ORANJESTAD (AAN): Na Cas di Aruba a tuma lugar Diabierna 21 di Januari 2011, na vispera di Dia di Betico, un ceremonia pa recorda e fecha di natalicio di Sr. Gilberto Françoise “Betico” Croes, politico y estadista Arubiano.
E programa a cuminsa cu cantamento di nos himno nacional‘Aruba Dushi Tera’.
Minister Plenipotenciario sr. Edwin Abath a inicia su discurso cu e frase ‘E retonan di ayera, ta e logronan di awe y e logronan di cada un di nos ta orguyo di nos tur. Sr. Abath a menciona e importancia di sr. Betico Croes pa e logro di Status Aparte y cu na anticipacion di e fecha natalicio di 25 di Januari ta e momento husto pa para keto na e logronan di awe.
‘Betico Croes den su contexto di tempo a logra pa finaliza y culmina e lucha cu pa hopi tempo a existi y a biba den e curazon di e Arubianonan. Un lucha cu no ta basa ariba interes commercial, no ariba interes politico, pero un lucha cu a biba den curazon di e Arubiano pa determina su mes, e futuro di su pais, e futuro di su yiunan y e generacion cu ta sigui,’ asina sr. Abath a bisa.
Segun e mandatario esaki a traduci su mes den un sentimiento di orguyo cu na 1986, prome di Januari, Aruba a logra di ta pais autonomo den Reino y cu esaki ta e culminacion di un lucha cu a dura mas di sesenta aña. ‘Pesey un fecha asina y tambe ariba un fecha manera 18 di Maart nos tur ta di hubileo, los di nos afiliacion politico; los di cualkier preferencia cu nos por tin, nos como Arubiano, e ser Arubiano no solamente esnan cu ta bisa di ta Arubiano, pero en general tur esnan cu a contribui na e exito di Aruba y tur esnan cu den nan curazon ta sinti cu nan ta Arubiano. Nos tur cu a sinti cu e logronan aki a habri caminda pa nos por logra exitonan grandi pa nos pais.’
E mandatario a bisa cu den e aña aki cu Aruba ta celebra 25 aña di Status Apart e ta un motibo grandi pa mira atras y mira con aña pasa paisnan nobo a logra e status aki, diferente cu Aruba, pero sinembargo esaki ta duna di compronde cu Aruba a cana dilanti y cu Aruba ta hopi conciente di su balornan y locual e isla kier a logra pa e generacionnan. ‘Mi ta pone enfasis ariba e fecha di natalicio, pasobra mescos cumi, mi ta kere cu bosonan ta di opinion cu mester celebra bida di un persona y no su desaparicion. Laga nos celebra e bida di esnan cu a haci logronan grandi pa nos pais. E bida cu a conduci na e logronan aki y esey ta e hecho pa celebra,’ asina sr. Abath a bisa.
Minister di Salubridad y Deporte sr. Richard Visser tambe a enfatisa den su discurso e importancia di sr. Betico Croes pa cu Aruba. ‘Nos tabata tin visionarionan na Aruba y sr. Betico Croes ta un di nan cu a pone nos 25 aña dilanti di nos hermana islanan y cu nos a probecha di esaki te awor aki. E ta motibo si cu nos mester keda dilanti. Mi ta kere cu nos como Aruba semper ta luchando den e mesun manera suave y humilde di nos pueblo, pero semper cu vision. Mi ta kere cu nos mester sigui bringa pa esaki,’ asina sr. Visser a bisa.
‘Mas cu nunca den nos economia; den nos status cu nos ta awor, den nos region, nos mester bringa pa keda dilanti. el a bira atrobe un lucha di sobrebibi y mi ta haye mas un lucha pa excelencia. Mi ta kere cu awe ariba e dia aki recordando un di nos heroenan, nos tur mester para un rato unda nos ta hiba Aruba den e proximo 25 of 50 aña; pa e futuro generacionnan. Con nos ta bay cuida nos hendenan; con nos ta bay haci e pueblo di Aruba un pueblo mas fuerte; muchanan cu ta crece, studia y pone e pueblo di Aruba ariba mapa. Esaki ta un responsabilidad di nos tur; un responsabilidad di nos banda ta pa mustra e futuro generacion e pasonan cu nos kier pa nan cana,’ segun Minister Visser.
Despues di esaki Minister Plenipotenciario sr. Edwin Abath y Minister di Salubridad y Deporte sr. Richard Viser a pone flor na e busto di Betico Croes na Cas di Aruba.
