Segun Minister Mike de Meza:
ORANJESTAD (AAN) – Den conferencia semanal di prensa, e prome pa aña 2011, Minister Mike de Meza a hiba palabra, dialuna cu a pasa.
E dignatario a gradici publicamente Prome Minister mr. Mike Eman, cu a sa di lidera negociacionnan grandi, na un momento hopi dificil pa Aruba su refineria.
De Meza a subraya cu Prome Minister ta un persona cu su sistema di traha ta sinta na mesa cu tur hende, cu partnernan estrategico, pa busca solucion conhuntamente.
“ Esey a duna su frutonan tambe, despues di 535 dia cu e tabata cera, e refineria a habri su portanan diadomingo anochi, y despues di 9’or di anochi a re-introduci crudo den e plantanan. E refineria ta bezig ta keda estabiliza su mes y cada rato ta keda aumenta y aumenta, te ora e yega su maximo di produccion un bez mas. Nos mester ta contento, pasobra no lubida cu e refineria ta responsable sigur pa 12 pa 14% di nos DGP. Su presencia na Aruba ta garantiza 5 mil pa 7 mil cupo di trabao directo y indirectamente”, Minister de Meza a subraya.
E dignatario a remarca cu esaki ta resultado di negociacionnan di oranan hopi largo y un trabao hopi pisa.
Minister di Meza a subraya cu Prome Minister a conversa cu e funcionarionan di nivel mas halto di San Antonio, kendenan a mira cada bez mas cu nan tin un partner solido den e gobierno di Aruba.
“ Conhuntamente nos ta yega awe caminda nos ta, y nos mester ta orguyoso cu e refineria ta back den operacion, y manera Prome Minister a bisa, e pilar number un di nos economia ta turismo cu ta bayendo den bon direccion, KLM ta back na Aruba, Carnival Cruises tambe, y e refineria ta habri”, Minister de Meza a acentua.
El a sigui menciona cu Gabinete Mike Eman, den e transcurso di un aña, a yuda esnan financieramente menos afortuna, esnan cu ta riba onderstand cual a wordo aumenta cu 25% y awe nan ta haya pa cada yiu 200 florin di kindertoeslag; tambe gobierno a pasa un cantidad di leynan den e ultimo simannan di December pa bin cla cu tur e trabaonan; nan a firma cu APFA tambe, pues, tur cos cu gobierno a bisa cu e ta bay haci y cu a sali for di dialogo social nan a cumpli cune.
Gobierno lo bolbe sinta na mesa cu tur e comisionnan di reforma fiscal y otronan tambe, preparando pa e Dialogo Social riba e tereno aki.
Bao liderazgo di Prome Minister Mike Eman nos kier goberna e pais aki sinta cu tur organizacion den un plataforma amplio y profesional, pa tuma decisionnan hopi importante pa Aruba, no solamente pa e aña aki pero pa e añanan nos dilanti.
De Meza a bisa cu e logronan di Gabinete Mike Eman ta un ehemplo pa hopi otro pais di nos region, pero tambe na Hulanda unda ta wordo papia di e trabao desplega pa nos gobierno, cu ta elogio so e ta haya di nan, pasobra gobierno ta traha duro y ta haci loke nan ta kere ta corecto y muestra di esey ta e momento cu nan a presenta e leynan na Parlamento, unda cu e mandatario y parlamentario ta asumi un cortamento di nan beneficionan pa mustra pueblo cu gobierno no ta sinta pa enrikece su mes ni haya un pension royal. Minister Presidente mes ta entrega asina como un miyon florin, y hunto tur e ministernan ta duna mas cu cinco miyon florin, sin kita afo e overbruggingstoelage, cu a wordo reduci y asina ta mustra pueblo cu tin otro maneranan pa goberna.
E dignatario a conclui gradiciendo tur trahador di Valero y tambe e contratistanan pa e trabao cu nan a bin ta haciendo, sin laga afo e gerencia di Valero na Aruba y na San Antonio. Y finalmente el a yama un biaha mas danki na Prome Minister pa su tremendo trabao cu e ta desplegando na beneficio di nos pueblo.
