Awe nochi ta e cos den Joe Laveist Sport Park. POPO ta contento cu tur e discusion cu tabata tin ta tras di lomba y cu awe nochi por pasa den un anochi alegre tranquil sin ningun dolor.
MISS CANADA
ADICTO
Awe entre e potretnan por mira Miss Canada. Di tempo cu el a cuminza bishita Aruba el a bira adicto na Carnaval di Aruba y no por keda afo. E ta haciendo promocion na Canada pa carnaval di nos isla y por spera tambe yegada di esnan cu el a contagia pa e paradanan den cual tambe e ta participa.
POPO ta gradici Miss Canada pa e saco di parafernalia cu POPO a ricibi manera dashi, mea, parasol pa riba cabez, thermometer y dashi, tur cu e “maple-leaf” , simbolo canades di su bandera. Thank you Your Highness.
CORONA
DI AWE
Riba e paginanan di POPO awe tambe tin e cantantenan entre cualnan e dos coronanan ta cay awe nochi pa tanto Calypso como Roadmarch. Den calypso POPO ta mira Campo, Lady V, E.K. Whitey y Valentino den esnan mas pisa.
Den Roadmarch si ta un dolor di cabez pa POPO pasobra aki Campo, Exee B, Teddy, Tattoo, Valentino, Talent ta den e favoritonan. Pero pa e corona? Cuidao cu Teddy, Tattoo y Talent.
GRUPO
KAPOT
Ayera POPO a tende un vrum vrum cu un grupo di carnaval a sali bay for di reunion di SAC cu gruponan. Parce cu lo tabata tin malcontento relaciona cu e topico di reunion y cu e grupo Diamond Carnival Group a dicidi di bandona reunion considerando cu nan a wordo invita pa bin e reunion unda lo discuti cierto asunto, pero a resulta cu no ta pa discuti pero cu tur cos ta cla caba riba papel. Esaki a haci cu e grupo a reuni ayera cu su participantenan y a dicidi di lo sali tambe di carnaval y pone asina un fin na participacion di Diamond Carnival Group den carnaval. POPO ta spera di tende mas di e asunto aki fin di siman aki.
OTRONAN
POPO e dianan aki a ocupa su es cu e calypso y roadmarch contest, sinembargo tin mas informacion di gruponan di carnaval cu POPO no por laga un banda. E prome ta pa duna Majestic Carnival Group un pabien cu nan Mayajestic Queen, Srta. Maya Croes cu POPO a haya honor di corona y cu nan reina cu a resulta reina di carnaval di Aruba 2008, Jennyree Geerman a keda escogi pa representa Aruba den e certamen internacional di reina di carnaval na Corsow.
BAILA CU
XC – LANZ
E banda musical XC-Lanz tin su propio grupo di carnaval e aña aki den formato nobo. Por a mira nan den parada di blaas cu Deja kids cu e ganador di tumberito Juvenil Eunice Albertsz. XC-Lanz lo ta den Lighting parade y Parada di luz cu e tema “The Power of Duracel” cu colornan brons, oro cu preto. Nan tin pakete di 250 florin pa e dos paradanan y bo ta haya trahe y headpiece. Pa paradanan grandi XC-Lanz ta bin cu e tema “Dance with XC-Lanz” bailando riba ritmo di e banda nobo aki cu su trahenan cu lo hiba colornan cora, blanco, preto, y plata. Pakete pa e dos paradanan grandi ta inclui headpiece y costume. Si bo tuma e pakete di tur 4 parada esaki lo costabo 550 florin. Tur cos ta inclui premium bar, snack y e ritmo excelente di e banda XC-Lanz.
XC-LANZ
CONTACT
Pa tuma contacto cu XC-Lanz pa inscripcion por yama Danielle Miquez tur dia despues di 1 or merdia na cel 560-0842 y pa inscripcion por pasa mira e trahenan na cede di Xc-Lanz Carnival Group, Rooi Bosal 94 C, Santa Cruz dilanti Shahai Take Away riba caminda grandi. E di 3 cas panort di e stadion. E cede ta habri tur dia entre 7 or y 10 or anochi.
LOT TIRA
Pa eleccion di reina infantil y reina hubenil a tira lot. E secuencia infantil ta 1…Thahirah Wever di Kids. E tin 8 aña di edad. 2…. Josienne Maduro di Don Flip y e tin 7 aña y 3…….Alviana Arends di TOB/Mundo Infantil di 8 aña di edad.
Pa eleccion reina hubenil tambe tin 3 candidata y 1….Mikayla Ruiz di 14 aña di Champagne Carnival Group, 2 ….Naomi Geerman di 16 aña di majestic Carnival Group y 3 Sur-Gin Arends di 14 aña di edad, di TOB.
