Cuminzando cu 60 mil bari, diadomingo:
ORANJESTAD (AAN) – E prome conferencia semanal di prensa pa 2011 a tuma lugar dialuna, pafo di Bestuurskantoor, conduci na Prome Minister mr. Mike Eman, hunto cu Minister di Finanzanan, Energia y Utilidadnan ing. Mike de Meza.
E tema central di e conferencia di prensa tabata e apertura oficial di Refineria Valero. Prome Minister a splica cu Diadomingo, algo despues di 9’or di mainta, a cuminza cu e operacion di e refineria atrobe.
E dignatario a haci un repaso di kico a sosode aña pasa, pa e mes periodo aki, cu su gabinete cu recien a sinta e ora ey, a reuni cu Valero pa busca un reapertura di su operacion na Aruba, y pa soluciona e problemanan cu a surgi e ultimo añanan cu e refineria.
Despues nan a sinta na mesa y yega na un memorandum di entendimento, den cual nan a haci un compromiso pa logra na un “settlement agreement” cu lo mester a wordo firma algun luna despues.
Pero a pesar di e logro aki gobierno a nota cierto inkietud di banda di e refineria, y tambe duda despues di tanto aña di diferencianan di opinion cu tabata tin cu gobernacionnan anterior, si berdaderamente lo por a yega na e situacion cu por a rescata e refineria.
Na April 2009 a firma e “settlement agreement” den cual tabata tin poni cu gobierno di Aruba lo mester a introduci un ley fiscal nobo pa e refineria, y un ley pa kita e BBO riba exportacion y cu lo adapta e impuestonan cu Valero mester a paga nos pais. Y a base di esaki tur ta leynan cu mester a wordo pasa den nos Parlamento.
Despues di a firma e “settlement agreement” gobierno a sinti cu e confianza a cuminza crece di parti di Valero, pero ainda tabata tin algo di duda su realmente lo por a logra pasa tur e leynan, e cambionan fiscal, pa asina Valero por a mira un perspectiva pa futuro.
“ Nos a traha duro pa prepara tur e leynan, e settlement agreement, e ley fiscal, e introduccion di henter un regimen nobo pa Valero, den un cuadro economico cu ta duna perspectiva na e refineria”, e dignatario a subraya.
Premier Eman a sigui bisa cu den finnan di siman prome cu 1 di Juni cu tabata e fecha cu gobierno a compromete su mes cu tur e leynan lo bin na vigor, y cu e “settlement agreement” lo por wordo ehecuta, a logra cu Parlamento di Aruba a exonera Valero di e BBO riba exportacion, y a habri e posibilidad di un marco economico nobo pa e refineria mas atractivo.
“ Nos a haci esaki cu confianza cu confianza den esnan cu durante e periodo ey, na diferente ocasion, cu nan tabata sinti cu nan tin cu a laga e 700 empleado di e refineria bay, y nos a haci un yamada riba nan pa no retira nan. Nos tabata tin confianza den e personanan aki, cu si nos cumpli nan lo a cumpli, pero naturalmente nos no sa di berdad te ora e momento yega”, Prome Minister a expresa.
Prome minister a agrega cu den Parlamento tabata tin hende cu a duda, cu tabata bisa cu locual nan ta pasando simplemente ta crea un cuadro pa Valero bende e refineria y cu nunca e lo bay den operacion.
Pero dia 1 di Juni tur e leynan a bin na vigor y riba dia 3 di mesun luna Prome Minister a haya un yamada di e Presidente di Valero, cu e ta manda un delegacion pa bin anuncia e refineria di e refineria teniendo su mes na e palabra cu el a duna gobierno di Aruba, cu si e ta haci su parti di nan banda tambe lo haci di nan.
“ Awe mi por bisa cu Aruba ta habri aña 2011 cu e dos pilarnan economico di nos pais. Despues cu na 2009 y 2010 tabata tin unicamente un turismo tambaleante, cu cruseronan y aerolineanan importante no biniendo Aruba, awe nos ta habri 2011 cu e dos pilarnan fundeshi di Aruba su economia, para firmemente atrobe, turismo creciendo y expandiendo y refineria habri.
“ Mi ta kere cu pa nos comunidad e noticia aki ta hopi grandi, y mi kier a gradici empleadonan di Valero, su staf, gerencia na Aruba y na San Antonio e confianza demostra den nos pais, y nos Minister di Energia cu tur su conocimento riba e materia aki a yuda grandemente cu awor nos ta den e momento cu algun ora pasa, tabata tin 60 mil bari cu e refineria a cuminza refina. E tin su retonan tecnico cu ta na inicio di e apertura, pero nos tin confianza cu e staf y personal di Valero lo sa con pa maneha esaki y cu algun dia nos ta spera tambe di por haci un bishita ayanan, pa comparti cu nan e alegria cu nos ta sinti cu Valero ta bek den operacion, despues di 535 dia cu e tabata plaat”, Prome Minister a subraya.
