MEP: Mas Medida Contra Empleado Publico
ORANJESTAD(AAN)– Den medionan di comunicacion por a tuma nota di un supuesto areglo cu Gobierno a core firma cu APFA riba dia 31 di december. Esaki aparentemente ta un areglo devastador pa e empleado publico. Esaki ta e coronacion di e medidanan di gobierno contra e clase trahador.
E producto di Dialogo Social tabata un paquete di medida cu a keda implementa. Den e medidanan aki esnan mas afecta ta e clase trahador, y muy en especial e empleadonan publico, y mas tristo, esaki a keda cumbini cu cooperacion di algun Sindicatonan, cu excepcion di algun Sindicato cu si a keda sostene nan miembronan!
Nos tur por corda con cierto Sindicatonan, encabesa pa SEPA y dirigentenan di FTA pa pone Aruba plat pa motibo di indexering algun aña pasa. Awor cu derechonan adkiri di trahadornan ta wordo elimina, ningun di e Sindicatonan ey ta grita!!
Aki ta mustra claramente cu e Sindicatonan aki ta comprometi y ta sirbi interes di gobierno en bes di interes di nan miembronan.
E areglo cu a wordo firma dia 31 di december a wordo teni secreto pa Parlamento. Den Parlamento dia 30 di december algun Parlamentarionan a pidi mas informacion riba e medidanan relaciona cu APFA, pero gobierno a prefera pa no duna informacion y a prefera pa core firma areglo cu APFA dia 31 december.
Esey tabata un di e motibonan pakico MEP no por a duna Gobierno e check den blanco pa pasa tur su medidanan, pasobra Gobierno no ta transparente. Pa colmo, ni e propio empleadonan publico mes tabata sa di e areglo ey, ni nan Sindicatonan!
Mientras Gobierno ta sconde tras di e Dialogo Social, ta sigui manda medidanan riba pueblo, cu cooperacion di AVP, y sosteni pa algun miembro di oposicion.
Fraccion di MEP a manda pidi e areglo ey y ta di spera cu Gobierno awor si manda tur informacion pa Parlamento, y ta spera cu Gobierno ta mas transparente cu e empleado publico, cu ta e curazon di e aparato gubernamental y sigur merece un trato mas mihor!
