Egberto Werleman:
ORANJESTAD (AAN): Pa decadanan largo SIMAR tabata e vigilante di procesonan di cambio den enseñanza y e motor tras di cambionan necesario den enseñanza. Awendia ainda tin cambionan ta andando den enseñanza, apesar cu e proceso di inovacion ta canando riba garoti kibra di un morocoy. Aki nan SIMAR por hunga un rol importante door di ta e watch-dog di enseñanza. Den mi opinion SIMAR mester bira e watch-dog di enseñanza atrobe manera e tabata den pasado.
E ultimo añanan hopi cambionan a ser implementa den enseñanza. Miyones a worde inverti den inovacion di enseñanza.
Bon ideanan cu lamentablemente hopi biaha a keda na solamente bon ideanan, pasobra tabata tin cambionan cu no a worde bon guia y bon implementa. Akinan SIMAR como e sindicato di enseñanza y maestronan mester a hunga un rol clave pa tur cos a bay bon. Ta pesey mes mi ta boga pa SIMAR tuma su rol atrobe como e vigilante di procesonan den enseñanza y motor tras di e cambionan necesario.
Tur cambio mester ta pa mihor, no pa pio. Si nos tuma tempo y analiza bon kico ta pasando awor nos tin di yega na e conclusion cu e proceso di inovacion ta stagna. John F. por a bira EPB, pero idea tras di “ School chikito den school Grandi” ta oude wijn in nieuwe zakken”. Si bo kier pa un hoben kies un vakkenpakket den tweede MAVO bo ta bay back den tempo, tempo di mi tempo unda ya caba den tweede bo mester a kies un of wiskunde of handel den tweede. Asina bo ta corta halanan di un hoben sin tin mester. Colegio kier hisa su cantidad di graduadonan door di selecta envez di guia alumnonan. EPI tin un cantidad di zittenblijvers y dropouts, mientras cu e idea di Community College a disparce for di mapa. Na Hulanda ya caba nan ta trahando cu Associate Degree. Bushiri tabata tine, e tabata funciona bon, pero nos mester copia tur cos for di Hulanda. Mi ta puntra mi mes si tur e cambionan tabata un cambio pa mihor of un cambio pa pio. Hulanda mes ta draai tur cos back y ta bayendo awo pa e sistema Americano. Y anos a entrega tur cos bon cu nos tabata tin djis pa cana ciegamente tras di Hulanda. Mientrastanto e origen di e problema mes no ta worde atendi.
Miyones a worde benta afo pa trece cambionan di cual hopi no a surti. Si a scucha e veld, e maestro cu sa kico ta come y bebe den enseñanza, hopi miyones por a worde scapa y nos lo tabata hopi mas leeuw awe y awo. A busca e camindanan di extremo y no a busca e caminda di mei-mei. Akinan SIMAR por a hunga un rol y mester hunga un rol. SIMAR mester bira e watch-dog di enseñanza atrobe.
