Debi na actitud di Gabinete Oduber:
ORANJESTAD (AAN) — “Cambio di Estatuto” ta otro tema cu drs. Andy Lee a toca. El a bisa cu pronto lo worde trata den Parlamento e cambio di Estatuto, y den esaki loke Staten por haci ta acepta of rechaza e cambio. Drs. Lee a splica cu e proposicion di Ley pa cambionan den estatuto, por a tuma lugar den Tweede Kamer, unda cu Aruba tambe a haya representacion. Aruba a bay Hulanda cu un grupo di Parlamentario di tur fraccion pa trata e asunto menciona, y den tratamento di e leynan concerni a trece algun cambio den estatuto.
Un di e cambionan ta den articulo 27 lid 3 y 4, unda tur partido a para riba e mesun linea, cu e no ta necesario. Pero el a drenta den Estatuto tog, y e idea tabata pa cambia dicho articulo.
E ley aki ta encera cu ora cu como pais bo ta acepta un of mas tratado internacional y bo no ta implementa esakinan, Hulanda por interveni y bin cu un ley y obliga bo pa implementa e mesun tratado aki, cu bo a acepta, den tur bo autonomia.
Tur fraccion a entrega nan amienda, pero lamentablemente nan a worde rechaza y e cambionan no a tuma lugar. Esaki a trece cune cu e proceso a sigui cana, e ley a bay Eerste Kamer, unda no tin opcion mas pa haci cambio ya cu solamente den Tweede Kamer por a haci amiendanan riba e ley. Na Eerste Kamer solamente por a acepta e ley of rechaze y mande back pa Tweede Kamer.
E ley a worde acepta y aworaki e ta biniendo Aruba, segun drs. Lee a splica.
E Parlamentario a reitera cu ora un pais di Reino ta acepta un tratado den su autonomia, pero ta keda sin implemente, Hulanda ta interveni, y esaki ta sosode tambe ora e pais ta bisa cu e no ta haci nada pa aplica e ley y tampoco ta pidi Hulanda ayudo, ni busca otro caminda pa implementa e ley.
Drs. Lee a bisa cu e pregunta ta si bo ta perde autonomia, y esaki ta un inkietud cu tin na Aruba, y el a subraya cu e situacion aki ta resultado di e maneho cu a worde hiba durante añanan.
Na Momento cu Antiyas a dicidi cu e ta bay foi otro, a cuminza sinta na mesa cu Hulanda. Cada entidad, esta Curacao, Sint Martin y e Islanan BES a sinta pa wak con nan ta bay traha hunto.
Pero Aruba a scoge pa keda pafo di e desaroyo aki, y ora di scoge esaki cosnan por pasa cu ta afecta nos pais, sin cu e tin influencia pasobra e no ta participando.
E pregunta aki a worde haci na ex-minister presidente Oduber, tempo cu e situacion a surgi, unda cu drs. Lee mes a haci e pregunta durante un tratamento di presupuesto, riba e pakico Aruba no ta participa y si e cambionan cu worde haci por a afecta nos pais.
Oduber a bisa, drs. Lee a splica, cu tin garantia cu lo no tin efecto, pero aworaki por mira con Aruba ta haya su mes cu situacionnan asina, cu un ley indeseable cu pasa no por a stop’e pasobra gobierno anterior no kier a participa. Y si awor kier a stop e, na final, ya afspraaknan a worde haci caba, entre paisnan cu derechonan di autonomia ta na caminda, y cu ta paisnan cu a coopera cu Aruba tempo cu nos pais a haya su autonomia, y awor nos no por bay stroba nan.
Lee a splica cu Aruba ta trahando pa un mehor cooperacion, y no por bay stroba e futuro di Pais Curacao y Sint Martin, ya cu por keda sin acepta of biba cu e situacion.
