Andin Bikker
ORANJESTAD (AAN)* Segun Andin Bikker, pueblo ta harta y fada cu e racha di ladronicia cu ta azotando nos isla. Cu sosten na e accion di firma pa ley di defensa propio pueblo ta dunando un mensahe cla y raspa cu algo mester wordo haci. No por ta asina cu bo ta traha duro pa yega na bo pertenencianan manera television, set di muebles, computer, camera, joyas etc. etc. y ladronan ta drenta den bo cas y den un rato clean up bay cu tur bo pertenencianan. Anto si bo mester defende bo mes ta abo tin chens di wordo deteni. Esey no ta husto: ta e malhechor mester wordo castiga no e ciudadano cu ta wordo horta of agredi den su propio cas of negoshi.
Diasabra 16 di oktober di 4 pa 6’or di atardi mr. Andin Bikker lo ta na Rowigini’s Plaza na Sta. Cruz pa sigui colecta firma pa e ley di defensa propio. Na Corsow, Sint Maarten, Boneiro, Saba y Sint Eustatuis e ley ta un hecho caba y na Hulanda e gobierno nobo ta bay introducie den apenas un par di siman. Na Merca e ley ta un hecho pa mas cu dos siglo caba na entre otro e estado di Florida.
Entre tanto aki na Aruba como 9 mil firma a wordo colecta y tin centenares di email y mensahenan via facebook cu ta duna sosten na e initiativa.
E iniciador di e ley na Corsow, sr. Dudley Lucia, a bay di acuerdo pa den un futuro cercano bin duna un presentacion riba con e ley ta funcionando na Corsow. Diasabra en todo caso ta bay tin copia di e concepto di ley pa esnan interesa y splicashon amplio con e lo funciona den nos systema legal.
