Accion di Bombero na Bakval!
ORANJESTAD (AAN): Tin algo raro a socede Diahuebs anochi na Aruba. Diripiente candela a start den area di Malmok, y despues ata uno na Bakval. Esun na Malmok, tabata den area patras di famia di Ministro Richard Visser. Esaki tambe a crece y bira grandi! Diahuebs anochi Alarm central via su lina di emergencia 911 ta haya diferente yamada bisando cu na un address na Bakval 7-J tin un cas na candela. Mesora a despacha e personal riba warda, y tambe a desvia Bomberonan na Malmok pa bay na esaki.
Esey ta debi cu na prome informe, a drenta cu tin hende pega den e cas na halto. Na yegada di e unidad di Brandweer, nan ta constata cu enberdad tin un camber y un pida patio na candela na e di dos piso di e cas. Mesora a bay over pa drenta den accion y combati e candela mas liher possible cu e materialnan mediocre cu nan tin disponible.
Ta worde menciona mediocre, ya cu e Trucknan ta falta di hopi mantencion, luznan cu no ta cende, pumpnan cu no ta optimal y e mes un Truck cu no ta completamente den bon condicion pa trabaonan grandi.
Como cu casi no tin Bombero disponible, a opta pa laga e candela na Malmok sigui kima su so, bira aun mucho mas grandi. Cos increible cu ta pasando den 2010 na Aruba.
E cas segun cu DIARIO a worde informa ta di Dr. de Cuba y causa di e candela lo worde investiga. No ta conoci si a cera Airport of a tuma e risico pa mantene habri cu solamente 2 a 4 personal cos cu no ta acceptable pa ICAO.
Cu otro palabra, a tuma Gobierno anterior 8 aña pa trata di drecha e departamento di Brandweer sin cu a logra esaki y mester a bay cas, awor ta toca turno na e Gobierno nobo pa proba cu nan si lo pone atencion na e departamento di Brandweer cu tin falta di hopi atencion, personal nobo y material pa traha cune.
