Segun Robin-Ann Didder
ORANJESTAD (AAN): “Di con sinta cu un sindicato pa dialoga? Esey ta un di pregunta nan cu nos mester puntra nos mes, como maestro (no) miembro di un sindicato y mayor.
E maestronan mester compronde cu no tur dunado di trabao cu ta cay bou di enseñansa, por ehempel e directivanan di school, departamento di enseñansa y ministerio di enseñansa ta invita sindicato bin sinta na mesa pa dialoga y realmente discuti y scucha otro su ponencianan y yega na otro.
Si e dialogo aki tuma luga, ta ora e sindicato mes haci un peticion den forma oficial via un carta dirigi na e diferente departamento nan. Asina mes tin biaha cu no tur stakeholders ta haya e importancia pa sinta y dialoga cu e sindicato SIMAR.
Na augustus 2012 lo tuma luga e torneo di baseball cu ta tuma luga entre ministerio di enseñansa e maestronan. E torneo aki yama fastpitch. Batiado na turno ministerio di enseñansa y maestronan den veld. Peloteronan, miho dicho maestronan bosonan ta cla?
Ki ora nos ta haya e turno pa bati e bala? Esaki ta e tantisimo pregunta nan cu mi ta haci na mi coleganan den enseñansa.
Mi ta opina cu tur e stakeholders cu a tuma parti den e innovacionnan den enseñansa semper a sali for di un punto di bista cu nan ta trece cambio pa miho. E pregunta cardinal ta cambio pa miho pa ken? Pa nan mes, pa e alumno cu mester ta central, of pa nan mes y e alumno?
Un sindicato di maestro semper tin cu aporta na e innovacionnan cu ta na bienestar di nos tur, cu ta carga enseñansa particular y general. Esaki ta locual mi ta boga pa ta e enfasis pa tur nos maestronan.
Hunto nos mester duna contenido na e relacionnan den enseñansa.
Durante aña escolar 2012 lo tin e innovacion nan cu ta tumando luga pa loke ta trata e implementacion di enseñansa obligatorio y tambe rapport Synergie.
Implementacion di enseñansa obligatorio.
E ley di enseñansa obligatorio a pasa manera fastball, cu ta bay den vigor na augustus.
Con gobierno kier pa nos como maestronan carga tur e innovacionnan aki hunto si hunto nos NO ta duna contenido na e relacionnan den enseñansa.
E implementacion di enseñansa obligatorio tin tres fase: Preparacion,Introduccion y Ehecucion di un parti di implementacion strategico. E pregunta ta manera semper, tur factor/ necesidad ta in place, of miho dicho cua di e factor / necesidad nan ta in place?
Rapport Synergie.
Den e rapport Synergie e decision di Ministerio di Enseñansa ta cu alumnonan di mavo ya den e di dos klas, pues un aña escolar mas tempran mester scoge un pakete di les / profiel no a cay den bon tera cerca e decanonan di tur e nuebe schoolnan di mavo na Aruba, ni tampoco cerca otro maestronan den enseñansa secundario. Ta berdad cu e comision di evaluacion a pasa tur school secundario. Pero nunca nos a mira resultado di e combersacionnan ey.
E maestronan nunca a papia over e ‘vervroegde keuze pakket’, cu lo por tuma luga na final di klas 2 di e otro aña escolar. Argumento uza door di e Comision Evaluacion Innovacion AVO (algemeen voortgezet onderwijs) cu e alumnonan ta mayor di edad entre 13 pa 15 aña pa scoge nan profiel mescos cu e alumno di E.P.B. E argumento aki no tin base.
E alumno cu ta bay MAVO, ta un alumno cu ta sigui un trayecto cu e nomber mes ta bisa Middelbaar Algemeen Voorgezet Onderwijs. E alumno aki ta formando su mes den e prome dos añanan y despues den klas 3 e lo por scoge su profiel. E grupo di decanonan si tin argumento cu base di con no mester laga e alumnonan na final di klas 2 scoge nan profiel. A haci un sondeo cu e alumnonan di Juliana School resultado ta cu for di 138 alumno solamente 14 a bisa cu nan lo por scoge na final di klas 2 y tambe a nan a haya informacion for di un rapport for di Hulanda yama Landelijk Aktie Komitee Scholen (LAKS). Den e rapport aki a sali na cla via un encuesta cu un gran percentage di VMBO alumonan no ta apto pa escoge nan profiel den klas 2.
E alumno cu ta bay Educacion Profesional Basico (E.P.B), sa for di principio cua direccion e por scoge ora e drenta E.P.B. Nos no mester compara appel cu peer.
Si berdad nos ta pretende di biba riba un pais cu su gobierno ta transparente, di con no duna e mayornan e informacion, con e proceso di innovacion ta cana gradualmente, di con ta warda un par di luna pa informa e maestronan, mayor y alumno lo cual ta bay pasa realmente den enseñansa pa e añanan cercano, riba tereno di enseñansa obligatorio y vervroegde keuze?
Como maestra y presidente di SIMAR mi ta urgi minister di enseñansa pa sinta y dialoga tocante enseñansa y no hunga e wega di baseball y no laga e comisionnan (e fastpitchers nan) sigui tira nos fastpitch. Ban aporta realmente na bienestar di nos sociedad.
Hunto nos mester duna contenido na e relacionnan den enseñansa.
