TUMBERITO
S.A.C. pa ta informa tur mayor y representante di mucha y hoben cu ta pensa pa participa na e festival di tumberito 2011 cu diadomingo awor 9 di januari 2011 lo cera e inscripcion. Pues ta spera tur esnan interesa cu entre 2or merdia te cu 4:30 atardi tin e oportunidad pa registra y pa 4:45 or atardi lo tira lot. Ta spera tur persona interesa pa ta na oficina di SAC na e ora menciona.
TUMBERITO CU PRIVE
Un biaha mas e festival di tumberito ta premira di ta bira uno cu hopi ambiente den cual e banda Prive lo acompañan e participantenan dia 24 di januari 2011 den Aruba Entrertainment Center. Aruba por ta garantisa cu un biaha mas lo bai conta cu un festival di Tumberito caminda cu e mucha y hobennan lo hasi un tremendo presentacion pa asina demostra cu e ritmo di Tumba tey pa keda pa hopi aña mas.
Via e website di SAC lo por download e formulario pa asina hasi e inscripcion mas facil.
Warmup Jump in na Noord
Awe nochi 8pm lo tin e prome actividad oficial pa 2011 di Aruba su Carnaval. Pa e actividad aki lo ta bai tin DJ 101, Brass band, BMW, Basic One y Impak. SAC ta spera pueblo en general pa asisti ya cu entrada ta gratis y pa asina cuminsa sinti e ambiente cu lo bai disfruta di dje den e tremporada di Aruba su Carnaval nr 57. Pues tuma esaki como un invitacion personal y ban disfruta cu awe nochi na Compleho Deportivo Frans Figaroa na Noord
GRUPONAN TA MENOS
Nos no a tende di Hospijollies, ni di Diamond Carnival Group. Sinembargo a bira conoci ayera cu Diamond ta sigui chikito den parada, pero patrocinio ta keda un dolor di cabez.
Huur di sonido y bandanan ta mata gruponan chikito.
Gruponan no tin placa. No tin patrocinador.
No ta inscribi gruponan pasobra no tin manera pa saca gastonan.
Gruponan a bira grandi pa por saca gasto di banda.
Gruponan mas chiquito no ta sali for di gasto di musica.
Riba esaki tin tambe e gasto di bebidanan .
Bebidanan no ta gratis so cu patrocinio manera hopi hende ta kere. Gruponan grandi ta sobrevivi pasobra e patrocinadornan grandi kier nan promocion y exposure cu gruponan cu tin nomber.
FAKKEL
Si POPO tira un bista riba e Fakkeloptocht ta ripara cu tin grupo cu ta promove 1000 hende den grupo. Otronan cu ta mantene nan mes mas chikito ta participa pa por goza cu locual nan tin of por haya.
POPO ta keda mantene cu na final ta resulta cu e gruponan no ta presenta den parada tampoco cu e cantidad grandi di participante cu nan ta promove.
No tin control riba esaki, pero si conta durante parada ta ripara cu finalmente no ta manera a wordo menciona.
GRANDI DI MAS
Tur parada di carnaval cifranan ta wordo duna di antemano cu ESPECTATIVA ta tanto hende. E gruponan aki ta keda wordo promovi durante henter e periodo riba e cifra aki, y na final ta wordo papia cu e grupo aki tabata asina grandi tambe.
Pero realidad ta resulta cu e grupo tabata riba caya cu 2/3 parti di e cifra cu nan a menciona for di principio y cu tur hende a KERE. Ora menciona e berdad aki, dirigentenan y henter Aruba ta cla pa kita bo cabez pa lagabo sin cerebro pa sigui conta.
CARO DI MAS
E aña aki ta e siete gruponan di mañan anochi lo mira den paradanan grandi, pero hopi mas chikito, cu menos hende. Ta bin acerca Diamond Carnival group chikito, Los Laga Bai grandi y kizas nos Futuro, pero tambe chikito. Carnaval ta keda draai riba e gruponan aki pasobra gruponan no por keda existi den luho mas pasobra tur cos a bira caro di mas den carnaval .
Si e tendencia aki sigui, nos ta bin haya cu den futuro ta e gruponan grandi so lo ta den carnaval.
MUCHANAN
Si tira un bista riba gruponan di mucha, por menciona cu nan tambe ta pasando den dificultad. Ta algun grupo di custumber por participa pasobra pa e muchanan tambe e situacion ta pone cu gruponan no por cubri mas. Pa nan tambe musica ta e dolor di cabez .Pero e placa pa mayornan paga pa costuum tambe a bira demasiado y no ta tur mucha por tin e suerte aki tampoco.
