ORANJESTAD (AAN)– Prome-Minister di Antiyanan Hulandes, señora Emily de Jongh-Elhage y Prome-Minister di Aruba, sr. Mike Eman, a bira miembronan honorario di Sociedat Bolivariana de Curaçao. Esaki na ocasion di 227 aña di nacimento di Libertador Simon Bolivar y na ocasion di 73 aña di fundacion di Sociedad Bolivariana de Curaçao. A honra tur dos mandatario diasabra anochi durante un atardi y anochi placentero den sede di Sociedad Bolivariana riba Scharlooweg/Simon Bolivar Plein. Na e ocasion aki tabata presente ademas Consul-general di Venezuela, Consul-general di Colombia, varios miembro di cuerpo di consul di Curaçao mientras cu durante e mesun anochi a duna sr. Lio Capriles e maximo condecoracion di e Fundacion. Durante mesun ocasion a pone krans tambe na busto di Simon Bolivar.
Esnan ku a pone krans tabata entre otro Prome-Minister Emily de Jongh-Elhage cu Minister di Husticia Magali Jacoba na nomber di Pueblo y Gobierno di Antiyanan Hulandes, Prome-Minister di Aruba y funcionario protocolario Allan Goede na nomber di Pueblo y Gobierno di Aruba, Gezaghebber Lisa Dindial na nomber di Bestuurscollege di Corsou.
