ORANJESTAD (AAN): Sinterklaas lo ta di bishita atrobe e aña aki den Caya Principal di Oranjestad. MAMBO ta contento di por ricibi Sinterklaas e aña aki atrobe, companja cu tur su 10 pietnan, diasabra 4 december for di 3pm te cu 4pm.
E association di commerciante a prepara un atardi hopi ameno pa Sinterklaas y ta invita henter pueblo di Aruba y tur muchanan bin salude y join Sinterklaas.
Caya lo ta sera pa trafico pa facilita Sinterklaas cu su pietnan. Nan lo haci un paseo for di 3’or te 4’or di atardi, cuminsando y canando na pia for di La Linda di mucha te Djiespie’s Place.
Na skina di Djiespie’s place lo tin un show gratis di Pierewietje “live”, cu mayoria canticanan di Sint & pasco pa 3:30pm. Pa 4’or lo tin un fiesta special pa Sint den Arcades Playgrounds, y pa participa lo mester paga solamente Afls. 16.00 pa mucha.
Naturalmente MAMBO ta contento di tende cu Sint y su pietnan lo haci nan compras tambe den Caya Principal. MAMBO ta gradici pueblo di Aruba cu ta sigui haci nan compras den Caya Principal den e temporada di fiesta. E siguiente dia di compras lo ta dia 11 & 18 di december acompanja cu gaitas y hopi ambiente.
