Na Bogota…
ORANJESTAD (AAN): Na Colombia si, Ministerio Publico no ta haci wega! Ey si tin cos!
E siman aki, un atraco masha mahos mes a socede na un Supermercado! Dos ladron a drenta, y a bay na e Cahera y asina a demanda pa duna placa.
E cahera a bay den panico, y mirando un arma di candela apunta den su cara, el a cuminza grita.
Aki el a bira su cara, y habri su boca pa grita, net ora cu e ladron a dispara! Su boca tabata habri, y e bala a pasa door-en-door di su cara! El a perfora un banda, pasa mey-mey di su boca (sin kibra ni un diente), y sali back na otro banda.
Despues di esaki e delincuentenan a core sali bay, keriendo cu nan a mata e cahera.
Videocamera di seguridad a graba tur esaki, y danki na esey autoridad a logra captura e dos ladronnan aki.
Nan a worde acusa awor di Intento di Robo, Posesion Ilegal di Arma, Intento di Atraco, y Intento di Asesinato.
Cada uno di e cargonan aki por conta cu un maximo di 450 luna di prison.
Cu e castigonan mas pisa aki, bo por bisa cu na Colombia si… asina si bo por combati delincuencia!
Colombia ta haci algo bon! No na Aruba, unda bo ta djis haya castigo di 3 luna, y pa colmo nan ta bay den welga pasobra luz di spotlight ta bay den cel!
Just, aki na Aruba ley ta favorese delicuente! nan tuma ehempel ariba e caso aki y cuminsa cambia ley pa caba! Asina por tin husticia!