Mensahe di Presidente di Parlamento drs. Paul F.T. Croes;
ORANJESTAD(AAN)—Dia 25 di Januari Aruba completo ta celebra e fecha natalicio di un di e politico y estadistanan mas grandi di nos historia. Betico a nace un 25 di Januari 1938 pa crece bira un figura impresionante no solamente na Aruba, sino tambe internacionalmente. Betico a logra culmina un lucha cu a wordo hiba pa hopi ana.
Un lucha pa separacion for di e constelacion di Antias Hulandes. Betico ya no ta un figura politico mas, sino a bira un figura y un simbolo nacional. Betico a keda marca den nos historia como un luchador cu a logra cambionan grandi pa nos pais.
E forma cu Betico a sa di convence henter un pueblo, pa sigui su vision, y apoya esaki ta impresionante. No ta facil pa haya henter un pueblo pensando den e mesun direccion, esaki ta locual Betico por a hasi. Aruba tabata en busca di un identidad y Betico a aporta sigur na esaki.
Cu e celebracion di dia di Betico, nos no por laga afo e celebracion di 25 ana di Status Aparte. Un celebracion di Aruba como pais autonomo den reino Hulandes. su identidad y desaroyo. Un celebracion di cu mester ta considera un momento di refleccion pa nos tur na Aruba. Ta un bon momento pa hasi un evaluacion di tur locual nos a hasi bon, y mehora locual no a bai manera nos ta desea. Aruba a conoce un crecemento economico y demografico grandi desde cu nos a haya nos status autonomo. Un estadista manera Betico Croes sigur a mira posibilidadnan enorme pa nos pais na momento cu nos drenta e fase nobo aki. E Status Aparte a hasi e toma di desicionnan importante y crucial mas serca di cas. E desicionnan tabata keda tuma awor dor di nos mesun gobierno. Den nomber di Parlamento di Aruba, mi kier a expresa palabranan di felicitacion na henter e pueblo di Aruba pa cu celebracion nacional di Dia di Betico. Ban celebra e dia aki en grandi y conta nos jovennan e motibonan di celebracion di e estadista grandi aki.
E mensahe pa cada joven aki na Aruba ta pa sigui ehempel di e figura nacional aki, cu locual bo pone bo dilanti como meta bo ta logra esaki si bo tin e conviccion den esaki. Na henter famia di Betico pabien, y pabien na Aruba en general!
