Egberto Werleman encuanto reunion di Simar…
ORANJESTAD (AAN): Durante e ultimo lunanan hopi colega a puntra mi dicon ami mes y tambe SIMAR no a laga su voz resona bastante , mientras tin tanto cos ta pasando cu no ta cuadra den enseñanza. Shonnan, mi tin cu bisa e berdad. Y e berdad curo ta e regalo cu nos a haya no ta cos di bisa ni di canta makamba. Demasiado cos cu no tabata na orden y bo tin cu limpia cas prome cu bo haya bishita. Ruim op de boel no ta dushi, un hende tin tin cu hacie. Esey nos como directiva interino a haci.
Nos no a sinta modela ni come pan cu bologna. Nos a bin pa drecha cos y mi tin cu bisa cu nos ta “on- track”, nos ta riba caminda. E reto awo ta caba cu e trabao y duna bida back na nos sindicato di maestro, restablece confianza y trece nos miembronan cas back.
Awenochi nos lo duna cuenta, paso e reunion di awe nochi ta pa duna cuenta. Nos lo duna cuenta kico nos a haci cu bo placa di contribucion. Paso un sindicato mester duna cuenta na su miembronan kico e ta haci cu bo placa di contribucion. Cambio Tin!! Despues di hopi tempo tin 0 Florin pa BAR, pero 36.000 Florin riba presupuesto pa asuntonan huridico pa miembro, no pa Jan, Piet en Klaas. Casonan huridico di miembro ta worde atendi, nan no ta keda drumi mas den lachi. Si un miembro ta paga pa limousine e no por haya servicio di wacharaka. Cambio tin!! Sin papia mes cu despues di 40 aña SIMAR ta bay haya alafin su propio Reglamento di Cas. Cambio tin !!
Pesey mes mi ta haci un apelacion un biaha mas na abo como miembro pa sacrifica un diabiertje y bin scucha pa bo mes kico nos a haya y kico nos a haci y bo mes por saca bo som unda nos ta bayendo. Mas importante cu e elekshon di un directiva nobo ta e cuenta cu nos lo bay duna, pasobra abo como miembro mester sa kico ta pasa den bo sindicato. E fiesta di djo-djo cu suikerpot a caba y no mag di bolbe!! HAMAS!!
Por ultimo mi kier a haci un apelacion mas na abo como miembro, nos tin mester di bo sosten pa caba cu e trabao, drecha cos, duna bida back na nos sindicato, restablece confianza y trece nos miembronan cas back. Si WEMA a bin pa keda, mi tey pa drecha cos y move!! Bo sosten ta nos forza!! Wak pa bo tey, no laga otro dicidi pabo!! Y corda cu bo colega y bo colebra!!
