Athletics mester gana e proximo wega
ORANJESTAD (AAN)- Den di dos wega Diasabra, e catcher di Rangers, Cheekong Cheong, a bolter Ripoldo Croes Ball Park cu un tremendo grand slam den bom di inning number seis pa hasi un wega cu tabata 7-1 bira 7-6, cu un swing. Un wega cu Athletics tabata gana comfortabelmente, te na e momento ey, cu bon pitcheo di Vaughn Bergen. E pitcheo relevo di Athletics cu no a ‘wanta’ y un error costoso di e shortstop, pa a completa un double play, a jena base pa Cheekong juda Rangers hasi e wega sumamente interesante atrobe.
Despues a sigui cuater base por bola, pa tabla e wega na 7 y laga e basenan jen un biaha mas y cu conteo di tres bola y dos strike, pa Johné Rasmijn, umpire ta dicidi di para e wega pa motibo di scuridad.
Diahuebs e wega a continua y Johné ta conecta hit pa centerfield pa empuha dos careda mas. Despues un biaha mas Cheekong ta empuha e di 10 careda pa Rangers y hasi e score 10 – 7. Athletics den su ultimo turno no por a hasi nada e wega a termina cu pitcher ganador Jorge Vrolijk pa Rangers y perdedor Endry Brito pa Athletics.
Di biaha e di tres wega a continua cu e series empata na un wega cada uno. Aki Rangers a sigui mescos cu nan a termina wega number dos, esta di conecta grandslam, e biaha aki door di Rashi Barry, den prome inning caba pa hasi e wega 6 – 0. Un Giomir Leocadia cu no a pitcha manera den e prome wega riba diadomingo a carga cu e derota pa Athletics.
Di otro banda Bhuwanashwar Dyal no tabata mes skerpi cu diadomingo pasa pero si efectivo. Aunke Athletics tabata menasa cu coredor na base den cada inning, nan no por a transforma e coredornan den careda.
E golpi devastador a bini den bate di Johnaikel Acosta cu a conecta un home run den inning 4 pa empuha tres careda mas pa su equipo Rangers. Despues den inning seis Rangers a caba di saca nan rabia cu hit tras di hit pa hasi e wega un knockout cu score di 16-3.
Awor e equipo di Athletics ta lomba contra muraya y mester gana diasabra pa forsa un di cinco wega. Rangers di otro banda tin e momentum y ta bini pa caba cos y titula Campeon Nacional di Aruba den categoria Infantil AA, edad 11-12 aña.
Ta resta nos pa invita publico en general pa bin apoya nos muchanan cu ta hungando bon baseball na Ripoldo Croes Ball Park diasabra pa 12’or di merdia. Prome cu e wega aki tambe tin e di cuater wega di final den categoria Infantil A, edad 9-10 aña entre Rc-Cola Marlins y CBN-Impex.
