Shermine Maduro di FADA:
ORANJESTAD (AAN): Shermine Maduro ta preventief medewerker na FADA. Nan ta trahando riba un programa nobo debi cu a constata cu e uso di droga entre e hobennan a bira alarmante y ta comosifuera esaki ta algo normal. Y no ta solamente bou di hobennan.
Segun el a splica, den investigacionnan cu FADA ta haci, yamadanan di mayornan cu nan ta haya combina cu informacion di street corner workers, ta indica cu e asunto di uso di droga ta cuminsa door di problemanan den seno familiar.
Pesey FADA ta bini cu un programa na inicio di juni, bishitando diferente compania pa informa e mayornan kico nan por haci pa evita cu nan yiu ta bay cay den droga. E mayornan lo haya tips di kico nan mester haci y percura pa nan yiu por hiba un bida sano y liber di droga.
“Si nos famianan ta stabiel, y fuerte para, nos yiunan tambe ta sigui e ehempel ey,” Maduro a indica. Hopi biaha ta worde papia cu door cu famia ta kibra, e muchanan ta cay den droga.
Na opinion di Shermin Maduro, no necesariamente esaki mester ta e causa di e problemanan cu uso di droga bou di hobennan. E ta un excusa. Pesey tambe den e programa lo pone enfoke hopi riba mama of tata soltero, y mayornan cu tin un bida professional hopi druk, kico nan por haci pa yuda y guia nan yiu den e proceso di crecimento. Bon comunicacion por hiba na evita tur e problemanan cu tin awe. Si no traha riba e tema aki, lo tin hopi mas mucha cu lo cay den droga. Tin un rapport den proceso cu no ta cla ainda, pero e informe cu nan a ricibi ta indica cu hopi hoben na Aruba ta usando droga na Aruba.
E rapport aki ta un entrevista haci cu 8 mil hoben na Aruba y ta papia di e diferente droganan cu ta worde uza bou di e hobennan. Pesey ta masha importante pa prevencion cuminsa na cas. Esaki ta e lema di FADA. Nan a constata cu hopi hende no kier papia di droga of ta nenga mesora cu por tin un problema di droga.
Hobennan awendia ta un tiki mas liber y ta haci hopi mas cos, sinembargo ta importante pa toch e mayornan duna e guia necesario den e proceso di laga yiunan bira un tiki mas liber. Mayornan mester ta e ehempel pa e yiu, biba e bida manera mester ta. Respeta e hoben, pero guie. Pesey ta importante e programa cu ta bay cune pa mayornan.
