ORANJESTAD(AAN): Recientemente na corte ora cu un abogado a presenta na corte pa defende su cliente y e cliente no a presenta, huez a pidi e abogado si su cliente a apodere por escrito, pa e represente. Ora cu e abogado a bisa cu e no a ricibi nada por escrito, pero cu el a representa e persona durante e periodo di su detencion, e huez a bise cu esaki no ta suficiente pa e representa e persona. Ora un persona cay cera y e no por paga pa un abogado, e ta haya uno apunta y e abogado ey ta haya 300 florin pa representa e persona. Asina varios abogado ta defende sospechosonan pa 300 florin, siendo cu hopi biaha nan ta traha oranan largo riba e caso pa defende e acusado debidamente.
Ora un acusado no presenta dilanti di huez y e abogado si, semper tabata asina cu huez tabata ‘verleen verstek’ y e caso tabata wordo trata, mientras cu e abogado tabata wordo permiti di representa e persona, sin mester mustra por escrito, cu el a wordo apodera.
Ta djis bisa e abogado mester a bisa e huez cu e ta representa e persona y asina e tabata hasi esaki y despues e por a cobra e 300 florin. Awor diripiente hueznan a cuminza pidi e abogadonan den casonan unda e acusado no a presenta, pa nan tin por escrito cu nan ta encarga di representa e persona.
Hopi biaha ora un acusado wordo laga den libertad pendiente di tratamento di e caso, nan no ta worry mas pa keda den contacto cu e abogado of skirbi un carta pa apodera e abogado pa continua.
Tin biaha e acusado ta presenta dilanti di huez y tin biaha e ta keda sin bin. Pesey diferente abogado awor no ta di acuerdo cu e maneho nobo cu hueznan ta hibando. Ta asina cu articulo 52 lid 2 di e asina yama ‘Advokatenverordening’, ta bisa cu cualkier persona por representa un sospechoso na corte, cu e condicion cu e persona aki wordo apodera por escrito pa hasi esaki.
Lid 3 di e mesun articulo ta bisa sinembargo cu un abogado inscribi como tal, no tin mester di wordo apodera por escrito.
Su palabra ta suficiente. Mirando e maneho nobo di hueznan, tin abogado cu no ta presenta mas na corte, si e sospechoso no a tuma contacto cu nan.
Si nan no haya contacto cu e sospechoso, esey kiermen automaticamente cu nan no a wordo apodera por escrito y esey ta pone cu e huez lo no permiti nan presenta e persona, pues pesey e abogadonan a dicidi di no presenta mas den casonan asina. DIARIO a compronde cu pronto e hueznan lo reuni cu e abogadonan pa discuti tocante esaki.
