Opinion Publico:
ORANJESTAD (AAN) – DIARIO a scucha opinion di un ciudadano, cu despues di a tende na radio y lesa den corant, e criticanan cu e dirigente di RED tin contra Minister Otmar Oduber, a saca na conclusion cu e politico no por sconde su rencor contra e mandatario.
E ciudadano ta indica cu pa motibo cu e famoso Comision di Berdad a fracasa riba tur intento pa hundi Otmar Oduber, tempo cu el a ser acusa di maneho dudoso di placa di pueblo, pero cu el a gana tur caso y nada a keda proba di tur e ponencianan di Lampe y su comision di berdad, e meneer no por contene su rabia y su rencor y awor ta atake riba cualkier otro angulo y ta Triple A y ATA e cabaynan cu e kier a subi pa bataya.
Como minister, pueblo ta mira den Otmar Oduber un homber cu ta trahando duro, pero esey no ta kita afo cu e por comete un, dos of mas fout, pasobra con cu bay bin gobierno ta guia pa hende, y unda hende ta traha foutnan ta wordo haci, y minister Oduber ta un humano, no e Ser Supremo, kiermen e no ta ni por ta perfecto, mescos ningun otro minister ni parlamentario.
E ciudadano kiermen cu esaki cu e no ta mescos cu hopi hende cu ainda ta sigui MEP y cu nunca a kita nan bril di palo. E ta analiza gobierno y su actonan, y pe ta importante cu gobierno ta trahando masha duro mes, superando e gobiernonan anterior di e propio AVP, y minister Otmar Oduber ta un cu sigur ta destaca.
Pa e forma con Rudy Lampe ta papia di minister Otmar Oduber e no ta mustra cu e por tin e simpleza y humildad pa reconoce cu un yiu di tera, bastante hoben, a sinta como minister y ta haci tur posible pa cumpli cu locual el a priminti.
Claro cu e no por haci milagro y tin cosnan cu ta scapa na su man, pasobra influencia di e crisis mundial ainda ta pisa riba nos industria di turismo. Pero cu e ta traha, e ta traha! Kico anto ta e problema di Rudy? Cu su pronostico a Sali robes y cu Otmar Oduber no ta tras di trali pasobra a sali liber di tur acusacion? Esaki ta locual ta molestia Rudy su curazon? Pueblo si ta nota esaki, segun e ciudadano, y pesey su palabranan no tin e peso cu e ta kere of ta spera di tin. E admiracion cu un mayoria tin pa Minister Otmar Oduber no ta bay wordo opaca pa e aliento plama di rencor cu cual Rudy Lampe ta papia di dje. Mehor e no cansa su curpa y cuminza realiza cu Gabinete Mike Eman ta trahando y cu Otmar a gana curazon di pueblo, hasta di hendenan cu no a vota pa AVP!
Asina leu e ciudadano a comenta pa DIARIO.
