ORANJESTAD(AAN)— Renaissance Marketplace, e lugar ideal pa ta cu henter bo famia hunto cu nos, lo celebra Dia di Betico en grande un biaha mas e aña aki.
P’esey mes di trempan un invitacion ta bay pa e henter pueblo di Aruba, pa marca dia 25 di januari den bo agenda, pa bo no lubida di bin Renaissance Marketplace, ya cu tin un actividad special cu lo tuma lugar den oranan di anochi.
Loke ta haci e dia aki special ta, cu Renaissance Marketplace no ta pensa solamente riba nos hendenan local, pero sino tambe riba nos bishitantenan di exterior y ta brinda nan e oportunidad pa presencia y participa na un di e fiestanan tradicional di Aruba.
E anochi lo cuminsa cu e famoso Grupo di Betico, cu lo deleita tur hende presente cu nan dushi repertorio y nan inolvidabel exitonan for di 7’or te cu 9’or. E grupo di baile Folklore di Santa Cruz lo compaña Grupo di Betico y lo deleita e pueblo Aruba cu su baile tradicional di Cinta. E presentacion nan ta tuma luga riba e escenario dilanti Café the Plaza. Pa haci e anochi aki ainda mas special, tur e restaurantnan y e barnan situa na Renaissance Marketplace tin un menu cu prijs special.
Pueblo di Aruba ta keda cordialmente invita pa bin disfruta y celebra e dia aki na Renaissance Marketplace y alabes probecha di e grandioso ofertanan y menu special cu e restaurant- y barnan situa den Renaissance Marketplace tin pa ofrece.
