Cifranan di Banco Central ta confirma
ORANJESTAD (AAN): Na momento cu Gabinete Mike Eman a tuma rienda di pais Aruba el a hereda un economia den recesion grave. E gobierno nobo tabata masha consciente di e problemanan cu famianan na Aruba tabatin pa por a sobrebibi. E tabata consciente di e problemanan cu negoshinan tabatin pa por a wanta nan cabes riba awa. Gobierno mester a traha di forma diligente. Gabinete Mike Eman a bin cu un plan pa combati e crisis aki. “E plan di estimulo economico a logra saca Aruba for di un contraccion di 10% na 2009 pa un crecemento positivo di 10% na 2011”, Prome Minister Eman a señala. “Esaki sigur ta resalta den e economianan mundial”.
Na 2009 turismo tabata den problema grandi segun cifranan di AHATA. KLM y Carnival Cruises a bandona Aruba. Valero a anuncia di lo sera su portanan cu consecuencianan negativo grandi. Desempleo di miles di mama y tata di famia tabata loke tabata spera Aruba y e gobierno nobo na momento cu a sinta na luna di oktober 2009. Un di e prome prioridadnan tabata pa recupera e poder di compra di e pueblo di Aruba y di e forma aki garantisa crecemento economico di país Aruba.
Gabinete Mike Eman a anuncia den su programa di gobernacion cu durante e periodo di 4 aña lo ataca y soluciona e problemanan den fase. A anuncia cu BBO lo worde kita den fase y cu lo hisa onderstand. Lo inicia cu proyectonan grandi cu ta bon pa economia di Aruba.
Turismo lo haya tur atencion. Relacion cu partnernan strategico lo worde mehora y un di e prioridadnan mas grandi di e Gobierno nobo tabata pa percura pa Valero keda habri. Relacion cu Reino tambe lo haya tur atencion di e Gobierno nobo ya cu esaki tabata bou presion grandi. Gabinete Mike Eman ta haya masha importante pa Aruba ta keda forma parti di Reino Hulandes. Desde un comienso Gobierno a cuminsa na combatimento di e crisis.
Den e prome lunanan caba a kita manera priminti mita di e BBO, a hisa onderstand, a bin cu un schoolkinderentoeslag cu a worde redobla despues di un aña pa muchanan cu ta bayendo school di famianan di menos recurso y a pone e base pa un miho relacion cu Reino.
Awe Valero ta back den operacion y cu esaki pan di miles di mama y tata di famia a keda sigura. Esaki no a bay sin mas y ta hopi deliberacion a tuma lugar. E confianza emiti y forma drechi di negosha di e actual Gobierno a percura pa esaki. Relacion cu Hulanda ta estupendo y cu esaki un bon relacion cu Union Europeo ta e siguiente paso logico. KLM a regresa mescos cu Carnival Cruises y American Air Lines a amplia su vuelonan.
Inversionnan grandi ta tumando lugar na Aruba den e inmenso proyecto BoAruba. Centronan di ciudad ta worde renoba y mehora mescos cu e barionan. E maneho di inversion aki tin dos efecto. E prome ta worde sinti di inmediato den un impulso pa economia y door di crea trabao y e di dos ta uno a termino largo. Aruba lo bira mas bunita y miho organiza. Nos lo disfruta di dje pa hopi aña.
Ta obvio cu tur loke a worde logra y sigur e economia creciente di 10% no a bin di su mes. E ta a base di e vision y trabao duro di Gabinete Mike Eman.
