hulandes y sub campeonan di mundo cu a dicidi di bin Aruba pa pasa su vakantie.
Mirando e echo cu na e momentonan aki Aruba tin cuater di top hungadornan di pais Hulandes di bishita, Prome minister Mike Eman y minister Otmar Oduber ta extende un invitacion cordial na e pueblo di Aruba completo pa tey presente awe diamars, na Café de Plaza caminda cu pa 6or di atardi lo cuminsa un celebracion na honor di e cuater hungadornan cu tey riba nos dushi pida baranca, esta van Bommel, Kuyt, Robben y Ooijer pa cu nan tremendo logro den e mundial 2010 como tambe pa duna na nan e palabranan di gradicimento pa escoge nos pais Aruba como nan destinacion pa nan vakantie despues di nan trajectoria largo na sur Africa.
Riba foto por mira momento cu e ministernan di Gabinete Mike Eman a bay ricibi e astro di futbol Ooijer y su famia, cu a yega ayera riba vuelo di KLM na aeropuerto internacional Reina Beatrix.
