Premier Eman ta mira e presupuesto 2011 como uno historico
ORANJESTAD(AAN): Aprobacion di Presupuesto 2011 ta uno masha importante pasobra e ta refleha e cambio asina necesario na Aruba. Pa ocho aña largo pueblo di Aruba a biba bou di un Gobierno cu tabata gasta hopi placa na huur di edificio di famia y pago abogado. Y tur entrada extra no ta yega cerca pueblo. E placa tabata worde tuma pa enrikise esnan cerca di Gobernacion. Diaranzon anochi e presupuesto a worde aproba cu 12 voto na fabor, 8 contra. mr Andin Bikker lider di Democracia Real a abstene di vota door di bandona sala di parlamento.
Presupuesto 2011 ta haci un cambio radical riba e rumbo cu Aruba tabata bayendo ultimo 8 añanan. Basa riba e vision nobo e refineria a habri, turismo a crece, proyectonan den centro a cuminsa cana, proyectonan grandi di infrastructura y den barrio ta canando. Unda cu tin algo ainda di finanza publico, ta purba di no subi e peso pero pa yuda. Asina a pone 600 Florin extra riba e AOV pa aña, reparatie-toeslag pa 27 mil famia cu a haya un yudansa riba nan salario; a duna funcionarionan indexering; pensionadonan a haya algo extra; aumento voorjaarspremie y gelijkbedrag. Pues cambionan cu ta duna e aspecto di un desaroyo economico-social mas ekilibra den e pais. No tey ainda, pasobra tin hopi pobreza, pesey a aumenta bijstand cu 25% y kindertoeslag tambe a worde introduci. Poco-poco ta dunando e mamanan un forsa pa por laga e mucha na un creche y busca un trabao. Esaki ta cambionan grandi cu ta haci. E mandatario a splica cu e pocision di un mama soltera cu 2 yiu ta haya 605 Florin pa nan tres. Awe Gobierno a haci e suma aki casi dobbel dunando nan 1125 Florin. Cambionan pa cuminsa yuda esnan di menos recurso. E trabao ta grandi pasobra e atraso di 8 aña y falta di atencion ta asina visibel tur caminda, mirando circumstancianan dificil caminda famianan ta lucha. A haya un desempleo di 10% cu awe ta na 7%. “E trabao mester sigui y mi tin hopi speranza cu den e Dialogo Social II lo dal un stap grandi,” e mandatario a duna di conoce. Y esaki ta encera pa aumenta di salario minimo cu pa dos aña cu no tabata tin aumento. E ta spera di por haya un conseho positivo di SER.
Premier Eman a bisa cu ayudo di tur e ministernan y tur e departamentonan, nan ta mira un luz na horizonte. Pero no tey ainda pasobra e trabao ta hopi grandi.
E atakenan di opocision, MEP, Eman ta bisa cu no ta na su lugar. Si ocho aña largo tabata tin mas di 2 mil miyon extra, di cual mil miyon a bini door di tuma medida, bende propiedad di Aruba y e otro cu a fia, sin por mira esaki back den pueblo. “Ex Prome Minister tabata tin tur ruman den Gobierno. Ami tin shete ruman y mi no ta hinca den mi cabes pa pone nan den Gobierno. Mi no ta sinti cu mi a worde poni den gobernacion pa mira con ta bay yuda mi rumannan den Gobierno. Mi pueblo a pone confianza den mi pa saca nan for di un situacion y no pa hundi nan pa enrikece famia. Mi no por pone e carga ey riba pueblo,” e mandatario a duna di conoce. Pesey tambe, el a bisa, Parlamentario Evelyn Wever Croes no por a keda den Parlamento ora cu e cifranan a sali cu su tata a cobra 25 mil Florin pa bay Conferencia di Mesa Rondo pa Aruba, siendo ruman di esun cu a bringa pa Aruba. Y asina a haya recibo cu ta sobrepasa 4 miyon Florin pa un persona. Trucknan cu ta worde recha cu ta costa 1 miyon Florin pa aña, etc. Y esey ta e cambio grandi cu Aruba ta experencia awor. Trabao grandi pa trece prosperidad pa e pueblo. Awor no ta ruman ni primo ta haya ayudo, sino e pueblo. Y esey ta e diferencia entre e Gobierno cu a bay y esun cu tey awor. Y un aña no a cambia tur e panorama cu esnan cu tabata pober a bira rico, pero a mehora nan situacion.
