ORANJESTAD (AAN) — Un tema cu no a bin dilanti ainda y cu ta un consecuencia di e Leerplicht cu a wordo pasa den Parlamento e siman aki, ta e regulacion di creche.
Pa mas cu dos decada a surgi e desaroyo di lantamento di creche rond di Aruba, logicamente como un necesidad debi na e incorporacion di hopi mama den e sector laboral, como un obligacion cu e mesun costo di bida halto den nos pais a crea.
Berdaderamente e crechenan cu a wordo habri na cantidad, a yega un bashi cu tabata existi e momentonan ey, cu ta existi ainda y cu posiblemente lo aumenta cu paso di tempo, cada bez cu un mama mas ta drenta den e mercado laboral.
Pero a bin resulta cu no tur e crechenan aki tabata, of ta cumpli, cu e condicionnan cu un lugar di cuido y guia di mucha mester tin. Tin mayornan cu te ainda ta keha di situacionnan poco higienico cu ta presenta den un ke otro creche, no tur hende cu ta wordo encarga cu mucha tin diploma por ehemplo, di Colegio EPI, pasobra e donjo di creche no por paga nan un salario mas halto cu salario minimo.
Tin mayornan cu a yega di haya nan yiu chikito cu golpi pisa, pasobra no por a pone suficiente cuidao na dje, sea el a cay of otro mucha a pushe, mientras cu e persona encarga cu e grupo, kizas di mas cu diez mucha no a paga tino. Y asina tin hopi aspecto cu tabata pendiente di e Leerplicht pa wordo reglamenta den creche.
Si ta berdad tambe, y hopi mayor ta bisa esey, cu tin creche cu den transcurso di tempo a mehora notablemente. Nan incluso a bin cu programanan unda cu e mucha ta wordo prepara masha bon pa bay Kleuterschool, nan tin un sistema di higiene hopi bon, un cushina bon organiza, nan ta parti e muchanan den baby, y demas categoria di edad, y tin entre ocho cu diez mucha pa un of den algun caso dos leidster.
Tin creche ta masha barata mes, pero esey por ta a costo di e calidad. Asina algun mayor mes ta comenta tin biaha. Pero e gran mayoria no ta baha di 400 of 425 florin pa cada un mucha, pa henter e dia, y berdad ta cu e sacrificio pa mayornan cu kizas tin dos of mucha, por ta hasta tres den e mesun creche, ta haci pa nan yiunan wordo bon cuida tanten cu nan ta pia di trabao, pues ta logico cu nan ta exigi calidad.
Awendia hopi creche a bira traimerdia tambe, y cu e mesun structura di un creche. Mayornan ta hiba nan yiunan despues di kleuter, y nan ta come, drumi y hunga den e creche unda mayoria di biaha e ruman mas chikito ta. Cu introduccion di e ley di ensenanza obligatorio sigur lo mester reglamenta esaki tambe.
No obstante, ni e minister ni e parlamentarionan, tampoco SIMAR, a trece e aspecto aki dilanti, durante e tratamento di e ley. Ta un funcionario di Directie Onderwijs a tuma e iniciativa di yama DIARIO y trece e punto aki dilanti, pa e tema aki haya atencion tambe!
Ta hopi importante pa acerca e donjonan di creche, pa wak con prepara nan ta pa e reglamentacion aki, ki inversion adicional nan lo tin cu haci, cuanto creche posiblemente lo por wordo cera temporalmente si nan no ta cumpli cu tur e reglamentacion, y den e caso aki, ki opcion por ofrece e muchanan cu posiblemente of lo por drenta creche pa prome biaha, of lo no por sigui. Y sin duda, manera SIMAR mes a bisa, mester pone tur cos na su lugar pa e ley funciona optimalmente, y ta bon pa haya sa den cual etapa di e introduccion di e ley, e crechenan ta bin aden!
(Informacion compila y redacta pa Mercedes A.H-Monge).
