ORANJESTAD (AAN): Recientemente, di 17 pa 20 di januari 2011, Aruba y enseñansa di Aruba a haya bishita di un grupo di 7 studiante di idioma di University of the West Indies, Kingston, Jamaica. Nan tabata compaña pa Prof. Dr. Hubert Devonish y nan docente señora Tashieka Burris, MA.
Meta di e bishita aki tabata pa haya un idea di e papel di idioma den identidad nacional, cu un enfoke riba cultura y musica, minoria linguistico, actitud relaciona cu idioma, idioma den educacion y e status y corpus planning di Papiamento.
Joyce Pereira di Center for Research and Development (CRD) di Universidad di Aruba tabatin e encargo pa prepara un programa pa e grupo aki. Cu cooperacion di tur e instancianan di enseñansa a logra hinca un programa den otro cu a satisface no solamente e bishitantenan, sino tambe tur hende envolvi.
En realidad nan tabatin dos dia completo so na Aruba y p’esey no a duna nan chens pa perde tempo.
Riba e anochi di yegada Ramon Todd Dandaré y Joyce Pereira a duna informacion tocante situacion di idioma na Aruba y a contesta tur e preguntanan cu e studiantenan tabatin.
Diamars dia 18 di januari den e oranan di mainta e grupo a bishita Departamento di Enseñansa cu a saca tur cos for di cashi pa duna e studiantenan y nan guianan tur informacion cu nan tabata desea. Pa Grupo Idioma señora Audrey Tromp-Wouters a duna un presentacion amplio tocante e trabaonan cu e seccion aki ta desplega.
Señor Juany Schwengle a presenta e ideanan, e structura y e desaroyonan relaciona cu e school Multilingual cu a cuminsa como proyecto piloto.
Seccion di Desaroyo di Curiculo a mobilisa tur su oficina- y proyectonan pa organiza un exposicion di tur material cu nan a y ta desaroya, specialmente relaciona cu Papiamento. E exposicion aki tabata impresionante y e desaroyadonan tur tabata presente pa duna informacion extenso y profundo tocante e material.
Diamars merdia Universidad di Aruba tabata na turno pa haya bishita.
A cuminsa na e edificio nobo na L. G. Smith Boulevard, e asina yama edificio APEX.
Aki mr. Luciano Milliard di Office of International Affairs (OIA) a ofrece e grupo un lunch.
Nan a haya informacion di Center for Research & Development (CRD): Joyce Pereira a presenta e miembronan di CRD y Dr. Lydia Emerencia a duna informacion tocante e trabaonan di investigacion cu ta den desaroyo.
Office of Student Affairs (OSA) a organiza un momento di ‘speed dating’, loke ta encera: den forma di carrousel haya mas tanto informacion posibel di otro, loke a resulta hopi eficiente y interesante. Charisse Hoen-Daly, Richard Trimon y Sanderich Bislik a haci un bon trabao aki.
Na e edificionan na La Sallestraat e studiantenan a cera conoci cu diferente persona y e rector interino señor Eric Mijts a duna nan un relato historico di universidad y di e edificio.
Diaranson a bishita Colegio Conrado Coronel y school Preparatorio Trupial, cu ta e dos schoolnan cu ta den e Proyecto school Multilingual. Na e schoolnan aki e studiantenan, Prof. Devonish y señora Burris por a observa den diferente klas y papia cu e cabesantenan, e maestronan y e muchanan. Nan a haya un splicacion amplio di e progreso di e proyecto di innovacion aki.
Despues di e bishita aki nan a bay IPA, caminda Wilma Kuiperi-Jansen di Oficina di Contacto Internacional a ricibi nan. Director Ava Thodé a tene un combersacion intensivo cu nan. Nan a combersa tambe cu e docentenan di Bachelor Papiamento cu a duna nan masha hopi informacion tocante e estudio, situacion di idioma y innovacion.
Nan a sigui dos charla na IPA, esta un charla di drs. Gregory Richardson tocante “Music and Language” y di dr. Goretti Narain y drs. Merviné Kock “Di Buchi cu Chichi pa Camila y Justin – Desaroyo contemporaneo di hende muhe y hende homber den school na Aruba y den Caribe”.
Durante e dianan aki e studiantenan a haci masha hopi entrevista, cada momento cu nan a haya, na tur e instancianan, pero tambe riba caya y hasta na Bon Bini Festival.
Nan a keda encanta cu e bishita di estudio aki: den dos dia nan a siña masha hopi mes y cera conoci cu masha hopi hende. Cansa, pero hopi motiva nan a regresa Jamaica.
Pa Aruba e contactonan renoba aki cu University of the West Indies (UWI) ta un enrikecemento pa nos proyectonan di idioma y enseñansa:
Prof. Devonish ta un experto reconoci riba tereno di linguistica, enseñansa bilingual y maneho di idioma y e tin hopi publicacion cientifico riba su nomber. Na Jamaica e ta guia The Jamaican Bilingual Primary Education Project, un proyecto cu hopi semehansa cu nos proyecto Multilingual y di cual nos por siña hopi.
Aruba ta cla pa ricibi e di dos grupo otro aña.
