ORANJESTAD (AAN) – Den conferencia di prensa di fraccion di AVP, e lider interino señor Juan David Yrausquin, a menciona cu MEP a bisa cu e presupuesto di gobierno ta ficticio.
E parlamentario a indica cu su fraccion ta calcula cu loke nan kiermen ta cu e deficit ta mucho halto, sinembargo ora di trata e presupuesto MEP a entrega un amienda for di cual nan ta kita 10 miyon Florin for di un area pa hinke den otro area di presupuesto.
Esaki no ta un manera pa reduci e deficit di Aruba, segun parlamentario Juan David Yrausquin, cu a agrega cu ora nan bisa A nan mester bisa B tambe, pasobra nan no por bisa cu nan ta haya e deficit mucho halto, anto entrega un amienda cu locual ta haci ta mantene e deficit mescos.
E lider interino di fraccion di AVP a señala cu esey ta loke nan ta spera tanto di fraccion di MEP como di señor Wever y otro partidonan representa den Parlamento.
El a agrega cu si nan ta bisa cu nan kier yega na un deficit di 3 porciento otro aña, nan mester indica kico nan ta bay haci pa yega na esaki y kico nan no ta bay haci.
El a expresa cu AVP ta contento cu e debate riba finanzanan publico a cuminza, pero e ta spera cu den e simannan nos dilanti e bira di un nivel un poco mas halto, pa asina ora yega momento pa e proximo presupuesto worde entrega, mas of menos den luna di September, Parlamento sa na unda tur hende ta para, y tambe pa eventualmente sa na unda e diferente fraccionnan kier trece cambio.
El a agrega cu e aña aki ta bay ta hopi importante pa locual ta trata finanzanan publico, y e hecho cu na 2013 lo entrega e presupuesto di aña di eleccion, pueblo di Aruba merece di sa na unda tur hende y tur partido politico ta para pa loke ta trata finanzanan publico y con nan ta mira e futuro financiero di nos pais.
El a agrega cu te ainda no a cambia e compromiso di yega na un deficit di 3 porciento, locual ta 175 miyon Florin pa 2013, y e aña aki segun calculacionnan cu e mes ta kere den dje, e deficit lo ta den 350 miyon Florin pero tur cos ta depende kico ta bay sosode tambe cu e refineria. Pero hasta si e refineria habri back e no ta bay baha for di e suma menciona y esey mester tene cuenta cune e aña aki, y otro aña atrobe hibe na 3 porciento, e ta nifica 175 miyon Florin.
Esaki nifica cu gobierno por gasta 175 miyon mas di locual tin presupuesta, cu ta locual kier logra cu ta 3 porciento extra di e presupuesto.
Esaki tambe kiermen cu si e aña aki e deficit ta 350 miyon Florin, mester bahe na mitad esta 175 miyon pa 2013 y e pregunta e ora ey ta con ta bay yega na e cifra aki cu tanto gobierno como Parlamento a compromete na dje.
No ta responsable pa gasta mas di e 3 porciento aki, y mester yega na un presupuesto balansa unda cu gobierno no ta gasta mas di locual tin presupuesta.
