ORANJESTAD (AAN) – Diadomingo dia 24 di Juni na Aruba nos ta celebra e fiesta di San Juan of Dera Gay. Directiva di Centro di Bario Playa Pabao tin e actividad aki den su calendario pa actividadnan pa 2012 y ta celebra e dia aki diadomingo 24 di juni den su Centro.
E actividad aki ta cuminsa 5’or y lo termina pa 10’or. Directiva di Centro di Bario Playa Pabao ya tin algun siman preparando pa e actividad aki. Bou di encargo di Juffrouw Madelein a cuminsa cu un grupo di hoben di baile y tambe a contanan di e tradicion di e e fiesta aki.
E grupo aki tambe ta duna presentacion diadomingo. Pa 5’or ta cuminsa cu e programa cu e Himno di Aruba y di Playa Pabao. Ya tin diferente grupo a confirma nan participacion e.o. Kids 2 Kids, Grupo di baile Hubenil di Playa Pabao, Grupo Folklore di Santa Cruz bou di direccion di sra Lia Lopez, Masiduri, Shororo y Rosea Cultural.
E musica lo ta den man di Grupo Tipico Jara. Un atraccion a bin acerca ta e Mercado di Santa Rosa. Lo tin tent cu entre otro fruta y berdura fresco, mata, artesania, cos dushi cuminda crioyo y hopi sorpresa mas.. Directiva di Centro di Bario Playa ta desea e pueblo di Aruba un dushi dia San Juan y ta invitanan pa participa activamente den e celebracion aki.
Laganan nos proteha e fiesta nacional di San Juan pasobra si nos mes nos hasie niun hende lo hasie. Directiva di Centro di Bario Playa Pabao tambe ta hasi un suplica pa no kima mondi destruyendo asina nos flora y fauna.