KICO ANTO?
Si POPO menciona kico mester haci y ki direccion mester tuma, POPO ta cuminza na haya SAC riba POPO su cabez. Despues ta tur lider di grupo lo kier lincha POPO. Ora e cabez keda colga, ta lidernan di bandanan lo kier kita mannan y pianan di POPO, sigui pa e musiconan. Aunke ki razon POPO por tin, toch POPO ta haya tur carnavalista cu kier come POPO rauw mes pasobra INTERES a bira e palabra mas importante di ultimo diez pa 25 aña na Aruba. Y ora cu e carnavalistanan yega na weso di POPO ta resto di Aruba lo kier kima e wesonan . Pesey POPO a keda keto.
SPONSOR
Ora POPO papia riba e sponsornan tambe, tur kier bira POPO su carganta rond di luna y solo. Tin sponsornan cu ta gasta miles y miles den e mes gruponan. POPO no a menciona den e MES GRUPO. Pero POPO a menciona GRUPONAN. Ningun otro grupo no por haya parti di e patrocinio aki. Tin den mundo comercial, industrial, bancario, turistico etc. na Aruba e tipo di negoshinan cu facilmente por hinca 10 pa 20 mil den un grupo di carnaval, pero cu bo no ta tende di nan ningun SECONDE durante temporada di carnaval. Pero durante aña nan ta gasta varios biaha mas tanto placa den cosnan cu ta djis tiramento di PLACA AFO cu no ta interesa MAYORIA di hende den comunidad. Ta djis cu nan nomber mester PRONK den publicidad. Pero pa yuda den e fiesta di mas grandi di aña, NUNCA nan tin placa. Laga pasa mes cu nan a REGALA mil florin. E ora ey ta DIAMANTE bo a ricibi di nan, pero bo tin cu pone nan nomber tur rond di disfraz, truck di musica, menciona nan nomber den tur corant, radio y na television, y duna nan asina 25 mil florin na promocion pa e mil cu bo a haya. E regalo ey ta NADA di contribucion. E exigencia tras di dje ta conta.
RABIA
Pero ora POPO papia asina of skirbi asina, ta sali mes ora e rabia pero cu di diablo. Nan ta asina poderoso cu nan por intimida nan trahadornan pa bay corant, radio y television y habri POPO for di otro pa sconde nan alma, pasobra curazon nan no tin. POPO ta goza ora mira con un negoshi cu ta wordo considera chikito ta habri man duna gruponan chikito. E poco cu nan por duna ta bal miyones den wowo di POPO compara cu e gigantenan cu ta sconde tras di “Cos a bay malo pa nos aña pasa”.
JOUVERT
Laga POPO cambia di topico aki y bay riba locual a bin dilanti den reunion di SAC cu instancianan. POPO a cunsumi ora cu POPO a lesa cu un comisario di polis a pidi pa cambia fecha di Jouvert morning. POPO ta kere cu e mester por sa cu Jouvert ta parti tradicional di carnival tur caminda. Aruba mes ta wordo menciona entre e paisnan cu ta mantene esaki anualmente. Jouvert ta wordo celebra e madruga (of mainta) prome cu parada di carnaval sali. Nos tin e e mainta tempran 4 or di e diasabra di parada grandi na San Nicolas. Trinidad por ehemplo tin e, e mainta di dialuna prome cu parada grandi. Nan parada grandi ta riba dialuna (Lundi Gras). Jouvert no ta tuma lugar un of mas dia prome of despues. E ta parti di e tradicion for di e tempo di abolicion di catibo cu DIA TA HABRI (Jour ouvert) pa nan celebracion riba caya hunto cu e francesnan cu e dia ey tambe ta sali riba caya pa celebra.
Si cambia e fecha ey, por ta SIGUR cu Jouvert morning lo caba mescos cu loke a pasa na Noord cu Cocoyoco Jam.
Na Aruba Jouvert ta celebra for di final di decada 40 di siglo pasa. El a sigui algun aña, caba…, lanta atrobe…caba.
Despues Swinda Pieternella (d.f.m.) a purba cu su muchanan na principio di decada 60… el a caba y Swinda a cambia pa forma cu e muchanan e grupo di carnival di mucha di Village.
Den decada 70 Pedro Wilson, conoci como Bito, hunto cu su amiguitonan a cuminza cune te cu el a coge pia y Milo Croes a hinke despues di algun aña como actividad di SAC y el a keda existi te awe y ta un actividad cu semper a keda como un atraccion a pesar cu musica a laga hopi di desea ultimo añanan.
