Campañadonan y sostenedonan ta recorda awe
ORANJESTAD(AAN)–: Awe ta net un aña pasa cu actual Minister President, mr. Mike Eman a introduci Michelle Hooyboer-Winklaar den arena politica. Den e discurso di e lider di AVP, durante e lansamento di Sra. Michelle Winklaar como politico, el a bisa: Rara bes bo ta haya tur combinacion hunto den un solo persona: Consenshi, Celebro y Curason. Sra. Michelle Winklaar cu su dos yiunan chikito den su brasa, su famia y amigonan para banda di dje a acepta e reto. E tabata sa cu Aruba ta den su momentonan crucial y historico.
Sra. Michelle Winklaar no a nace na Aruba, pero a nace di un mama Arubiano y tata Boneriano.
E ta casa cu un Arubiano y tin dos yiu Arubiano.
E dia di su lansamento el a bisa: “Bo no por scoge unda bo ta nace, pero si na unda bo kier biba”.
Tambe el a bisa cu tin biaha bo mester yuda crea algo cu bo kier forma parti di dje. Y a yega tempo pa crea un miho Aruba. Sra. Michelle Hooyboer-Winklaar a sinti cu e mester haci algo y no para na banda mira otro laga Aruba bay atras. Cu curashi, balentia y determinacion el a retira for di su carera exitoso pa duna Aruba un man.
Masha poco hende tin e briyo pa laga nan profesion un banda y sacrifica nan mes pa nan pueblo.
Den apenas 2 luna di tempo, su sinceridad, su curason, su profesionalismo y su manera social a logra obtene no menos di 1078 voto di confiansa! Esaki sigur ta algo mahestuoso siendo pa prome biaha den politica y solamente apenas 2 luna campañando! Introduciendo un sistema di hiba campaña diferente, un sistema profesional, honesto y dinamico a hiba Michelle Hooyboer-Winklaar na e logro grandi aki. Awe e ta e unico Minister hende muhe cu ta representando e hende muhenan den Gabinete Mike Eman.
Un Minister hende muhe dinamico, balente, capacita y cu curason. Pa hopi tempo Aruba no a conoce uno igual. Esaki sigur ta sirbi como un bon ehempel pa esnan cu lo mester sigui.
E manera con Michelle Hooyboer-Winklaar a haci su debut den Parlamento durante tratamento di su presupuesto por ta un bon ehempel pa su contrincantenan siña for di dje.
Na un nivel halto, obhetivo y practico el a sa di trece su maneho y vision padilanti. Minister Michelle Winklaar a demostra cu e ta un Minister di presente y no un persona cu a keda pega den pasado cu no lo yuda Aruba na nada.
Dilanti so e ta wak, trahando riba metanan concreto pa desaroyo di nos pais.
Porfin Aruba tin un Minister hende muhe cu ta dedica alma y curason na su trabou.
AVP ta agradecido na Prome Minister Mike Eman cu a sa di descubri tur e talentonan aki den un solo hende y aserk’e pa forma parti di su team.
Den menos di 8 luna, e team aki a sa di logra hunto, mas cu e Gobierno anterior a logra den 8 aña. Un team cu hunto ta trahado pa un miho Aruba.
Minister Michelle Winklaar ta trahando pa trece cambio den e sistema di goberna Aruba, haciendo esaki cu hopi amor y dedicacion. Y ta reflexiona tur dia kico lo ta e miho decisionnan pa e pais.
E ta determina pa forma parti di e progreso di Aruba y yuda e interes general.
No ta por nada cu den menos di 2 luna como Gobernante, ya tur hende por a mira kico ta su vision y determinacion pa futuro.
Pa esaki el a wordo honra como “Woman of the Year.” Riba e dia ey el a menciona cu e no ta diferente na ningun otro hende muhe. E tambe ta un mama, e tambe ta un yiu, e tambe sa hari y tin biaha e sa yora tambe. Pero e tin un vision cu e ta ehecutando y ta spera di por sigui conta cu sosten di tur hende den comunidad.
Den menos di 8 luna gobernando cu apoyo di su colega ministernan el a logra trece cambionan grandi pa asina concretisa su maneho na unda cu nos hendenan a bira central.
Algun di e logronan:
Aumento di 25% di onderstand;- Introduccion di schoolkindtoeslag di Afl. 100 pa luna; – Restructuracion di Directie Cultuur y Directie Sociale Zaken pa un miho esfera laboral y miho servicio na comunidad; – Introduccion di Programa di Guia hunto cu AIB pa companianan chikito y mediano;- Introduccion di Unicef pa Aruba.
– Introduccion di sistema di cooperacion cu National Park Services di Merca – Introduccion di cooperacion entre OPIC (compania pa stimula inversion) y Aruba – Introduccion di cooperacion entre John F. Kennedy Center for the Arts – Hunto cu e comison nobo di UNESCO y Parke ta trahando duro pa pone Parke Nacional Arikok riba World Heritage List y pa pone nos Dande riba lista di “World Heritage / non-tangible”.
Segun e partido berde, nan sa cu tin hopi reto mas su dilanti, pero ta convenci cu e lo sa di logra esakinan tambe hunto cu su team dinamico, departamentonan di su ministerio y como tambe e NGO nan.
AVP ta felicita Minister Michelle Hooyboer-Winklaar cu su prome aña den politica ya cu el a sa di tuma esaki na serio, cu determinacion y amor pa pais Aruba.
Na Minister Michelle Hooyboer-Winklaar AVP ta bisa “Danki pa tur locual cu bo ta haciendo pa bo comunidad. Nos ta spera cu Dios lo bendiciona bo cu energia, creatividad y salud pa bo sigui sirbi bo pais pa hopi aña mas”.
