Ultimo oportunidad pa bishita Expo “Rancho” na Museo
ORANJESTAD (AAN): Salanan di exposicion di Museo Arqueologico Nacional Aruba lo ta habri pa publico dia 25 di Januari proximo, riba celebracion di Dia di Betico. E dia aki tambe ta e ultimo oportunidad pa bishita e exposicion temporario “Rancho” na Museo, ya cu e fecha aki Museo Arqueologico lo cera e exposicion temporario aki. “Rancho” a habri dia 26 di Juli 2009 y tabata e prome exposicion temporario na Museo su ubicacion nobo na Schelpstraat 42 na Oranjestad, net patras di Kong Hing Supermarket den Havenstraat.
“Rancho” cual a desaroya pa duna honor na historia, arquitectura y personahenan di e vecindario nobo di Museo, tabata un exposicion hopi exitoso. Muestra di esaki no tabata solamente den e interes di bishitantenan, pero mas bien pa e rol cu e exposicion a hunga den duna un estimulo pa desaroyo di plannan y proyectonan pa mehoracion di e bario. Miembronan di e comunidad a organiza nan mes den Stichting Rancho pa traha riba e desaroyo di Rancho.
Exito di tanto e exposicion como tambe programanan educativo tabata debi tambe na fondonan substancial di Prins Bernard Cultuurfonds Aruba en Nederlandse Antillen, UNOCA, CEDE Aruba, Samenwerkende fondsen Nederlandse Antillen en Aruba y Gobierno di Aruba.
Actividadnan y programanan educacional desaroya den cuadro di e exposicion a extende y enrikece e experiencia publico. Especialmente muchanan y hobennan, cu ta esnan cu lo envisiona planes y proyectonan den futuro, a participa activamente den diferente programanan vacacional como tambe programanan pa school y workshops creativo.
Museo Arqueologico Nacional Aruba ta invita henter pueblo pa haci uzo di e oportunidad pa bishita nos Museo cu famia y/ of amigonan riba e dia di fiesta nacional entre 10’or di mainta pa 2’or di atardi.
Museo Arqueologico Nacional Aruba: E Aventura pa Descubri, ta habri di diamars pa diabierna di 10’or di mainta pa 5’or di atardi y den weekend (diasabra y diadomingo) di 10’or di mainta pa 2’or di merdia.
