ORANJESTAD (AAN)* Aña 2010 ta clausura den un situacion economico mundial un poco mas positivo cu un aña pasa. Poco a poco economia mundial ta mehorando, pero no tur caminda cu mesun rapidez. Na Estadonan Uni, un crecimiento modera di GDP (2.6% den di tres cuartal) ta motivo pa algun optimismo, sin embargo por observa cu no tin ainda un mehoracion den cifra di desempleo cu ta mantene su mes
na 9.8%.
Na Europa por mira un panorama mixto, unda desaroyo fuerte den país manera Alemania ta tuma lugar simultaneamente cu problema financiero profundo na Irlanda, Portugal y posiblemente Spaña, unda no tin suficiente control riba gasto publico excesivo. Mas y mas tambe escenario economico mundial ta sinti presencia di e gigantenan nobo, manera China, India y Brasil, unda ta existi un mercado di clase media creciente, cual ta percura pa un demanda grandi di producto petrolero.
Esaki tin influencia riba demanda mundial di petroleo, manteniendo prijs di crudo na un nivel halto, irespecto e situacion ambivalente na Estado Uni y Europa. Mientras aña 2010 ta cerando cu prijs di crudo riba US$ 90 pa bari, expectativa ta cu pa 2011 lo mira prijs bay den direccion di US$ 100 y mas. Tin un preocupacion grandi entre observadornan cu un aumento drastico di prijs di crudo por deshaci di e crecimiento economico fragil cu ta tumando lugar actualmente y lo continua na 2011.
Na Aruba, situacion economico a conoce un mehoracion leve durante 2010, compara cu 2009. Esaki ta visible den cifranan di turismo publica te awor. Sin embargo, tin otro indicador cu ta mustra cu e mehoracion aki no ta general, ya cu importacion a bay atras y consumo priva igualmente.
For di e cifranan di registro di negoshi nobo di KvK, cu ta acompaña e relato aki, por deduci cu nos ta manteniendo prácticamente e mesun nivel di 2009. Mientras na 2010 (te cu dia 24 december) a registra
un total di 1155 negoshi nobo, aña 2009 tabata na 1138 registracion. E añanan anterior tabata mustra registro di 1355 (2008) y 1377 (2007). Por conclui cu nos economia a conoce un paro den e deterioro cu a tuma lugar na 2009, sin embargo nos no a logra regresa na e nivel mas halto di e añanan anterior ainda, unda a registra alrededor di 200 empresa mas pa aña.
E impresion ta cu nivel di inversion priva ta kedando atras ainda, a pesar cu Valero a inicia inversion pa realiza reapertura di su refineria y a emplea personal di contratista cu a perde nan trabao na 2009.
Posicion financiero gubernamental ta keda un preocupacion mayor cu por refleha riba economia.
Na 2010 entrada di impuesto di gobierno a baha considerablemente, cu tabata di spera a base di reduccion di BBO. E entrada extra di parti di Valero (BBO) ta compensa pa e aña aki, y ademas gobierno a recuri na emision di bonds na un valor total di Afl. 324 miyon. Cu e perspectivanan modera pa aumento di entrada di impuesto na 2011 y probable falta di ingreso grandi adicional incidental, ta haci cu 2011 lo bira un aña dificil, sigur tumando na cuenta cu no tin un reduccion di gasto di gobernacion na vista, loque ta obstaculiza capacidad di gobernacion pa atende otro compromiso financiero existente, manera pago di interes riba debe, y aporte di gobierno na AZV.
Perspectiva 2011
Resumiendo, por spera pa aña 2011 un crecimiento economico modera, pero dependiente di loque lo sucede na nivel internacional, especialmente den economia ameriano. Tambe ta depende di desaroyo di otro mercado turístico, manera Europa y America Latino, unda specialmente Brasil ta experimentando un crecimiento impresionante, cu por resulta den mas turismo. Tambe un que otro lo
depende di e grado di actividad cu e refinería lo genera una vez cu esaki ta den operacion. Por lo demas, no ta mira ainda un diversificacion na caminda di actividad economico nobo cu lo significa un diversificacion di nos economia.
Pa e clima di inversion y optimismo empresarial ta sumamente necesario pa mantene e Dialogo Social, cu den su promer vuelta na 2010 a yega na acuerdonan valioso pa economia di Aruba. Sin embargo, esaki no ta suficiente y mester sigui elabora riba varios tema di interes pa comercio e industria, manera agilización di e procesonan di lanta negoshi. Tambe nos regimen fiscal mester un revitalizacion drastico,
sigur mirando kico ta sucediendo cerca nos rivalnan den region manera Bonaire. Tambe ta importante continua dialogo pa resolve a fondo nos problema di envehecimento y su consecuencia pa nos fondonan di pension. Acuerdonan strategico riba e terenonan aki lo crea confianza den economia, tambe cerca e institucionnan internacional cu ta evalua Aruba su credibilidad financiero. Esaki ta di suma importancia mirando cu acceso na credito externo ta un necesidad, mirando cu por lo pronto ainda lo no tin un presupuesto balanza na horizonte.
